Read Vaiphei KISIMNA LEKHABU 20 Bible Online

KISIMNA LEKHABU 20 - Vaiphei bible

KISIMNA LEKHABU 20

¹Israel mipi zosia chu tha masa pen sung in Zin gamthip a hung tung un; mipite chu Kadesh mun ah chun a kichawl tau a. Zia tak ah chun Miriam a thi, a vui tau a.

²Zia tak ah chun, mipite dawn dingin tui a um ta pua’n; Ziaphatchun, Mosi tawh Aron kinakpi dingin a hung khawm tau a.

³Mipite chun Mosi a kinakpiu a, a kiang in: “LALPA ma ah ka unauteu kha tawh a la thi khawm hizaw mai ta leng pha ding hivên!

⁴Bang ding ah LALPA mipite tawh a gan honteu hi, zia gamthip ah thi ding bep ah hi lei puidaw a hem?

⁵Bang ding ah zia gual ah genthei um hi thuak ding ah Aigupta gam ah kipat ei puidok la hem? Thâi hing, theichang, grep ga leh theibufai umlo, dawn ding tui naluale umlo!” a tiu a.

⁶Ziaphatchun, Mosi tawh Aron in mipi chu nusia in, kikhopna biakbûk kotkhak lam a zuan un; a mai ua tualsi hial in a bokkhup un; chuleh, LALPA lopina a kiang un a hung kilang ta’n.

⁷LALPA chun Mosi a hun ho a:

⁸“Tiangkhut kha la’n la, mipite chu ko khawm inla, nang tawh la suapipa Aron chule; chuleh a mit mu un suangpi chu a tui hun luandawsak dingin thu pia’n. Zia gual ah chun suangpi kipat in a dawn ding uh pia ding la hi. Tichun, mipite hi a gan hon zosiau tawh tui dawnsak ding la hi,” a hun tia.

⁹Chutichun, LALPA‘n thu a piak gual in, Mosi chunle LALPA ma ah kipat in a tiangkhut chu a la’n.

¹⁰Mosi tawh Aron in suangpi mai jawn ah chun mipi zosia a ko khawm tau ah, a kiang un: “Thumanglote haw ngai un, zia suangpi kipat hin tui hun lâk daw piak ding ka hiu em?” a tiu a.

¹¹Ziaphatchun, Mosi chun a khut a lâm ah, suangpi chu a tiangkhut in nivei a khên ah; tichun, tui tam tak a hung luangdok tai. Mipi zosia tawh a ganchateu zosia’n a dawn tau hi.

¹²Himaleh, LALPA chun Mosi tawh Aron kiang in: “Israel mipite mit mu ah ka thianthona etsak ding ah keima lei taksan zaw lo ziak un, zia mipite hin a lua ding ua gam ka piak chu puitung lo ding la hiu,” a tia.

¹³Israel mipite chun LALPA a kinakpi ziak un, a thianthona a etsakna ziakin, zia chu Meribah tui a ti tau a.

¹⁴Kadesh mun ah kipat in Mosi chun Edom lengpa kiang in palai a sawl ah: “La suapipa Israel in zia gual hin a gen hi: Ka chung ua vangsiatna tung zosia kha nang inle la henai;

¹⁵bang gual ah ka pu leh pateu khan Aigupta gam a la zuan ah, Aigupta gam ah sawt tak ka chênden danteu, Aiguptate chun kei uh leh ka pu leh pateu ei la bawl genthei dante;

¹⁶LALPA kiang ah kap pum ah ka kiko phat un, ka aw git uh a hia’n, a vansawlchâk hun sawl in Aigupta gam ah kipat in ei hung puidok ah; tu’hin la gamgi bul, Kadesh mun ah khua pakhat ka hung tung tau hi.

¹⁷La gam sung ei hawthensak in, loulai leh grep huante haw pua’ng ka tiu in, la tuikul ua tui le dawn diak pua’ng kau; Lengpa Lamlian zui ing ka tiu in, la gamgi ka khêl masangsiau changlam a hem, veilam a hem inle kihei pua’ng kau,” a vatiu a.

¹⁸Ahi’n, Edom in a kiang un: “Ka gam uh hawtheng thei pua’n lau, achutiloleh, nang uh do dingin chemjam tawh hung kua’n ding ka hiu,” ti’n a la dawnhu ta’n.

¹⁹Israelte chun, “Lamlian bep ah um ding ka hiu; la tui uh kei uh leh ka ganchateu in ka dawn uh leh le a man pena’ng kau. Thil dang bangma hilo in, ka keng un ei chia thensak bep in,” ti’n a don un.

²⁰Himaleh, ama chun, “Haw theng thei pua’n lau,” ti’n a nial tei tei ah. Chuleh, Edom chu amau do dingin sepai tam tak tawh gâlvan tam tak keng in a hung kuan tau a.

²¹Tichun, Edom in a gam sung a hawthensak noplo phatin, Israelte’n a kihei mangsan tau a.

²²Israel mipi zosia chu Kadesh ah kipat in a kipandok un, Hor tâng a hung tung tau a.

²³Edom gamgi bul ah Hor tâng ah chun LALPA chun Mosi tawh Aron kiang in zia gual hin a hun gen a:

²⁴“Aron thi hun a tung tai. Meribah mun ah ka thupiak la zui nop lo ziak un, Israelte luana ding ah ka piakna gam ah chun lût lo ding la hi’ngâl a.

²⁵Aron tawh a chapa Eleazar chu Hor tâng ah hin hun pui to inla;

²⁶Aron puanâk chual chu sût piak inla, a chapa Eleazar âksak in, Aron chu vang zia mun ah chun thi ta’n tin, a chipite kiang ah chiata ding ahi,” a tia.

²⁷LALPA chun thu a piak gual chun Mosi’n a bawl ta’n; mipi zosia mu in Hor tâng ah chun a chia to tau a.

²⁸Mosi chun Aron puanâk sût piak in, a chapa Eleazar a âksak ta’n; chuleh, Aron chu zia tângvûm ah chun a thi tai. Mosi tawh Eleazar bep zia tâng ah kipat chun a hung kiton suk tau a.

²⁹Mipi zosia’n Aron a thi tai ti a het phât un, Israel Inkuan zosia’n Aron sûnna ni sawmthum a nei tau a.