Read Vaiphei KISIMNA LEKHABU 11 Bible Online

KISIMNA LEKHABU 11 - Vaiphei bible

KISIMNA LEKHABU 11

¹Tu’hin, LALPA kiang ah mipite vangsia kisa’n a phunchiak pan tauah; a phunchiaknau LALPA‘n a het phat in a lung a na ta’n. LALPA lungnatna mei a lak un a hung kuangjak ta’n, giamun paw lam ah um khenkhatte chu a kânglum tai.

²Ahi’n, mipite chu Mosi kiang in a patau un; chuleh, Mosi LALPA kiang ah a pauchap phatin meikuang chu a mit tai.

³LALPA meikuang mipi lak ah a kuanjak ziakin zia mun chu Taberah a sak tau a.

⁴Chun, a lak ua nam dang umte chun sa a ducha ta ma mau a; Israelte chule a kap kit tau a: “Sa khatvei bêk kine leh aw!

⁵Aigupta gam ah sangate, changmaite, dawnkhawte, lothulte, lothul sante leh lothul kângte niang leh tai ah ka nêk lai teu kha aw!

⁶Tu’hin vang I tha leh zung uh a kang zo ta’n, manna tilo ngâl bangma dang um talo,” a tiu a.

⁷Manna chu tâtpâk tawhbang leh ankam pâk eng gual thim ah vâm ahi.

⁸Mite’n a luak khawm ua, sumhêk ah hêkbuang a hem, sum ah suk in a subuang un, a tui dan chu sathau tawh kihel vaithum pei kisiam gual ahi.

⁹Giamun ah chun jan daitui a kiak phat leh manna chule a hung ke sek a.

¹⁰Chun, mipite a Inkuan kuan un, amau kotbul chiat ah kap dêp dûp ah um chu Mosi’n a he ta’n. A chung un LALPA nasa tak in a lungna ta’n, Mosi le a lungawi ta puai.

¹¹Tichun, LALPA kiang ah Mosi’n, “Bang ding ah la suak hi zia gual lawm lawm ah hin lei bawlsiat a hem? Bang ding ah la doisakna chang lo ah, mipi zosia puakgik ka chung ah la ngak ziang a tam?

¹²Mipi zia jat jat hi ka chate ngen a hiu ah a hem? Amau chu ka hin ah la bawl ah, bangatia ka kiang ah, ‘Naudon mite’n a âng ua nau a pâi gual un, amau hi la âng sung ah pâi inla, a pu leh pateu kiang ah ka la tiamna gam ah pui lût in,’ lei ti a hem?

¹³Mipi zia jat jat piak ding hi keima’n sa khoitak ah la ding ka hem? Kap pum in ka kiang ah, ‘Ka nêk ding uh sa ei pia’n,’ ti’n a hung ngâl un.

¹⁴Keima ngen in mipi zia jat jat hi paw zo pua’ng ka, kei â ding in a gik talua ngâl a.

¹⁵Zia gual ahi ei bawl ding la hi chun, la doisakna chang ka hileh — ei that vânglak ziang in, zia gual gentheina hi ei musak dâ mai in,” a ti’n.

¹⁶Tichun, LALPA chun Mosi kiang in: “Nang in upa a hiu ti leh Israelte chung ah vaihawm puitu la hiatsa ngen, mi sawmsagite chu ka kiang ah hun ko khawm inla, mipite kikhopna puanbûk ah hun pui inla, zia tak ah chun nang tawh hung ding khawm un,” a tia.

¹⁷Hung suk ing ka tin, zia tak ah chun nangma hun ho ding ka hi; chuleh, nangma ah thagau um chu la khen ing ka tin, amau chung ah le koi ing ka; tichun, amau in mipite puakgik hun puakpi intiu in, nangma ngen in puakgik paw ta pua’n la.

¹⁸Chuleh, mipite kiang a: Jing â dingin kisuthiangtho un, nanghaw’n sa ne ta ding la hiu; nang un LALPA kiang ah, Khatvei bêk sa kine ta maleh aw! Kei uh â dingin Aigupta gam ah um mai kha phazaw hive’n, ti ah kap leh mâu ah la um tâk ziak un. Ziaziakchun, LALPA‘n sa hun pia’n tin, ne ding la hitau hi.

