Read Vaiphei KISIMNA LEKHABU 17 Bible Online

KISIMNA LEKHABU 17 - Vaiphei bible

KISIMNA LEKHABU 17

¹LALPA chun Mosi kiang in:

²“Israelte kiang ah gen inla, a phung tin ua luchangte chiat lak ah kipat in, phung tin ah kipat tiangkhut pakhat chiat tiangkhut sawm leh ni hun lakhawm in. Amau min chu a tiangkhut un zik piak chiat inla;

³Levi phungte tiangkhut ah chun Aron min zik in; phung tin luchang â dingin tiangkhut pakhat chiat hiding ahiziak in.

⁴Tiangkhut zosia chu kikhopna biakbûk sung ah, nangma ka hun kituakpi sekna mun, thuthung thingkuang mai ah chun koi in.

⁵Chuleh, keima’n ka têl penpa tiangkhut chu hung seldok ding ahi; tichun, Israelte la chung ah a phunchiak zing ziang nau hi hi’bei ding ka hi,” a tia.

⁶Mosi’n zia thu chu Israelte kiang in a gen ta’n; tichun, a phung tin ua kipat luchangte chun tiangkhut pakhat chiat, tiangkhut sawm leh pani chu a hun lakhawm tau ah; ziate lak ah chun Aron tiangkhut le a pang hi.

⁷Tichun, tiangkhutte chu kikhopna biakbûk sung ah thuthung thingkuang mai ah, LALPA ma-âng ah chun a koi tau a.

⁸A jing ah Mosi chu thuthung umna biakbûk sung a lût phatin, Levi phungte â ding ah kikoi, Aron tiangkhut chu a la seldok ta’n. A sel chu a la piting in, vaisuaklu min a la ga ta mai ah!

⁹Tichun, Mosi chun LALPA âng ah tiangkhut kikoi zosia chu Israelte zosia ma-âng in a hun ladok ah; mi tin in a tiangkhut chiat uh a kilâk tau a.

¹⁰Chuleh, LALPA chun Mosi kiang in: “Aron tiangkhut kha helmangte vauhilna ding leh, ka chung ah a phunchiaknau ziak ah ka thi saklona ding ah, a phunnau beisakna dingin, thuthung thingkuang mai ah chun koi in,” a tia.

¹¹Zia gual chun, Mosi’n a bawl ta’n: LALPA‘n a bawl ding dan thu a piak gual in a bawl tai.

¹²Israelte chun Mosi kiang in, “A chavai gam chu ka hitau hi; a thi mang zo ding chu ka hitau in, ka leng un a mangthai zo chu ka hitau!

¹³LALPA biakbûk mai ah chia tapo thi ding ahi. Ka leng ua thi mang zo mai ding ka hiu em?” a tiu a.