Read Vaiphei OBADIAH 1 Bible Online

OBADIAH 1 - Vaiphei bible

OBADIAH 1

¹Obadiah thil mû chu: LALPA PATHIAN in Edom chung thu a gen a: LALPA kiang ah kipat in thu ka la hiau in, namte lak in thangko sawl ahi tai: “Hung kipan un! Ama do dingin kipan hitiu!” a ti’n.

²Matheilo in, namte lak ah, a neu pen in hun siam ding ka hi; nasa tak ah musit ah um ding la hi.

³Nang, kawl suangpi kâl ah chêng ah, mun sâng tak ah chêng ah, la lungthim sung in, “Kua a hem lei tual ah ei kaitha thei ding?” la ti’n; la lungthim chapona chun a hun thêm ta ahi.

⁴Mupi gual ah sâng tak in leng male chin, aksite lak ah bû sia male chin, zia kipat chun hun latha ding ka hi, LALPAa tii.

⁵Jan thim nuai in guchate leh, suammangte’n hung bulu taleu, bang gual bep ah suksiat la hita diam! A dawicheng uh kigûk daw lo ding a hiu em? Grep la khawmte hung taleu, a lêpte bep nusia talo ding a hiu em?

⁶Esau chu bang gual bep ah chom gam ahi tam! a go thilte nasan kandaw ahi tai!

⁷La pankhawmpite zosia’n, a hun thêm tau ah, gamgi tiang a hun naw mang tau hi; la kizawppiten nangma a hunzo tau hi; la vaithum nete’nle la awkna ding, thâng a kam tau in, hetthiamna him him a um ta puai.

⁸Zia ni chuleh Edom lak ah, mipilte sumangthai ing ka tin, Esau tâng ah kipat hetthiamna, sumangthai ing ka, LALPAa tii.

⁹Aw Teman, Esau tâng ah kipat, mitin thâ gam ah a um sik sek theina ding un, la mihatte chu khet gawp hi’n au.

¹⁰La suapi Jakob la tha’na leh, a chung ah thagum la sua’na ziakin, zachâtna’n hun chup intin, kumkhua paithâk in um ta’n la.

¹¹La kilepsan ni ah, a go thil uh, mêlhet lote’n a puak mang niu ah, gamdang mite a kul kotkhak ah, a hung lut niu ah, Jerusalem chung ah âi a sân lai ua khan, nang le amau lak ah pang la hi.

¹²La suapipa vangsiat ni ah chun eulau kin la; Judah mipite’n siatna a tuak niu in, kipak diak kin; a buainau hun ah chun, kisathei tak in um kin.

¹³Ka mite’n vangsiatna a tuak niu ah chun, a kul kotkhak un lût kin; Judah in siatna a tuak hun ah, eulau tak ah enthate lak in pang kin; vangsiatna a tuak niu ah, a van uh kilâk kin.

¹⁴A lak ua suakcha vâkvaite that dingin, lamthuam ah châng kin, a buaina niu ah chun a hing sunte chu, matsak diak kin.

¹⁵Nam zosia chung ah LALPA ni ding chu, a nai ta’ngal a. La bawldan tawh kigûn tak in, la chung ah bawl hi’n a; la thilbawlte chu la luchung ah, hung chu kît ding ahi.

¹⁶Ka tâng thiangtho ah la dawn tak gual ngei in, la kîmvêl ah namdang zosia’nle dawn in au; ahi, la dawn intiu in, zia gual chu a la dawn kha ngailo gual khop in, thol kut kut in au.

¹⁷Himaleh, Zion tâng ah chun, a suakchate chu um intiu in, a thiangtho hita’n au; Jakob Inkuante chun, amau a la chomgamte ma ma chu, hun chom gam ta’n au.

¹⁸Jakob Inkuan chu mei hi’n tin, Joseph Inkuan chu meikuang hi’n tin, Esau Inkuan chu pawl tawhbang hi’n a; ama chu kâng intin, kâng tum intin, Esau Inkuan ah a suakcha um pua’n a; LALPA’n a ti’ngal a.

¹⁹Negeb ah umte chun Esau tâng chu, lua ta’n tiu in, Shephelah mun ah umte chun, Philistinte gam chu lua intiu in, Ephraim leh Samaria gam zosia chule chang ta’n au; Benjamin in Gilead gam lua ta’n a.

²⁰Halah ah Israel saltângte chun, Zarephath tiang in Phoenikia gam chu lua ta’n tiu in, Sepharad ah Jerusalem saltângte chun, Negeb ah khawpite chu lua ta’n au.

²¹Hukdaw ah umte chu Esau tâng chung ah, vaihawm dingin, Zion tâng ah chun chia to ta’n au; tichun, lenggam chu LALPA â hita’n a.