Read Vaiphei KISIMNA LEKHABU 14 Bible Online

KISIMNA LEKHABU 14 - Vaiphei bible

KISIMNA LEKHABU 14

¹Chun, mipi zosia chu ngai tak in a kiko ua, jan khua’n a kap tau a.

²Israelte zosia chu Mosi tawh Aron chung in a phun tau a; a leng un, “Aigupta gam ah khan a la thi ziang kha hizawleu hin phazaw gamcheng ding hive’n! ahiloleh, zia gamthip ah hin kithi ziang zaw mai leh!

³Mite chemjam ah thi ding bep ah bang ding ah LALPA‘n ei la puidaw a hi tam? I ji leh chateu chu mi gâl anchâk ah a pan sâng un, Aigupta gam lam ah chia kit ziang leu hin phazaw ma ma lo ding a hem?” a tiu a.

⁴Tichun, “I hotu ding uh têl hitiu in, Aigupta gam lam ah chia kit mai hitiu,” a ti sau sau tau a.

⁵Ziaphatchun, Mosi tawh Aron chu Israel mipite âng ah chun a bokkhup tau a.

⁶Chuleh, gam entha’ vachiate lak ah pang, Nun chapa Joshua tawh, Jephuneh chapa Kaleb chunle a puanâkteu a bot thêk un;

⁷Israel mipite kiang in, “Ka va etthâknau gam chu gampha tawp ahi.

⁸I chung ua LALPA a lungdam nâk chun, zia gam chu ei pui lût intin, gampha ma ma, khuaizu leh bawngnawi luanna gam chu ei pia ding ahi.

⁹LALPA do in hel dâ phot unla; chuleh, a gam ah chêngte chule lau kiu in; ei uh â ding ah anchâk bep ahi ngâl un; amau venbitna chu lâkdaw a hita’n, LALPA‘n ei haw ei umpi hi; amau chu lau him him kiu in,” a tiu a.

¹⁰Himaleh, mipi zosia chun, amau teni suang ah sêlup a gaw tau a. Ziaphatchun, Israelte zosia mu ah kikhopna biakbûk chung ah chun LALPA lopina a hung kilang ta’n.

¹¹Chun, LALPA chun Mosi kiang in, “Zia mite hin ei musit tak ah bang chan um ding a hiu em? A lak ua teptênate bang jat ka bawl ah le ei taksang nai diak lo ding a hiu maw?

¹²Keima’n zia mite hi thi’na hîpi’n hun gawt ing ka tin, suan leh pâk bei in siam ing ka; nangma vang amau sâng ah nam lianzaw leh hatzaw’n hun siam ding ka hi,” a tia.

¹³Himaleh, Mosi chun LALPA kiang in, “Chutileh, Aigupta mite’n hun hia’n tiu in, nangma thahâtna’n amau lak ah kipat in zia mipite hi la la puidok a;

¹⁴chuleh, zia gam ah chêngte hi a la hilsawn ding a hiu a. Aw LALPA, zia mipite lak ah hin nangma la um hi ti a he ta’ngâl un; aw LALPA, nangma’n sûn ah sûmpi leh jan ah meipi la pui lai ah, a chung ua sûmpi khuam gual ah la din lai khan, kimaitua in a hun mu ta’ngâl un;

¹⁵tu’hin, zia mipite hi a leng ua thakhat ah la thagam ziang leh vang, namtin lak ah mi, la thilbawl dan a la he’khasa zosia’n,

¹⁶‘LALPA‘n zia mipite hi amau â ding ah a tiamna gam ah a pui lût thei lo ziakin, gamthip mun ah a thagam ahi,’ ti chiat ding a hiu.

¹⁷Ziaziakchun, tu’hin LALPA, la thilhitheina chu ka kiang ua la tiamsa dungzui in lian hen la, nang in:

¹⁸‘Kei LALPA la Pathian uh hi, lungna vak ziang lo, lungniang leh hepina dim, thiamlona leh bawlkhialna zosia ngaidam ah, a hiziak ah thiamlonate hemil ziang ngai lo, pate thiamlona le chate chung ah, khang thumna leh khang li’na tiang ah, a tu a chateu tiang ah phuba la ziang ka hi,’ la ti ta ngâl a.

¹⁹La ngilneina nasat dungzui in, zia mipite thiamlona hi ngaidam in la, Aigupta gam ah kipat la puidaw ah kipat tu’ni tiang ah la ngaidam zing gual ah hin,” ti’n a don tai.

