Read Vaiphei KISIMNA LEKHABU 16 Bible Online

KISIMNA LEKHABU 16 - Vaiphei bible

KISIMNA LEKHABU 16

¹Izhar chapa Korah, Levi suan ah thiampu Kohath phung ah mi leh, Reuben phung ah Eliab chapate Dathan tawh, Peleth chapa On tawh kithua in,

²Israelte lak ah phung tin ah hotute, mipite lak ah kipat kitêldok, mi challang deu deu mi za ni leh sawmnga chu pui in, Mosi dodâl in a vapung khawm tau a.

³Mosi tawh Aron kilanpi dingin a pung khawm tau ah, amau teni kiang ah chun, “La kiphatsak talua tau hi! Mipi zosia hi a thiangtho un, mi tin hile a thiangtho chiat nau hi; chuleh, LALPA chu a lak un a um zing hi. Bang ding ah nang uh teni hi LALPA mipite sâng ah kikoisang zaw la hiu em?” a hung tiu a.

⁴Zia thu chu Mosi’n a het phat in, a mai ah leitual si’n a bokkhup ta’n,

⁵ziaphatchun, Mosi chun Korah tawh a lawite kiang in, “Jingkal kît leh LALPA‘n kua kua hi ama â a hia, kua pen hi a thiangtho ah, ama kiang ah lût thei ding chu a hem ti hun tâklang ding ahi; tichun, LALPA‘n a kitêldawte bep chu a kiang ah lût ding ah a phalte chu hi’n au.

⁶Zia gual hin bawl un: Korah tawh a lawite zosia’n gimtui hâlna kuangcha hun la unla;

⁷LALPA âng ah jing leh meiâm chung in gimtui koi un; tichun, LALPA‘n a hun têl pen pen chu a thiangtho hiding ahi. Nanghaw Levi suante hin, la thilbawl uh a vâl talua tai!” ti’n a gen a.

⁸Tichun, Mosi chun Korah kiang in, “Nanghaw Levi chate haw, ka gen hi ngai un!

⁹Israelte Pathian in, LALPA biakbûk ah na sêm ding leh mipite sik leh jal ah tawi leh chan ding ah, mipi zosia lak ah kipat ah a hun koichuam hi bangma lo mai ah ngainêp la hiu em?

¹⁰Nang tawh la suapi, la kiang ah um Levi chate zosia a kiang nai ding ah a hun phalte hi, chutisapi’nle thiampu hi’na la dawi nalai uh maw?

¹¹Ziaziakchun, nang tawh la lawite zosia’n LALPA kãl dingin la pung khawm nalai un. Aron hi bang a hia, gensia nalai la hiu em?” a tia.

¹²Mosi chun Eliab chapa teni Dathan tawh Abiram chu a ko ah; ahi’n, amau chun, “Hung pua’ng kau!

¹³Nang in khuaizu leh bawngnawi ah luanna gam ah kipat lei puidok ah, tu’hin gamthip ah thagam ding lei gaw nalai sêt ah; chuleh, tu’hin ka chung un vai la hawm nâk lai hi thil neuthem leh bangma lo mai mai in la ngai nalai ah a hem?

¹⁴Khuaizu leh bawngnawi luanna gam ah ei pui lût ah, lou mun leh grep huan mun ding gam luasak ding ah lei puidaw ahi puai ti a kichian hi. Chuleh, zia mite zosia mit hi kheldaw piak ding la ti nâk lai a hem? Hung talojen ing kau!” ti’n a dawnhu tau a.

¹⁵A chung un Mosi a lungna ma ma ta’n, LALPA kiang in, “A thillat uh bang ma pom piak kin. A sabiltung uh khat chale ka lâkpiak kha pua’n, a lak ua mi pakhatle ka gentheisak kha diak puai,” a tia.

¹⁶Chun, Mosi chun Korah kiang in, “Jing leh la lawite mi za ni leh sawmngate tawh, nang tawh, Aron tawh Pathian âng ah la hung khawm ding uh ahi.

¹⁷Chuleh, la leng un gimtui hâlna kuang chawi chiat unla, gimtui buakkhum chiat unla; chuleh, LALPA âng ah gimtui hâlna kuang za ni leh sawmnga hun choi khawm un; chuleh, nang tawh Aron inle la gimtui hâlna kuang uh hun chawi un,” a tia.

¹⁸Tichun, mi tin in a gimtui hâlna kuang ua meiâm luak chiat in, a chung ah gimtui buak khum in, Mosi tawh Aron kiang ah kikhopna biakbûk kotbul in a hun chawi chiat tau a.

¹⁹Ziaphatchun, Korah in mipi chu kikhopna puanbûk kotkhak bul in a hun ko khawm ta’n. LALPA lopina chu mipi zosia ma âng ah chun a hung kilang ta mai a.

²⁰Chun, LALPA chun Mosi tawh Aron kiang in:

²¹“Zia mipi pung khawm zosia hi mitphet kâl sung bep ah ka hun thagam ziang theina dingin amau ah kipat hin a la kithialdok un,” a tia.

²²Ziaphatchun, a maichang ua leitual si hial ah bokkhup ah pauchap in: “Aw Pathian, taksaphe leh vo nei zosiate hinna Pathian, mi pakhat gitlona ziakin mipi zosia chung ah lungna ziang ding la hi em?” a tiu a.

