Read Vaiphei KISIMNA LEKHABU 18 Bible Online

KISIMNA LEKHABU 18 - Vaiphei bible

KISIMNA LEKHABU 18

¹LALPA chun Aron kiang in: “Nangma tawh, la chapate tawh, la suan zosia’n mun thiangtho ah bawlkhialna maw zosia pua’n la tiu in; nangma tawh, la chapate bep in thiampu’na la sepnau ah bawlkhialna maw zosia chu la puak ding uh ahi.

²Levi phung ah mi, la suapite chule pui inla, thuthung koina biakbûk ma-âng ah nang tawh, la chapate’n la sep leh bawl a hun kithuapiu ah, la son theina ding un.

³Nangma sep ding zosia tawh, biakbûk ah sep leh bawl ding cheng chu a maw la puak ding uh ahi. Ahi’n, mun thiangtho ah ûm leh bêl tawh, mâichâm chu vang a sukkhak lo diu ahi; achutiloleh, amau hileh, nang natiang in thi khawlaw ding la hiu.

⁴Amau chun kikhopna biakbûk ah, sep leh bawl ding zosia sêm ding ah maw a puak theina ding un la umpi zing ding ahi; pawlam mi him him in a hun kithuapi lo ding uh ahi.

⁵Israelte chung ah ka lungnatna a puanjak kît lona dingin, nangma ngei ngei in mun thiangtho ah sep leh bawlte leh, mâichâm ah sep leh bawlte chu la mawpuak ding ahi.

⁶Israelte lak ah kipat la suapi Levite têldok chu keima ka hi; LALPA â ding ah kilân thiangtho, nang uh hun kipia, kikhopna biakbûk ah sep leh bawl ah la matchâk dingte chu a hiu.

⁷Himaleh, mâichâm leh puanjak nung lam ah thiampu nasep zosia chu nang leh la chapate kithua in la sêm ding uh ahi. Thiampu na hi thilpiak gual ah ka hun piak la hiu; pawlam mi a hun nai kha a um leh thalup ding ahi,” a tia.

⁸LALPA chun Aron kiang in: Israelte thilpiak thiangtho zosia leh, ka kiang ah a thillat zosiau chu, nangma ka hun piak la hi tai; tichun, nangma tawh la chapate zosia’n la kumkhaw go ding ua thiampu chantum ding ah ka hun piak ahi.

⁹Mei ah kihâl tum lak ah pang lo, thilzek thiangthote lak ah ziate hi nang uh chantum ding ahi: Ka kiang ah thilzek thiangtho pen ah a hun lat zosiau, thâi thillat hitaleh, gitlo thoina thillat a hem leh bawl khial thoina hitaleh, zia zosia chu nang tawh la chapate â ding ah piak la hiu.

¹⁰Ziate chu mun thiangtho ah, pawsal cheng in la nêk ding uh ahi’n; nang uh â ding ah thilzek thiangtho ahi.

¹¹La chantum ding ua, Israelte pei thillat kikoidok taphot chu tawh ka hun piak la hi tai; la In sung mi a thiangtho zosia’n zia chu la nêk ding uh ahi.

¹²Sathau lak ah a phapen leh, uain lak leh changbuang lak ah a phapen chiat leh, LALPA kiang ah piak ding ah doichuam kila khawm zosia chu, nang uh ka hun piak la hiu.

¹³Chuleh, a gam ua ga masa zosia lak ah LALPA kiang ah piak ding ah a hun choikhawm taphot uh chu nang uh â ding ahi; la In sung mi a thiangtho zosia tawh zia chu la nêk diu ahi.

¹⁴Israelte thil koichuam taphot chu nang uh â ding ahi.

¹⁵Hinna nei zosia lak ah sûlhong masa pen, mihing hileh, gancha hileh LALPA kiang ah kilândok taphot chu nang uh chantum hi’ngâl intin; ahi’n, mihing naulutîl taphot chu la tat diu ahi’n; gancha lak ah sathiangtho taphot chule la tat ding uh ahi.

