Read Vaiphei KISIMNA LEKHABU 15 Bible Online

KISIMNA LEKHABU 15 - Vaiphei bible

KISIMNA LEKHABU 15

¹LALPA chun Mosi kiang ah zia gual hin a gen a:

²Israelte kiang in zia gual hin gen in: La chênna ding ua ka hun piakna gam chu la tun phat uh leh,

³LALPA kiang ah mei ah thillat la bawl uh chu, thutiam bukimna hâlmang thillat hi hen la, nangmau kiphalna dungzui ah thillat kithoina ding ahi inle, kût ni kiguat dungzui ah thillat kithoina ding hiziang maleh, LALPA â ding ah gimtui a hi’theina dingin, bawng hon lak a hem, belam hon lak leh kêl hon lak ah kipat in la piak ding uh ahi;

⁴Zia gual ah LALPA kiang ah thilpiak lân ding taphot chun, an thillat ding ah chângbuang nêl pha tak, a te’na Ephah dim khat a mun sawm ah khen a mun khat tawh, sathau te’na Hin dim khat, a mun li khen ah mun khat tawh hel in la lat khawm ding uh ahi.

⁵Chuleh, dawnchi thillat dingin, uain te’na Hin dim khat a munli khen a mun khat tawh, hâlmang thillat ding tawh kithoina dingin belamno khat chiat tawh kituak dingin la lat khawm ding uh ahi.

⁶Belamchal khat jel tawh changbuang thillat la lat khawm ding un, chângbuang nêl pha tak, a te’na Ephah dim khat a mun sawm ah khen a mun ni tawh, sathau te’na Hin khat mun thum ah khen a mun khat tawh helsa la lat khawm ding uh ahi;

⁷chuleh, dawnchi thillat dingin uain te’na Hin dim khat mun thum ah khen, a mun khat LALPA kiang ah gimtui dingin la lat khawm ding uh ahi.

⁸Chun, LALPA kiang ah la thutiam pitinna a hem leh kichamna ding ah kithoina ding ah bawngchal khat a hem la hun lat phat uh leh,

⁹zia bawngchal chu tawh changbuang thillat khawm dingin, chângbuang nêl pha tak, a te’na Ephah dim khat, a mun sawm ah khen a mun thum tawh, sathau a te’na Hin dim kimkhat tawh la hel ding uh ahi;

¹⁰LALPA kiang ah gimtui a hitheina dingin, dawnchi thillat la hun lat phat leh, uain te’na Hin dim khat chu mei ah la lat khawm ding ahi.

¹¹Zia gual chun, bawngchal khat a hem, belamchal khat a hem leh kêlno khat a hem chiat â dingin la bawl ding uh ahi.

¹²La thillat gancha a tawm leh a tam thu’n, gancha khat jel â ding ah zia gual ah chun la bawl ding ahi.

¹³Zia gual chiat chun, gam sung ah um Israel mi zosia’n LALPA kiang ah gimtui a hitheina ding ah, mei ah thillat la hun bawl chiat ding uh ahi.

¹⁴La gam ua gam dang mi chêngdente lak ah kua’nle LALPA kiang ah gimtui hiding ah, mei ah thillat bawl a nop phot uh chun, nang un la bawl gual gual un a bawl ding uh ahi.

¹⁵Mipi pung khawm zosia lak ah nang uh tawh, la lak ua gam dang mi chêngdente zosia’n, dan zui ding pakhat bep la nei ding uh ahi, zia dan chu la suan zosia tiang un, khang tin in a mat ding uh a hi; nang uh tawh la lak ua gam dang mi chêngdente hile la leng un LALPA âng ah kibang chiat la hi ding uh ahi ngâl a.

¹⁶Nanghaw tawh la lak ua nam dang chêngdente hin, dan thuguat pakhat leh chawn dan kibang ah la um ding uh ahi, ti in.

¹⁷Chun, LALPA chun Mosi kiang in zia gual hin a gen a:

¹⁸Israelte kiang in zia gual hin gen in: Nang uh ka piak ding gam chu la hung tun ua,

¹⁹a gam ah piang ga la nêksîn uh leh, LALPA kiang ah pei khat jel la piak sek ding uh ahi.

²⁰Anthak la nêksîn uh leh anbâk masa pen, vaithum tâng khat chu LALPA chanvo ding ah la piak sek ding uh ahi; buphual ah kipat la piak daw sek gual tho khan la piak ding uh ahi.

