Read Vaiphei AMOS 8 Bible Online

AMOS 8 - Vaiphei bible

AMOS 8

¹Zia hi LALPA PATHIAN in ei etsak chu ahi: Nipi thei, bawm khat ah kikoi ahi.

²Ama’n, ka kiang in, “Amos, bang la mu em?” ei ti’n. Keima’n, “Nipi theiga bawm khat ka mui,” ka ti’n. Ziaphatchun, LALPA‘n ka kiang in: Ka mipi Israelte chung in tawpna chu a tung tai; a chung ua gawtna tung ding chu, thul him him ta pua’ng ka.

³Zia ni ah tempul ah La te chu lusûnna La hi’n tin; mithiluang tampi hi’n tin, mun tin ah thejak hi’n au; thip chil chel tau in, LALPA PATHIAN in a tii.

⁴Zia hi a la ngai un: Nang uh, mi tasam chuanchil ah, gam sung ah mi genthei suchavaite haw;

⁵“Bangtik leh tha a hung lik in, bu ka zuak thei ta diam uh maw? Bangtik leh sabbath ni bei in, gehu bu ka zuak thei diam uh maw? Ziaphat chuleh, ephah te’na hi’neu ing ka tiu in; shekel chu sulian ing ka tiu in, bûkna diklo ah zuau thep chîng ing kau:

⁶Michagate dangka thîk ah chawk ah, mi tasamte kengtawdap tuak khat ah chawk a, busi I zawk theina ding un,” la tiu a.

⁷LALPA chu, Jakob lopina sal in a kihaksial tai: a thilbawl dan zosiau chu hemil pua’ng ka.

⁸Zia thil ziak ah chun gam hi kithing lo ah, a sung ah chêng zosia’n a sûn lo ah, a leng ua Nail luipi gual ah khang ah, Aigupta gam ah Nail luipi gual ah kinawk vêl ah, kiam lo ah um thei ding a hem?

⁹LALPA PATHIAN in, “Zia ni chuleh sûnchang lai in, nisa tumsak ing ka tin, sûnchang lai tak in lei chung thimsak ding ka hi.

¹⁰La luaithenateu chu lusûnna chansak ka tin, la La sak zosia chu, kâ La chansak ing ka tin; kawng zosia saidip puan chên sak ing ka tin, mi tin chu lukol in umsak ing ka; zia chu chapa changkhat sûnna gual leh, a tawpna tiang ah haksa hisak ing ka.

¹¹LALPA PATHIAN in: Gam sung ah kial ka tun sakna ding hun chu, matheilo in a hung tung ding ahi tai; an ah kialna hilo, tui du ah kialna le hi diak lo in, LALPA thu hetna ah kialna ahi.

¹²Amau chu tuisuagiat ah kipat in tuisuagiat tiang ah, mallam ah kipat in sualam ah vâkvai in’au; LALPA thu hawl in tai lumlet intiu in, himaleh, mu pua’n lau.

¹³Zia ni chuleh, nungak hoi lai tak leh, tangval hoi lai tak chu dangchâk in thidang in au.

¹⁴Samaria ah Ashimah sal ah kihaksial ah, ‘Aw Dan, la Pathian a hin gual in,’ ti leh, ‘Beer-sheba khua zotna lampi a hin gual in,’ tite chu kipûk in au; bangtik inle thokit ta pua’n au,” a tii.