Read Vaiphei KISIMNA LEKHABU 2 Bible Online

KISIMNA LEKHABU 2 - Vaiphei bible

KISIMNA LEKHABU 2

¹LALPA chun Mosi tawh Aron kiang in zia gual hin a gen a:

²Israel chate’n giamun a siam phat uh leh, a pawl pawl in, amau phung puanlap nuai chiat in a giak ding uh ahi; kikhopna biakbûk lam nga chiat in a kitian kual ding uh ahi.

³Sualam, nisa sua’na lamkai ah chun Judah phung ah mite’n, a pawl pawl in giamun a bawl diu ahi. Judah phung ah lamkai ding chu Amminadab chapa Nahshon hi’ntin,

⁴a kaihuai ding ah min kizik lut sîng sagi sang li leh za guk tawh hi’n au.

⁵Amau ban ah giamun lua ding chu Issakhar phungte hi’n au, Issakhar phung ah lamkai ding chu Zuar chapa Nethanel hi’ntin;

⁶a kaihuai ding ah min kizik lut sîng nga sang li leh za li tawh hi’n au.

⁷A ban ah Zebulun phungte hi’ntin; Zebulun phung ah lamkai ding chu Helon chapa Eliab hi’ntin;

⁸a kaihuai ding ah min kizik lut sîng nga sang sagi leh za li tawh hi’n au.

⁹Judah giamun ah um ding ah a min kizik lut zosia chu nuai khat sîng giat sang guk leh za li a hiu ah. A kiton phat uh leh a mapui ah a pan diu ahi.

¹⁰Simlam kâi chu Reuben phung ah mite’n, a pawl pawl in giamun a bawl diu ahi. Reuben phung ah lamkai ding chu Shedeur chapa Elizur hi’ntin;

¹¹a kaihuai ding ah min kizik lut sîng li sang guk leh za nga tawh hi’n au.

¹²Chuleh, amau bân ah giamun lua ding chu Simeon phung ah mite hi’n au. Simeon phung ah lamkai ding chu Zurishaddai chapa Shelumiel hi’ntin;

¹³a kaihuai ding ah min kizik lut sîng nga sang kua leh za thum tawh hi’n au.

¹⁴A bân ah chun Gad phung ah mite hi’ntin; Gad phung ah lamkai ding chu Reuel chapa Eliasaph hi’ntin;

¹⁵a kaihuai ding ah min kizik lut sîng li sang nga za guk leh sawmnga tawh hi’n au.

¹⁶Reuben giamun ah um ding ah min kizik lut zosia chu a leng un nuai khat sîng nga sang khat za li leh sawmnga a hiu ah. A kiton phat uh leh amau hi a pawl nina’n a pan diu ahi.

¹⁷Kikhopna biakbûk tawh Levite giamun chu a lailung ah a um ding uh ahi; a kichawn phat uh leh le a giamun kitian dan dungzui un, amau mun chiat ah, a pawl pawl in a kiton diu ahi.

¹⁸Tum lam kâi ah chun Ephraim phung ah mite’n, amau pawl dungzui in giamun a siam diu ahi. Ephraim phung ah mite lamkai ding chu Amminadab chapa Elishama hi’ntin;

¹⁹a kaihuai ding ah min kizik lut sîng li leh za nga tawh hi’n au.

²⁰Amau bân ah chun Manasseh phung ah mite hi’n au; Manasseh phung ah mite lamkai ding chu Pedahzur chapa Gamaliel hi’ntin;

²¹a kaihuai ding ah min kizik lut sîng thum sang ni leh za ni tawh hi’n au.

²²Amau bân ah chun Benjamin phung ah mite hi’ntin; Benjamin phung ah mite lamkai ding chu Gideoni chapa Abidan hi’ntin;

²³a kaihuai ding ah min kizik lut sîng thum sang nga leh za li tawh hi’n au.

²⁴Ephraim giamun ah um ding ah min kizik lut zosia chu a leng un, nuai khat sang giat leh za khat a hiu ah. A kiton phat uh leh a pawl thumna a pan diu ahi.

²⁵Mallam kâi ah chun Dan phung ah mite’n, amau pawl dungzui chiat in giamun a siam ding uh ahi. Dan phung ah mite lamkai ding chu Ammishaddai chapa Ahiezer hi’ntin;

²⁶a kaihuai ding ah min kizik lut sîng guk sang ni leh za sagi tawh hi’n au.

²⁷Amau bân ah giamun lua ding chu, Asher phung ah mite hi’n au. Asher phung ah mite lamkai ding chu Okran chapa Pagiel hi’ntin;

²⁸a kaihuai ding ah min kizik lut sîng li sang khat leh za nga tawh hi’n au.

²⁹A bân in Naphtali phung ah mite hi’n au. Naphtali phung ah mite lamkai ding chu Enan chapa Ahira hi’n tin;

³⁰a kaihuai ding ah min kizik lut sîng nga sang thum leh za li tawh hi’n au.

³¹Dan giamun ah um ding ah min kizik lut zosia chu a leng un, nuai khat sîng nga sang sagi leh za guk a hiu a. A kiton phat uh leh a nunung pen ah a pan diu ahi.

³²Zia hi Israelte, a Inkuan dungzui ua a min kizik lut dan uh chu ahi’n; a pawl pawl ah, a giamun dungzui ua, a min kizik lut zosia chu nuai guk sang thum za nga leh sawmnga a hiu hi.

³³LALPA chun Mosi kiang ah thu a piak dungzui in, Israelte lak ah chun Levite chu a simkhawm puau hi.

³⁴LALPA chun Mosi kiang ah thu a piak gual in, Israelte’n a bawl tau a; a pawl pawl in, a phung dungzui leh a Inkuan dungzui chiat un a giamun chiat ua giak in, a kipandok kit sek ui.