Read Vaiphei AMOS 2 Bible Online

AMOS 2 - Vaiphei bible

AMOS 2

¹LALPA‘n zia gual hin a gen hi: Moabte bawsiatna pathumte ziak leh palite ziakin, a chung ua gawtna ding chu lamang pua’ng ka; amau in Edom lengpa gute chu, lungna tak ah a halvâm ziak un.

²Ziaziakchun, Moab chung ah mei sawl ing ka tin, Kerioth kulpite chu kâng tum intin, Moab chu buaina huaisia lak ah, kiko thawm leh pengkul git lak in thi’n tin;

³a lak ua kipat a vaihawmpau chu, sumangthai ing ka tin; a miliante zosia tawh that khawm ing ka, LALPA chun a tii.

⁴LALPA‘n zia gual hin a gen hi: Judah bawsiatna pathumte ziak leh palite ziakin, a chung ua gawtna ding chu lamang pua’ng ka; amau in LALPA dan a nol un, a thuguatte zui nuam lo in, a pu leh pateu a zuausan gual mau ah, pui mang in a um ta’ngal un.

⁵Ziaziakchun, Judah chung ah mei sawl ing ka tin, Jerusalem kulpite chu kâng tum in a.

⁶LALPA‘n zia gual hin a gen hi: Israelte bawsiatna pathumte ziak leh palite ziakin, a chung ua gawtna ding chu lamang pua’ng ka; amau in mi diktat chu dangka’n a zuak un, mi tasam chu kengtawdap tuak khat ah a zawk ziak un;

⁷gentheite luchang chu leivui lak ah tawden in, mi sukgenthei ah umte a lampiu ah kipat a sawn mang un; pa leh a chapa nungak khat a kikop un, tichun, ka min thiangtho sukbuak in a um hi;

⁸mâichâm bul tincheng in kitepna puansil chung ah a lum un; chuleh, a mi gapnau uain chu Pathian In ah a hun dawn uh ahi.

⁹Chutisapi’nle, a âng ua kipat, sidar thing gual ah sâng leh, gangpi thing gual ah detdote Amorte chu ka susia ta’n; chung lam ah a ga leh nuai lam ah a zungte ka hisiat piak hi.

¹⁰Amorte gam lua dingin Aigupta gam ah kipat in ka hun puidok a, gamthip ah kum sawmli sung ka hun pui hi.

¹¹La chateu lak ah khenkhat jawlnei hiding leh, la tangvalteu nazarit hiding in ka tungdok a. Aw Israel chate haw, zia gual chu hilo maw? ti in.

¹²Himaleh, nazarit mite chu zu la dawnsak un, jawlneite chu, “Thu hillawk ta kin,” la tiu a.

¹³Ziaziakchun, kângtalai buvui ah dim in, a del khum gual in la umnau mun ah kipat, hun sawnden ding ka hi.

¹⁴Mi chan-gangte chan-ganna bei ta’n tin, mihat inle a hatna nei den pua’n tin, mi thilhitheite’n le a hinnau humbit diak pua’n au;

¹⁵thalpi chawite le pang thei diak lo in, mi chan-gangte le kihukdok diak pua’n’au, sakol chung ah chuangte le kihukdok thei pua’n au;

¹⁶ziaphat chuleh, mihat chungnungte lak ah mi lungchangpha pente chule, ngawnchang in jamsia ta’n au; LALPA‘n a tii.