²¹La suan zosiau ah la anbâk masa pen uh chu LALPA â ding ah la piak zing ding uh ahi.

²²Ahi’nla, zia thupiak zosia, LALPA chun Mosi kiang ah a gente hi la zui noplo ua,

²³LALPA chun Mosi kiang ah thuthung a hun piak ni kipat, la khang la khang chan ua, LALPA thupiakte hi anep anawi ah la zui nop lo ua,

²⁴mipite’n a het lo kâl ua chanpal ah a la bawl khial khâk uh ahi chun, LALPA kiang ah gimtui kithoina dingin, mipi zosia chun bawngchal tuai khat tawh, changbuang thillat leh dawnchi thillat tawh, gitlo thoina ding ah kêlchal khat tawh a bawl ding dan gual un hâlmang thillat a bawl ding uh ahi.

²⁵Israel mipi zosia kitatna ding chu thiampu’n bawl ta’n tin; chanpal ah a la bawl khial uh ahi’n, LALPA kiang ah kithoina, mei ah kithoina a bawl tak uh leh, a la hi’khialnau kithoina ding LALPA kiang ah a hun chawi tâk ziak un ngaidam hita’n au.

²⁶Mipi zosia’n chanpal ah a la bawl khial a hiziak un, Israel mite zosia leh gam dang mi, a lak ua chêngdente zosia bawlkhialna chu ngaidam hita’n a.

²⁷Chuleh, mimal khat in chanpal in thil a la bawl khial khâk pal chun, a thil bawlkhial thoidamna dingin kêl lâ, kum khat ah upa pakhat a lat ding ahi.

²⁸Tichun, chanpal ah thil a la bawlkhialna, ngaidamna ding chun thiampu’n kithoina bawl intin, a het lo kâl ah, chanpal ah bawlkhial ahi ziakin, a bawlkhialna chu ngaidam hita’n a.

²⁹A gam sung mi Israel hileh, gam dang mi la lak ua chêngdente chun, chanpal ah thil bawl khial taphot in zia dan chu kibang tak in la zui gêl ding uh ahi.

³⁰Ahi’n la, a tup mawng ah thil bawl khial taphot chu, a gam sung mi hi hen la, gam dang mi a chêngdente lak ah kua hiziang taleh, LALPA chung ah gilo ahi tâk ziak un, a chipite lak ah kipat paithâk ngâl ding ahi.

³¹Zia gual mi chu LALPA thugen simmaw leh a thupiak botsia ahi ziakin, paithâk ngâl ding ahi; a gitlo man chu ama’n kipuak ta’n a.

³²Israelte gamthip ah a um lai ua khan, Sabbath ni’ thing pua pakhat a muu a.

³³A thing puak lai tak mu zosia chun ama chu Mosi tawh, Aron tawh, mipi zosia mai ah chun a hun pui tau a.

³⁴A chung ah bang gual ah bawl ding a hem ti a kichet masangsia suangkul in a khum tau a.

³⁵LALPA chun Mosi kiang in: “Zia mipa chu thalup ding ahi; mipi zosia’n giamun pawlam ah suang in a se’lup ding uh ahi,” a hun tia.

³⁶LALPA chun Mosi kiang ah thu a hun piak gual chun, mipi zosia’n ama chu giamun pawlam ah kaidok in, suang in a sep lum tau hi.

³⁷Chuleh, LALPA chun Mosi kiang in thu a hun gen a:

³⁸Israelte kiang ah zia gual hin gen in: A puanmong ning chiat un pat dum kihualpum a bawl chiat ding uh ahi; zia gual chun a khang a khang ua a bawl ding uh ahi.

³⁹Zia puanmong kihual chu la bawlphat si’n uh leh, nang uh â ding ah LALPA‘n thu a hun piak zosia la hetdawna ding uh leh, la zui ding uh a hi’dan la hiattheina ding uh hi’ntin; tichun, la lungthim un a doidan leh la mit un a dawi dan dan chu la bawl ziang lo ding uh ahi.

⁴⁰Tichun, ka thupiak zosia la het ua, la zui ua leh, la Pathian â dingin mithiangtho hizing ta’n lau.

⁴¹Keima LALPA la Pathian uh ka hi zing theina ding ah, Aigupta gam ah kipat hun puidokpa chu ka hi’n; Keima LALPA la Pathian uh chu ka hi.