Read Vaiphei AMOS 4 Bible Online

AMOS 4 - Vaiphei bible

AMOS 4

¹Zia thute hi ngai un, nang uh Bashan ah bawngpite haw: Samaria tâng chung ah um ah, michagate sugenthei ah, mi tasamte tawden ah, a pawsalteu kiang ah, “Bang a hem khat dawn ding hun lau in,” tite haw.

²LALPA PATHIAN in a thianthona sâl in a kihaksial tai: Ngakuai ah a hun kai mang un, la lak ua a nunung pen tiang ah, ngakuai ah a hun kaimangna ding uh hun chu, matheilo in la chung un tung ding ahi.

³Mi tin chu amau ma zawn chiat un, bâng awngkâl ah pawtdok in nusia in la tiu in; Harmon sung ah pai lut in hung um in lau, LALPA‘n a tii.

⁴Bethel ah hung un la bawtsiau in, Gilgal ah hung unla, bawsiatna supung un; jingkal si’n in la kithoinau hun chawi unla, ni thum dan leh la sawm ah khatteu hun chawi khawm unla;

⁵kipakna thillat thawi pang vaithum hun lân unla, kiphalna dungzui ah thilpiak chawi dingin phuang unla, thu than vêl un; aw Israel mipite haw, zia gual ah bawl chu la thatnop lam tak uh ahi ngal a! LALPA PATHIAN in a tii.

⁶La khawpiteu ah hani bek kham dingle umlo khop ah, la umnau zosiau ah an tâksapna ka hun pia’n; zia sapi ah chunle ka kiang lam in, la hung kile’kit diak puau hi, LALPA‘n a tii.

⁷Pawltâkna ding tha thum ahi lai in, la chung ua gua zu ding ka tutâng ah; khawpi pakhat chung in gua ka zuksak ah, khawpi dang khat chung in ka zuksak pua’n; lou khat chung ah zuksak ahi’n;

⁸tichun, khawpi pani a hem, pathum a hem chu khawpi khat ah tui dawn in a chiau a, ahi’n, a doikhop puau in, Chutisapi’nle ka kiang in la hung kit puau hi, LALPA‘n a tii.

⁹Thinglung leh gial in ka hun gawt ah, la huanteu leh grep huanteu a hawm in ka umsak a, la theipi kungteu leh la Oliv thingteu khaubepi’n a ne zo tai; Chutisapi’nle ka kiang in la hung kile’kit puau hi, LALPA‘n a tii.

¹⁰Aigupta ah gawtna gual in hipi la lak un ka lênsak a, la tangvalteu chu chemjam in ka that ta’n; la sakolteu ka tok mang ta’n; la giamun ui gim uh la nâk hawm tiang un, ka hun thûtsak ta’n; Chutisapi’nle ka kiang in la hung kile’kit puau hi, LALPA‘n a tii.

¹¹Pathian in Sodom leh Gomorrah khuate a la suksiat gual khan, nang uh khenkhat ka hun susia ta’n; mei ah kipat kikaidok tawh bang la hitau in; Chutisapi’nle ka kiang in la hung kile’kit puau hi, LALPA‘n a tii.

¹²Ziaziakchun, aw Israel, la chung ah zia hi bawl ding ka hiziak in, aw Israel, la Pathian tuak dingin kisazo ta’n!

¹³Ngai in, tângte hun siam ah, huite siam ah, mihingte kiang ah a ngaituanate hiatsak ah, jingkal chu khawthim suaksak a, lei munsângte chuanden pa, a min LALPA, sepai honte Pathian chu ahi ngal a!