Read Vaiphei JONAH 4 Bible Online

JONAH 4 - Vaiphei bible

JONAH 4

¹Himaleh, zia gual ah thil a hung um phat chun, Jonah a lungawi ta paw ma ma a:

²LALPA kiang in a pauchap a: “Aw LALPA, zia thu hi ka gam ua ka um lai ah kha ka gensa hilo a hem? Ziaziak hin ahi, Tarshish lam ah ka la jam mang kha: Nang hi lungsiatna dim Pathian leh ja’ngaina dim, lungna vak ziang lo, hepina danglam lo ah dim, mi gawt lo ding ah kisa zosa la hi ti ka la he ta’ngal a.

³Tu’hin, aw LALPA, ka hinna ei lâkpiak zaw mai in, kei â dingin hin sâng in thi a phazaw ngal a,” a tia.

⁴Tichun, LALPA‘n, “La lungnat hi la hi’dik na em?” a tia.

⁵Tichun, Jonah chu khawpi ah kipat in a pawtdok ah, khawpi sualam pang ah chun a kichu; zia tak ah chun bûk a siam a. Khawpi chu bang a hung suakna diam ti en dingin, zia dailîm ah chun a kichu tai.

⁶Ziaphatchun, LALPA Pathian in nângbuk a la guat ah, zia chu Jonah chung in a jamsak ah, nuam tak ah a umtheina ding, dailîm dingin a hung um ah; zia nângbuk ziak ah chun Jonah chu a kipak ma ma tai.

⁷Himaleh, a jing phalvak in, Pathian in lung khat a guat ah, zia chun nângbuk chu a la susia ta’n; tichun, a hung vuaitha tai.

⁸Nisa a hung suak phatin, Pathian in sualam hui lum tak a guanggal ah, nisa chun Jonah chu thidang hial in a luchang a hun khaw ta’n; thi’ mai ding chu a don tai: “Kei â dingin hin sâng in thi’ a phazaw tai” a tia.

⁹Himaleh, Pathian in Jonah kiang ah chun, “Nângbuk chung thu ah la lungnat hi la hi dik na em?” ti’n a dong ah. Ama chunle, “Ka hi dik hi. Thi’ ngam khop ah lungna ka hi,” a ti tai.

¹⁰Tichun, LALPA‘n: “La gimpi hilo, la khansak le hidiak lo, jan khat thu ah hung um ah, jan khat thu ma ah mangthai kit ziang nângbuk hi la chuti ngaisak ahi chun

¹¹Nineveh khua lopi tak, a sung ah mihing nuai khat leh sîng ni sâng ah tam zaw, a changlam leh a veilam uh le hekhen theilote tawh, gancha tam tak umna hi, ngaisak lo ding ka hia hem?” a hun ti tai.