¹⁶A kitatna man ding chu, tha khat mi chu mun thiangtho ah dangka kimang shekel nga (zia chu gerah sawmni ahi) in bithiak in la tat ding uh ahi.

¹⁷Ahi’n la, bawngno a hem, belamno a hem leh kêlno a hem lak ah a suak masa pen chiat chu la tat lo ding uh ahi; ziate hi a thiangtho bîkte chu a hiu ah, a thisan uh mâichâm ah la tât ah, a thau uh le LALPA kiang ah gimtui thillat a hitheina dingin mei ah la hâltum ding uh ahi;

¹⁸a îk leh a changlam dâk nangma chanvo ahi gual tho in, a saphe zosia le nang â ding ahi.

¹⁹Israelte’n kithoina thiangtho LALPA kiang ah a lat zosiau chu, nang tawh la chate zosia’n kumkhua la chanvo ding ua ka piak la hi tau hi; zia chu LALPA ma-âng ah nang tawh la suante zosia â ding ah chi ah kitiamna, kumtuang thuthung kibawl chu ahi.

²⁰Chuleh, LALPA chun Aron kiang in, “A gam kihopnau ah hin nang in gam nei pua’n la tin, a lak un bangma la chan lo ding ahi; Israelte lak ah hin keima hi la chanvo leh la gochan chu ka hi,” a tia.

²¹Chuleh, Levite zosia chu kikhopna biakbûk ah nasep thilbawl bangkim ah a panna ziak un, Israelte lak ah kipat a sawm ah khat zosiau ka pia ahi;

²²tu’ kipat hin Israelte’n kikhopna biakbûk a hun nai lo ding uh ahi; achutiloleh, sual mawpua’n thi mai ding a hiu.

²³Levite’n kikhopna biakbûk na zosia sêm intiu in, a thiamlonau chu amau in a kipuak ding uh ahi; zia hi a khang a khang ah la suanteu tiang ah a chantum ding uh chu ahi. Israelte lak ah kipat in vang gam chan nei pua’n au;

²⁴Israelte chun LALPA kiang ah a sawm ah khat piak zosiau leh LALPA â ding ah thillat a koichuam zosiau chu, amau gochan dingin ka pedok ta ngâl a. Ziaziakchun, Israelte lak ah kipat in gambung chantum a nei lo ding uh ahi ka la ti ta ahi kha, a tia.

²⁵Chun, LALPA chun Mosi kiang in:

²⁶Levi chite kiang ah zia gual hin gen in: La gochan ding ua ka hun piak, Israelte a sawm ah khat lak ua kipat a sawm ah khat ma, LALPA â ding ah la latdaw kit ding uh ahi.

²⁷Zia la thilpiak uh chu buphual ah kipat leh, uain hêkna khûk ah kipat la piak gual un pom piak ding ka hi.

²⁸Tichun, Israelte lak ah kipat a sawm ah khat uh la mu zosiau chu, LALPA kiang ah la thillat ding un la koichuam ding uh ahi; LALPA kiang ah la thillat uh chu thiampu Aron kiang ah la pediu ahi.

²⁹La thilchan zosiau lak ah kipat in, a pha pente chu LALPA kiang ah piak dingin la koichuam ding uh ahi.

³⁰Chuleh, a kiang un, “Nang un a pha pente la koidok zaw phat u leh, a dang cheng chu Levi chite â ding ah buphual ah kipat a hun piak gual leh grep hêkna khûk ah kipat uain a piak gual un pom piak hiding ahi, ti le la gen ding ahi,” a tia.

³¹Ziate chu nang tawh la In sung mite’n khoi tak mun inle nethei ta’n lau; zia chu kikhopna biakbûk ah la nasep man ding ua hun kipia ahi ta’ngâl a.

³²A phapen chu la piak zaw tâk ziak un, la nêknau ah chun thiamlo chang ta pua’n lau. Ahi’n, Israelte thilpiak thiangthote chu la hi’buak lo diu ahi; achutiloleh, hun thatlum kha ding ka hi, ti’n a tia.