Read Vaiphei KISIMNA LEKHABU 12 Bible Online

KISIMNA LEKHABU 12 - Vaiphei bible

KISIMNA LEKHABU 12

¹Chun, Hazeroth mun ah a um lai un, Miriam tawh Aron in Mosi’n Kush numei khat ji’ a nei ziakin a gensia tau a (ama’n Kush numei chu ji’n a la nei tak tak ahi ngâl a;)

²zia gual hin a gen tau a: “LALPA chun Mosi kiang bep ah maw thu a gen? LALPA‘n bang ding ah ei uh kiang ah le thu gen lo a hem?” a tiu a. LALPA‘n zia chu a la he ta’n.

³Mosi chu, lei chung ah mi zosia lak ah thunuaigol leh nunnem pen ahi.

⁴LALPA chun Mosi tawh, Aron leh Miriam kiang in, “La pathum un kikhopna biakbûk lam ah hungdok tiam un,” a tia. Tichun, amau pathum chu a vachia tau a.

⁵Chuleh, LALPA chu sûmpi khuam gual ah dingin a hung suk ah, biakbûk kotkhak ah chun a hung ding ah, Aron tawh Miriam a hun ko ah; amau teni chunle a nai phei ua.

⁶A kiang un, “Ka thu hi ngai un: La lak ua jawlneite a um lai un, kei LALPA hi a kiang un kilâkna’n ka vakilâk in; manglam in a kiang un thu ka gen sek a.

⁷Ka suak Mosi kiang in vang zia gual chun ka bawl puai; ama chu ka In sung mi zosia chung ah thuneina piak ahi.

⁸Thugûk le hilo ah kichian tak in, ama tawh kimaitua in ka kiho un, ama’n LALPA mêl chu a mu ta ahi. Bang ding ah ka suak Mosi gensiat chu lau lo la hiu em?” a tia.

⁹Chuleh, amau teni chung in LALPA lungnatna a kuangjak a; tichun, a nusia tai.

¹⁰Chun, biakbûk chung ah kipat sûmpi a kithial daw phatin, Miriam chu a hung phâk ta’n, vûk gual in a vâm ta mai a. Aron in Miriam lam a ngat phatin, a phâkna chu a mu tai.

¹¹Ziaphatchun, Aron in Mosi kiang in, “Aw he pu, ngolhuai tak ah thil ka la bawl khial tâk ziak un, ka bawlkhialnau ziak in ei gawt kin la;

¹²Miriam hi a nu sung ah a thisa piang ah, a taksa le a kimkhat nêkzawsa hung piangdokte gual in umsak kin,” a tia.

¹³Tichun, Mosi chun LALPA a ko ta’n, “Aw Pathian, lungsiat tak in ama hi hi’dam in,” a tia.

¹⁴Ahi’n, LALPA chun Mosi kiang in, “A pa’n a maichang ah chil a sek khum mai mai hilehle, ni sagi sung bêk jachâkna thuak lo ding a hem? Miriam hi giamun pawlam ah ni sagi bêk nawdaw hihen la, ziazaw chuleh pui lût kit hi hen,” a hun tia.

¹⁵Miriam chu giamun pawlam ah ni sagi sung nawdaw in a um ta’n; Miriam lâk lut ahi’kit masia mipite chu a kipandok kit tadi puau hi.

¹⁶Ziazaw chun, mipite chu Hazeroth ah kipandok in, Paran gamthip in a giak malam tau ahi.