Read Vaiphei KISIMNA LEKHABU 13 Bible Online

KISIMNA LEKHABU 13 - Vaiphei bible

KISIMNA LEKHABU 13

¹LALPA chun Mosi kiang in:

²“Keima’n Israelte ka piakna Kanaan gam entha dingin, a phung tin ua kipat a luchang chiat uh, phung khat lak ah mi pakhat chiat têldok inla, sawl in,” a tia.

³Tichun, Mosi chun LALPA thupiak gual in, Israelte lakah luchang chiat chu Paran gamthip ah kipat in a sawldok tai.

⁴A min uh chu ziate hi a hiu: Reuben phung ah kipat Zakur chapa Shammua;

⁵Simeon phung ah kipat Hori chapa Shaphat;

⁶Judah phung ah kipat Jephuneh chapa Kaleb;

⁷Issakhar phung ah kipat Joseph chapa I gâl;

⁸Ephraim phung ah kipat Nun chapa Hoshea;

⁹Benjamin phung ah kipat Raphu chapa Palti;

¹⁰Zebulun phung ah kipat Sodi chapa Gaddiel;

¹¹Joseph phung ah kipat (zia chu Manasseh phung ah kipat ti’na ahi) Susi chapa Gaddi;

¹²Dan phung ah kipat Gemalli chapa Ammiel;

¹³Asher phung ah kipat Mikael chapa Sethur;

¹⁴Naphtali phung ah kipat Vophsi chapa Nahbi;

¹⁵Gad phung ah kipat Makhi chapa Geuel ahi.

¹⁶Zia sia hi a gam entha ding ah Mosi’n a sawldawte chu a hiu a. Chun, Mosi’n a lak ua Nun chapa Hoshea min chu Joshua in a then piak a.

¹⁷Amau cheng hi Mosi chun Kanaan gam vaentha ding ah a sawldawte chu a hiu ah; a kiang un, “Negeb lam ah chia to unla, tânggam ah kal to pek unla;

¹⁸bang gual gam a hem ti en unla; chuleh, a gam ah chêng mite chu mihat a hiu leh hilo, a tam leh tawm dan uh,

¹⁹a chênnau gam phat leh siat, a chênnau khawpite chule kulbâng det nei a hem nei lo;

²⁰chuleh, a gam chu lei pha a hem sia, ti leh, thing kek a hem kek lo tite vaentha unla; hangsan tak in pang unla, a gam ah theiga bang jat a hem le la hun puak ding uh ahi,” ti’n a hil ah. Zia hun chu grep theiga masate min hun ahi.

²¹Tichun, Zin gamthip ah kipat chia to in, Lebo-hamath kiang ah Rehob tiang in a vaentha tau a.

²²Negeb zuan in a chia to ua, Hebron a tung un; zia tak ah chun Anak mite Ahiman, Sheshai tawh Talmaite a la chêng un. (Hebron chu Aigupta gam ah Zoan khua sâng ah kum sagi ah um masa zaw ahi.)

²³Chuleh, gam enthate chu Eshkol phâiguam a hung tung un, zia tak ah chun grep ga bawk khat bep a hun lo un, mol in mi pani’n a hun zawn ua. Theibufai tawh theipi ga bang jat a hem le a hun puau a.

²⁴Zia mun chu Eshkol phâiguam a sak un; zia mun ah chun Israelte’n grep ga bawk khat a hun law malam ziak uh ahi.

²⁵Ni sawmli sung gam a et nung un a hung kit tau a;

²⁶gam entha chiate chun Kadesh mun, Paran gamthip ah chun Mosi tawh, Aron tawh, Israelte zosia kiang in thu a hun tut kit tau a; a gam ah theigate chule a etsak un.

²⁷Amau chun, “Lei sawlnau gam chun ka vachiau ah, a gam chu a pha ma ma ziang ah, bawngnawi leh khuaizu luanna gam ahi ngei ah, ziate hile a gam ah theigate chu ahi;

²⁸ahiziakin, a gam ah chêngte chu mihat tak takte a hiu ah, a khawpiteu chule lian tak tak leh kul ah ki-ûmchak ngen ahi; chuleh, zia gam ah chun Anak suan leh pâkte chule ka muu hi.

²⁹Negeb lam ah chun Amalekte a chêng un, tânggam ah Hitte, Jebuste leh Amorte a chêng un, tuisuagiat pâm leh Jordan dung ah chun Kanaan mite a chêng ui,” a tiu a.

³⁰Ahi’nla, Kaleb in Mosi ma-âng ah chun mipite chu a thipsak ah, a kiang un, “Tu ma ma hin kuan to ngâl hitiu in, valua ziang hi tiu; a gam chu la zo ngei ngei ding I hi’ngâl un,” a tia.

³¹Ziaphatchun, a kitonpite chun a kiang in, “Zia gam ah mite chu do dingin kuan ngam puai tiu, ei haw sâng in a hatzaw ma ma ngâl un,” a tiu a.

³²Tichun, Israelte kiang in a gam etthâknau chungchâng thu lungthuai um tak in thu a tut kit tau ah, a kiang un, “Ka gam vaet thâk uh chu a gam ah chêngte ne zo ziang sek gam ahi; chuleh, a gam ah chêng ka vamuu haw chu milian chi ngen a hiu a.

³³Zia tak ah chun, Nephilim suante (Anakte chu Nephilim suante a hiu ah) chule ka vamuu ah; amau lak ah chun khaubepi gual bep in ka kilang un, amau â dingin zia gual khop ah neu ah chun ka um mai ui,” a tiu a.