²⁰Ziaphatchun, LALPA‘n, la dot gual ngei in ka ngaidam tai;

²¹ahi’n la, ka hin zing gual ah, khawvel pumpi hi LALPA lopina dim ding ahi chun:

²²Aigupta gam tawh, zia gamthip ah ka lopina tawh ka tepte’na bawl zosia mu ta ngâl ah, sawmvei hial ei patep kit nalai ah, ka thu ngai diaklote zosia chu,

²³a pu leh pateu kiang ah piak ka la tiamsa gam chu pakhat chan le mu lo ding a hiu; chuleh, bangma ei ngai lo zosia’nle mu lo ding a hiu.

²⁴Himaleh, ka suak Kaleb hi vang, thagau chuam nei ah, a lunggil zosia ei zui ziakin, a vaetthâkna gam ah pui tung ing ka tin, a suan leh pâkte’n zia gam chu lua in au.

²⁵Tu’hin, Amalekte tawh, Kanaan mite chu phâijawl ah a chên ziak un, jing leh Tuipi San zotna lam ah kihei in, gamthip lam zuan in kipandok tau in, a tia.

²⁶Chun, LALPA chun Mosi tawh Aron kiang in zia gual hin a gen a:

²⁷Zia tak ah migilo pungkhawmte hi ka chung ah bang chan phunchiak ding a hiu em? Israelte phunchiakna, ka chung ah a phunchiaknau ngei chu ka he ta ngâl a.

²⁸A kiang un zia gual hin gen in: “Keima LALPA ka hin zing gual in, ka nakhang in a het ah la gen gual ngei un, hun hi piak ngei ngei ding ka hi;

²⁹zia gamthip ah hin la luang uh muatden intin; kisimna pang, la lak ua kum sawmni ah kipat chung lam mi cheng ka chung ah phunchiak zosia kha,

³⁰Jephuneh chapa Kaleb tawh, Nun chapa Joshua tilo ngâl, a dang khat chale la chênna ding ua ka tiamna gam chu lut lo ding la hiu.

³¹Ahi’n, la chasenteu, gâl anchâk ding bep a hiu la tiu haw kha, keima’n pui tung ding ka hi, nang un bangma lo ah la gêl uh gam chu amau chang ta’n au.

³²Nanghaw vang, la luang uh zia gamthip ah hin mangthai gam ta’n lau.

³³La ginumlonau ziakin la chateu chu gamthip ah hin kum sawmli sung vâkvai malam in au.

³⁴Gam etthâkna hun la suklût uh ni sawmli dungzui in, ni khat chu kum khat ah sim hi’ntin, la gitlo man uh kum sawmli la puak diu ahi; chutichun, ka lungawi lo dan tak chu he ta’n lau,” a tia.

³⁵Keima LALPA chun ka gen ta’n, ei do ding ah migilo pungkhawmte chung ah hin zia gual ah chun bawl ngei ngei ding ka hi; zia gamthip ah hin mangthai gam in, thi sik sek ding la hiu, ti in.

³⁶Chun, Mosi’n gam entha ding ah a sawlte a hung kile’kit phat ua, a gam umdan a hilo lam ngen ah gensawn ah, Mosi chung ah mipi phunchiaksak mite,

³⁷a gam etthâknau chungchâng ah thu phalo pawlutte zosia chu, LALPA ma-âng ah thi’na hipi chi khat in a thi zo tau a.

³⁸Himaleh, gam entha ding ah kuante lak ah Nun chapa Joshua tawh, Jephuneh chapa Kaleb teni bepcha a dam tau hi.

³⁹Mosi’n zia thu chu Israelte zosia lak ah a gendaw phatin, mipite chu nasa tak in a patau tau a.

⁴⁰Jingkal matak ah tho in, tânggam lam ah, tângsâng ah kal to in, “Zia tak hin ka um ui, LALPA‘n ei tiam gam ah chia to ka nuam ui, ka la bawlkhial ta ngâl un,” a tiu a.

⁴¹Ahi’n, Mosi’n, “Bang ding ah LALPA thupiak botsia nalai lai la hiu em? Zia chung thu ah hin lawting lo ding la hiu.

⁴²Chia to kiu in, LALPA‘n a hun umpi paw’ngâl ah; la mêlmateu thagam mai dingin kipe ziang kiu in.

⁴³Amalekte tawh Kanaan mite chun a la do ding a hiu in, a chemjam ua thi mai ding la hi’ngâl un; LALPA la kiheimangsan tâk ziak un, LALPA‘n le hun umpi talo ding ahi,” a tia.

⁴⁴Mosi tawh LALPA thuthung thingkuang chun giamun pawtsan lo maleh, tânggam ah tângsâng tak tak ah kal to tei tei a guau a.

⁴⁵Ziaphatchun, tâng gam ah chêng Amalekte tawh Kanaan mite hung kuan suk in, a hung do ua, a zo tau a; Hormah tiang in a hung del mang tau hi.