Read Vaiphei JOEL 2 Bible Online

JOEL 2 - Vaiphei bible

JOEL 2

¹Zion ah pengkul mût un; ka tâng thiangtho ah chun patau aw sua un! Gam ah chêngte zosia lau in kithing tau hen. LALPA ni hung tung ding ahi ta’ngal a; zia hi a nai tai;

²thim leh vannîm ni, sûm ji’n ni leh thim sâ ni ahi! tâng chungte chu thim in meikhu gual in, sepai tam tak leh hat a hung ui; zia gual chu masang ah kipat in, a la um kha naipua’n, bangmatik in um kit talo ding ahi.

³A malam uh mei in a kâng tum pek ah, a nung lam uh meikuang in a kâng hi. A malam ua gam chu Eden huan gual ahi’n, a nunglam uh chu gamthip thawmhau gual ahi. Bangma suakcha pua’n a.

⁴A mêl latdan uh sakol gual ahi’n, kido’na sakol gual in a tai ui.

⁵Kido’na kângtalai gual ah tai in, hampa kâng ah mei a kua’n puat puat gual leh, kido’na pang ding ah kisa galdo mihat tak gual in, mualvûm in a chawm kâi ui.

⁶A âng un mipite suknat in a um un, mai zosia a thidâng tai.

⁷Gâlhat gual in a tai un, sepai gual in bâng in a kãl ui. A mazawn chiat un a chiau ah, a kitian dan uh a nusia puau hi.

⁸A kiphutua a um puau ah, mi tin a lampi chiat un a chiau in; hiam leh thal lak in a chia theng pek ua, bangma’n a nang zo puai.

⁹Khawpi sung in a chawm lut un, bâng chung ah lawn kai in, Inte’n a kal to un, gucha gual in tukvan ah te’n a lut ui.

¹⁰A âng un lei a kilîng in, vante a kithing hi. Nisa leh thapi a thim in, aksite’n a vâk uh a sêlgu tau hi.

¹¹LALPA‘n a galdo mite ma-âng in aw a sua in; a sepai hon a tam nau e! A thupiak zawmte chu simsên gual lo a hiu. LALPA ni chu a lopi hi; a tizat um na e! Kua a hem thuak zo ding?

¹²Ahi’n la, tu’hin le LALPA‘n, la lungthim zosiau in anngawl ah, kap leh lusûn kawm in ka kiangah, hung kihei kit un;

¹³la puan uh hilo, la lungthimteu bawtkêk un, a ti nalai hi. LALPA la Pathian lam un hung kit un, ama chu mi lungsiat thiam leh ja’ngai thiam, lungniang leh lainatna dim leh mi gawt ziang nuam lo ahi ngal a.

¹⁴LALPA la Pathian un maljawlnate ei pia’n, thâi thillat leh, dawn ding thillatte ei pia’n, a lungnatna juk kit ah, kihei kit lo mawng mawng ding ahi, ti kua a hem he thei?

¹⁵Zion ah pengkul mût un; anngawl hun chang thiangtho un; kikhawpna gun tak khat bawl unla;

¹⁶mipi ko khawm un, kikhawppina chu suthiangtho unla; pitingte ko khawm unla, chapangte leh nawichep lai nausente natiang ko khawm un. Mopa’n a pindan nusia hen la; monu’nle a chutna nusia hen.

¹⁷LALPA nasêm thiampute le, mâichâm leh hulliap kikâl in kap tau hen. “Aw LALPA, la mite hawi inla, la gochante nuizatbûk leh, namdangte gensim di’n siam kin. Bang ziak ah namdangte lak ah, ‘A Pathian uh khawi ah um a tam?’ ti ah a um ding,” ti tau hen.

¹⁸Ziazaw chun, LALPA chu, a gam â dingin dawichilgil a hung hita’n; a mite chung in lainatna a nei tai.

¹⁹LALPA‘n a mite kiang in: nang uh â dingin bu, uain leh sathaute hun pia’ng ka tin; ziate ah chun kihi’ tai ta’n lau; namdangte nuizatbûk in, hun umsak ta pua’ng ka.

²⁰Mallam ah la gâlteu chu, gamla tak in koimang ing ka tin, gamkeu leh gamsia lak ah naw kit ing ka; a matawng pawl sualam tuisuagiat sung ah, a nungdâlte tumlam tuisuagiat sung ah; a gimsia leh ui hung pawt in a. Kichian tak in ama’n thil lopi takte a bawl tai!

²¹Aw gam, lau kin la, kipak in, lim ta’n; LALPA‘n thil lopi takte a bawl ta’ngal a!

²²Gamlak ah sa chitinte haw lau kiu in, gamthip ah loupate chu a hung hing kit ta’ngal a; thing in ga a sua in, theichang leh grep inle ga a tam thei pen a suau hi.

²³Aw Zion chate haw, LALPA la Pathian ua chun kipak in lim tau in; ama’n gawtui masa chu a hun takin a pia hen, gawtui kiningting tak in a hun leibua, gawzu masa leh a nunung chu, tu’ma lam gual ah khan a hun peta ngal a.

²⁴Bu phualte chu bu’n hung dim intin, grep sûkna khûkte chule, uain leh sathau luanglet ta’n a.

²⁵La lak ua ka sepai tam tak ka hun sawl tâk, khaubepi hon, khauphak hon leh, thing leh gua nesia khauphâkte leh, thing nêk hât chi khauphâk chite’n a nêksiat uh kumte chu hun din kit ta’ng ka.

²⁶Tam tak tak in ne’n la tiu in, niang leh tai ah um in, LALPA la Pathian uh, nang uh â ding ah danglam tak ah, bawlpa min chu pâk ta’n lau. Tichun, ka mite chu sukmualpho kit hita pua’n au.

²⁷Keima chu Israelte lak in, ka um ngei nai ti leh, keima, LALPA la Pathian uh ka hi’n, kei tawhbang kuama dang umlo ahi ti hun he ta’n lau. Chun, ka mite chu sukmualpho kit hita pua’n au.

²⁸Ziazaw nung ah chun, mi zosia chung in ka thagau buntha’ng ka tin; la chapateu leh la chanuteu in hillawk intiu in; la têkseteu in mang in mat intiu in, la tangvalteu in kilâkna mu’n au.

²⁹Zia ni phat chuleh, suak pawsal leh, numeite chung natiang in ka thagau buntha’ng ka.

³⁰Lei leh vante ah zilgaina, mêlchiknate thisan leh mei leh meikhu kitungte hun etsak ing ka.

³¹LALPA ni lopi tak leh tizat um tak a hung tun masang in; nisa thim intin, thapi le thisan suak in a.

³²Tichun, LALPA min lam taphot chu hukhin in um in au; LALPA‘n a gen gual khan, Zion tâng leh Jerusalem ah chun a suakcha sunte um intiu in; zia a suakchate lakah chun LALPA‘n a kote chu um in au.