¹⁹Ni khat bep a hem, ni ni’ bep a hem, ni nga bep a hem, ni sawm bep a hem leh ni sawmni bep a hem ne pua’n la tiu in,

²⁰tha khat ving veng la nêk ua, la nâk hawm ua a hung pawt daw kit ah, la luaksuak hial masangsiau ne ding la hiu; nanghaw’n la lak ua um zing LALPA ngaisak lo in, ama kiang ah la kap ua, Bang ding ah Aigupta gam ah kipat hung pawtdok I la hitau em? la ti tâk ziak un, ti’n gen in, a tia.

²¹Himaleh, Mosi’n a kiang in, Ka um khawmpi mipite, amau keng chiat ah lamzawt thei ngen le nuai guk a hiu ah; chuleh, nang in, Keima’n tha khat pumlum la nêkkhop ding uh sa hun pia ding ka hi, la tia.

²²Bawng hon leh belam hon zia jat dai ding chu thâ ding a kiting na diam? Tuisuagiat ah sanga zosia le man khawm lehing a kiting na diam? ti’n a dong a.

²³LALPA chun Mosi a hun dawnhu ah, LALPA thilhitheina chun chintawk a nei em? La kiang ah ka thugen chu a guitun leh guitun lo tu’hin mu ding la hi tai, a tia.

²⁴Tichun, Mosi a pawtdok ah, LALPA‘n a kiang ah thu a gente chu mipite kiang in a hilsawn ta’n; chuleh, mipite lak ah kipat upa sawm sagite chu a pui khawm ah, biakbûk kîmvêl ah chun a dinsak tai.

²⁵Tichun, LALPA chu sûm lak in a hung suk ah, a kiang in thu a hun gen ta’n; chuleh, a chung ah thagau khen khat chu a ladok ah, upa sawm sagite chung in a koi ta’n; chuleh, a chung ua thagau a um phatin thu a genlawk tau ah; ahi’n la, zia gual chun a gen kit ta puau hi.

²⁶Giamun ah chun mi pani a um den un, khatpa min chu Eldad ahi’n, khatpa min chu Medad ahi; a chung un thagau a hung um ta’n, a min kikhumte lak ah pang himaleu, biakbûk ah pawtdok lo a, giamun ah thugen a la hiu a.

²⁷Chuleh, tangval khat hung tai in Mosi a vahil ah, “Eldad tawh Medad in giamun sung ah thu a gen ui,” a hung tiu a.

²⁸Chun, Mosi kithuapi sek, Nun chapa Joshua’n, a têldawte lak ah pakhat chun a kiang in, “He pu Mosi, khâm ta’n la!” a tia.

²⁹Ahi’n, Mosi’n a kiang in, “Ka thasâng ah amau chu thangsia la hem? LALPA mipi zosia hi jawlnei hiu hen la, a leng ua chung in LALPA‘n a thagau koi chiat leh I ti’siat tawh!” a tia.

³⁰Tichun, Mosi tawh Israel upate chu giamun lam in a hung kit tau hi.

³¹Ziaphatchun, LALPA kiang ah kipat in hui a nung ah, tuisuagiat ah kipat in vavêng tam tak a hun tok ah, a giamun kîmvêl un a kiaksak ah, giamun langkhat lam, ni khat zinphâkna tiang leh, a le langkhat lam ah le ni khat zinphâkna tiang, vavêng in a dimsak ah; giamun kîmvêl ah chun leitual ah kipat tong ni hial ah sâ in vavêng a hun kiaksak tai.

³²Tichun, mipite a kipan un, sun nitum leh jan khawvak hial in, chuleh, a jing nitum kit tiang in vavêng chu a kiluak tau a; a luak khawm tawm pen inle homer sawm khat tiang bêk a luak khawm un; chuleh, a giamun kîmvêl uh chun a kipho gam chiat tau a.

³³Ahi’n, a sa thai lai ua, a val lut masang un, LALPA lungnatna huaisia tak mipite chung in a hung kuangjak ta’n; tichun, LALPA‘n mipite chu hipi nasa tak in a hun gawt tai.

³⁴Tichun, zia mun ah chun gawlsante chu vui in a um tâk ziak un, a mun chule Kibroth-Hattavah a sa tau a.

³⁵Kibroth-hattavah mun ah kipat in mipite chu Hazeroth lam zuan in a kipandok kit tau hi.