²³Chun, LALPA chun Mosi kiang in:

²⁴Mipite kiang ah zia gual hin gen in: “Korah leh, Dathan tawh, Abiramte biakbûk ah kipat in kikoidok un,” ti’n, gen in;

²⁵tichun, Mosi a tho a, Dathan tawh, Abiram kiang in a chia ta’n. Chuleh, Israel upate chunle a zui tau a.

²⁶Mipite kiang ah chun, “Zia mi gilote biakbûk ah kipat hin jamdok unla, a bang mau le khoikha ki’un; achutiloleh, a gitlonau lak ah mangthai khawm mai ding la hiu,” a tia.

²⁷Tichun, Korah tawh, Dathan tawh, Abiram puanbûk ah kipat chun a hung jamdok tau a; chuleh, Korah tawh, Dathan tawh Abiram chule a ji leh a chateu cheng tawh a hung pawtdok ua, a puanbûk kotkhak bul chiat un a hung ding tau a.

²⁸Mosi’n a kiang un, “Zia hi keima lemsakna ziak hilo in, LALPA‘n zia thil zosia hi bawl ding ah ei sawl ahi ti la hiattheina ding ua a hun bawl chu ahi.

²⁹Zia mite hi mihing thi’dan pangai ah a thiu ah, midangte chung ah vangsiatna tung sek gual mai ah a chung ua a tun chun, LALPA‘n ei sawl lo hi mai in a.

³⁰Ahi’n, LALPA‘n thil khat a hun bawl ah, lei in a kam a hun kât ah, ziate hi a nei zosiau tawh, a hingsan ua Sheol ah a val lut ziang chun, zia mite hin LALPA a la musit tak tak nau ti, kichian tak in he ta’n lau,” a tia.

³¹Zia thute chu a gen zaw phatin, a nuai uh leitual chu a hung kiphelsua a.

³²Lei in a kam a hun kâ, a Inkuan un, Korah mite leh a nei thil zosiau chu tawh a val zo tai.

³³Tichun, amau tawh, a nei zosiau pum in, a hingsan un Sheol ah a tum mang zo tau ah; lei in a kam a chi’pkhum kit ta’n; tichun, mipite lak ah kipat in a mangthai tau a.

³⁴A kîmvêl ua Israel um zosia chule lau in: “Ei hawle ei val khâ’n ah,” ti ah kiko in, a jam jak tau a.

³⁵Chun, LALPA ah kipat meikuang a hung pawt ah; zia chun gimtui lân ah um mi za ni leh sawmngate chule a hun kâng tum tai.

³⁶Ziaphatchun, LALPA chun Mosi kiang in:

³⁷“Thiampu Aron chapa Eleazar kiang a meikuang lak ah gimtui hâlna kuangchate ladok ah, meikuangte chu gam tin ah thejak dingin hil in,” a tia.

³⁸Zia gimtui hâlna kuangchate hi amau hinna tawh kitheng ta ahiziak in a thiangtho ta’ngâl a. LALPA âng ah a la lat thiantho uh ahi tâk ziakin, mâichâm chungkhû dingin sêk in; tichun, Israelte â ding ah tepte’na hizing ta’n a, a tia.

³⁹Tichun, mei in a kat tum tâk gimtuite hâlna kuangchate chu thiampu Eleazar in a lakhawm ah; mâichâm chungkhû ding kuangdal in a sêk tau a.

⁴⁰Israelte â ding ah tepte zing dingin, Aron suante hilo nam dang him him in, LALPA ma ah gimtui hâl ding ah a hun nailona ding un; LALPA chun Mosi kiang ah a la gen tâk gual in, zia gual ah bawl kit a um chun, Korah leh a lawite gual ah a manthailona ding un.

⁴¹A jing phatin, Israelte zosia chu Mosi tawh Aron chung in a phunchiak tau a: “LALPA mite la that ui,” a tiu a.

⁴²Mosi tawh Aron dem ah phunchiak zosia a kikhop phat un, Mosi tawh Aron in kikhopna biakbûk lam a ngau ah; chuleh, sûmpi’n hun tuam in, LALPA lopina chu a hung kilang tai.

⁴³Chuleh, Mosi tawh Aron chu kikhopna biakbûk mai ah chun a hung tau a;

⁴⁴LALPA chun Mosi kiang in:

⁴⁵“Zia mipite hi mitphet kâl sung bep ah ka hi’mangthai theina dingin a lak ua kipat hung pawt mang un,” a hun tia. Chun, a mai ua lei tual si’n a bokkhup tau a.

⁴⁶Mosi chun Aron kiang in, “La gimtui hâlna kuang khan mâichâm ah kipat meiâm luak inla, gimtui buak khum inla, mipite kiang lam ah kin tak in chawi in; a gitlonau thoidamna ding bawl piak kin in, LALPA ah kipat in lungnatna a pawt ta’n, thi’na hisia a leng pan tai,” a tia.

⁴⁷Aron inle Mosi thupiak gual in a la’n, mipite lak in a tai lut ah, mipite lak ah chun thi’na hisia chu a la kipan ta’n. Gimtui a hâl ah, mipite thoidamna ding a bawl tai.

⁴⁸A hing nalaite tawh a thisate kikâl ah chun a ding ah; thi’na hisia chu a tâng tai.

⁴⁹Korah chung thu ah thite sim lo in, zia thi’na hisia ziak a thi zosia chu sîng khat sang li leh za sagi a hiu.

⁵⁰Thi’na hisia a chawl phatin, Aron chu kikhopna biakbûk kotkhak bul lam ah Mosi kiang in a kile’kit tai.