Read Vaiphei KISIMNA LEKHABU 10 Bible Online

KISIMNA LEKHABU 10 - Vaiphei bible

KISIMNA LEKHABU 10

¹LALPA chun Mosi kiang in zia gual hin a gen a:

²Dangka thîk in pengkul pani sek inla; ziate chu mipi kokhawmna ding leh giamun kichawnna ding ah la mût sek ding uh ahi.

³Pengkul pani chu a kimût phat leh, mipi zosia chu kikhopna biakbûk In mai tual ah la kiang ah a hung khawm ding uh ahi.

⁴Ahi’n, pengkul pakhat bep a kimût phat leh, Israel phung tin ah luchangte bep chu la kiang ah a hung khawm ding uh ahi.

⁵Kigâlginna pengkul khatvei la mût phat leh, sualam kâi ah giakte hung kipan intiu in;

⁶kigâlginna pengkul nivei la mût phat leh, simlam kâi ah giakte hung kipan in au. Giamun chawn ah a kipatdok ding si’n ua leh, kigâl ginna pengkul mût jel sek ding ahi.

⁷Mipi zosia kokhawmna dingin pengkul chu la mût git diu ahi, kigâlginna git ah la mût lo diu ahi.

⁸Aron chapa thiampute chun pengkul chu a mût ding uh ahi’n; zia gual ah chun la suan zosiau ah tawp lo ah la bawl sek ding uh ahi.

⁹Chuleh, la gam sung ua nanghaw hun hi’genthei, la mêlmateu do ding ah la kua’n ding tak uh leh, kigâlginna pengkul la mût ding uh ahi. Tichun, LALPA la Pathian mau ah het zing in um in la tiu in; chuleh, la gâlteu ah kipat hukdaw ah um ding la hiu.

¹⁰La kipakna niu leh la kût hunbî ding kiguatna hunbîte leh la thathak si’n un, hâlmang thillat leh chamna thillat la bawlna ding uh niteu ah chun pengkulte chu la mût sek ding uh ahi; LALPA la Pathian âng ua nanghaw thasângpa hetzingna hi’n ah: Kei hi LALPA la Pathian uh ka hi.

¹¹A kum ni’na, a tha ni’na, zia tha ah a ni sawmni tin ni chun, sûmpi chu thuthunna biakbûk chung ah kipat in a kichawndok tai.

¹²Tichun, Israelte chu Sinai gamthip ah kipat in a pawl pawl in a kizawtdok un; chuleh, sûmpi chu Paran gamthip in a kichawl tai.

¹³LALPA chun Mosi thu a piak dungzui ah a kipatdaw masakna pen uh ahi.

¹⁴Judah phung ah mite chu a pawl pawl ah giamun ah kipandok masa pen in a pang un, a gâlmatawng chu Amminadab chapa Nahshon ahi.

¹⁵Issakhar phung ah mite gâlmatawng chu Zuar chapa Nethanel ahi.

¹⁶Zebulun phung ah mite gâlmatawng chu Helon chapa Eliab ahi.

¹⁷Chun, biakbûk chu a phel tau a, Gershon Inkuan leh Merari Inkuante chu a paw dingin a kipan tau a.

¹⁸A ban ah chun Reuben phung ah mite chu a pawl pawl in a giamun ah kipandok in a pang un; a gâlmatawng uh chu Shedeur chapa Elizur ahi.

¹⁹Simeon phung ah mite gâlmatawng chu Zerushaddai chapa Shelumiel ahi.

²⁰Gad phung ah mite gâlmatawng chu Deuel chapa Eliasaph ahi.

²¹Chun, Kohath Inkuan ah mite chun thilzek thiangthote chu jawn in a kipandok un; chuleh, giamun ding a tun kit phat uh leh, biakbûk chu a la tungdok kit sek un.

²²A ban ah chun Ephraim phung ah mite chu a pawl pawl ah giamun a kipandok in a pang un; a gâlmatawng chu Ammihud chapa Elishama ahi.

²³Manasseh phung ah mite gâlmatawng chu Pedahzur chapa Gamaliel ahi.

²⁴Benjamin phung ah mite gâlmatawng chu Gideoni chapa Abidan ahi.

²⁵Chuleh, a pawl pawl ah giamun kichawndokte lak ah a nunung pen chu Dan phung ah mite a hiu a; amau phung ah mite gâlmatawng chu Ammishaddai chapa Ahiezer ahi.

²⁶Asher phung ah mite gâlmatawng chu Okran chapa Pagiel ahi;

²⁷chuleh, Naphtali phung ah mite gâlmatawng chu Enan chapa Ahira ahi.

²⁸Zia gual ah hin Israelte chu a pawl pawl in a kipandok sek ui.

²⁹Chun, Mosi’n a sungpa Midian mi Reuel chapa, Hobab kiang ah chun, “Kei haw hi LALPA‘n ka kiang un, ‘Zia gam chu hun pia ding ka hi,’ a ti’na gam zuan ah chia ka hiu ah; nang le ka lak un hung pang in, pha tak in hun bawl ing kau; LALPA chun Israelte â dingin thilpha ei tiam ta ngâl a,” a tia.

³⁰Ahi’n la, ama chun, “Hung pang pua’ng ka tin, ka chipite kiang ah ka gam lam un kile’kit ding ka hi,” ti’n a dawnhu tai.

³¹Mosi’n a kiang in, “Ei nusia kin, gamthip ah khoitak mun ah giamun ka bawl ua pha a hem ti nang in la het ziakin, ka mit ua la pan ding ahi.

³²Chuleh, lei zui leh LALPA‘n ka chung ua thilpha a bawl dungzui in, nang chung ah le hun bawl ding ka hiu,” a tia.

³³Chutichun, LALPA tâng ah kipat in a kipandok un, LALPA thuthung thingkuang a ma lam un giamun kitûpna mun hawl lawk dingin ni thum lam in a jawn un;

³⁴giamun ah kipat a pawt daw phat uh leh, LALPA sûmpi chu a chung un sûn nitum in a um sek a.

³⁵Thuthung thingkuang chu a kipatdaw ding tak leh Mosi’n zia gual hin a gen sek a: “Aw LALPA kipan in, la gâlte chu thejak in um uh hen la, la gâlte chu la âng ah jam mang tau hen,” ti in.

³⁶Chuleh, thuthung thingkuang chu a chawlna ding a tun phat leh, zia gual hin a gen ding ahi: “Aw LALPA, Israel mipi, a sâng ah simte kiang lam in hung kile’kit in,” ti in.