Read Vaiphei KISIMNA LEKHABU 21 Bible Online

KISIMNA LEKHABU 21 - Vaiphei bible

KISIMNA LEKHABU 21

¹Negeb lam ah chêng Kanaan mi, Arad lengpa’n, Israelte chun Atharim lam haw in a hung ui ti a het phat in, Israelte chu a vado ah, bang jat a hem le gâlhing in a hun man tau a.

²Ziaphatchun, Israelte chunle LALPA kiang ah thutiam in, “Zia mite hi ka khut ua lei piakdaw po po leh, kei unle a khawpiteu chu hise dim dem ing kau,” ti’n a kihâksial tau a.

³LALPA chun Israelte kitiamna aw git a ngaitha’n, Kanaan mite chu a khut un a pedok tai; tichun, a mau tawh a khawpiteu chu a hise dim dem tau a; ziaziakchun, zia mun chu Hormah a sak tau a.

⁴Chun, Hor tâng ah kipat Edom pêl dingin Tuipi San lampi a zui tau ah; ahi’n, mipite chu a hung chim ma ma tau a.

⁵Mipite chun Pathian leh Mosi a gensia tau a: “Bang ding ah zia gamthip ah hi thi ding bep ah Aigupta gam ah kipat lei puidaw a hem? Zia tak ah hin an la umlo, tui la umlo, zia an bep bep hi ka khop talua tau,” a tiu a.

⁶Tichun, LALPA chun mipite lak in gûl gu hât chi a hun thâ lût ah, mite chu a chûn, Israelte tam tak a thi tau a.

⁷Mipite Mosi kiang ah hung in, “LALPA tawh nangma ka gensiat uh hi ka la hi’khial tau; gûl haw hi la mang dingin LALPA kiang ah ei dot piak in,” a tiu a. Tichun, Mosi chun mipite a dot piak tai.

⁸LALPA chun Mosi kiang in, “Gûl gu hât chi lim siam inla, mol khat in tâk in; zia chu gûl in a chuk tapo in a et uh leh dam mai ding a hiu,” a tia.

⁹Tichun, Mosi’n sum-eng in gûl lim a siam ah, mol in a tâkdok a; bangtik hun ah le gûl in a chuk taphot in sum-eng ah gûl lim kisiam chu a et ua leh a damna ding un.

¹⁰Israelte chu a kipandok un, Oboth mun in a giak tau a.

¹¹Oboth ah kipat kipandok in, Moab gamthip sualam pang, Iye-abarim mun in a giak tau a.

¹²Zia chun kipandok kit in, Wadi Zered ah a giak tau a.

¹³Zia chun kipandok kit in, Amorte gamgi jul ah gamthip, Arnon luigâl lam in a giak un; Arnon lui chu Moabte gamgi lui, Moab tawh Amorte kikâl ah luang ahi ngâl a.

¹⁴Ziaziakchun, LALPA Galdona Lekhabu ah chun: “Suphah ah Waheb leh Wadi, Arnon lui tawh

¹⁵Wadi mun kên, Ar mun tiang leh Moab gamgi dung tiang ah um chu,” ti’n a kizik a.

¹⁶Zia kipat chun Beer tiang in a chiau ah; zia tuikul umna mun ah chun LALPA chun Mosi kiang ah, “Mipite chu ko khawm inla, keima’n a mau chu tui hun pia ding ka hi,” a ti na mun tuikul chu ahi.

¹⁷Ziaphatchun, Israelte’n zia La hi a sau a: “Aw tuikul, kikhawdok in! A kiang ah pâkna La sa’n la!

¹⁸Lengte tuikul chawsa, mipite lak ah siamângte chawsa, laltiang tawh, a tiangkhut uh tawh,” ti in.

¹⁹Mettanah ah kipat in Nahaliel, Nahaliel ah kipat in Bamoth,

²⁰Bamoth ah kipat Moab lamkai ah phâijawl tawh kimat, Pisgah tâng zia tângvûm chung ah kipat et ah Jeshimon lam kigâl mu ahi tai.

²¹Ziaphatchun, Israelte chun Amor mi, Sihon lengpa kiang in mi a sawl un:

²²“La gam sung ei hawthensak in, la lou lai leh la grep huan un lût pua’ng ka tiu in, la tuikul unle dawn pua’ng kau; la gamgi ka khêl masiau Lengpa Lamlian ah pêt lo in zui ing kau,” a tiu a.

²³Himaleh, Sihon in Israelte chun a gam sung a hawthen ding uh a phal pua’n. Chuleh, Sihon in a mite zosia a ko khawm ah, gamthip ah um Israelte do dingin a kua’n tau a; Jahaz mun a tung ua, Israelte tawh a kido tau a.

²⁴Israelte chun chemjam in a that tau a, Arnon lui ah kipat Jabbok lui, Ammonte gamgi tiang in a gam uh a lak piak tau a; Ammonte gamgi chu a det ziakin.

²⁵Israelte chun a khawpi zosiau a lâkpiak tau ah; chuleh, Israelte’n Amorte khawpi Heshbon tawh a kîmvêl ah khawneu um zosia chu a lua suak tau a.

²⁶Heshbon chu Amorte lengpa Sihon in Moab leng masa a la do ah, Arnon lui tiang ah a la lâkpiakna gam chu ahi ngâl a.

²⁷Ziaziakchun, La phuak mite’n zia gual hin a la phuak tau a: “Heshbon ah hung inla, hung tungding in; Sihon khawpi chu phu det hi hen.

²⁸Heshbon ah kipat in mei a kuangdok ta’n, Sihon khawpi ah kipat meikuang in, Moabte Ar a kângtum ta’n, Arnon lopina zosia tawh a kâng tum tai.

²⁹Aw Moab, la chung a gik na e! Aw Khemosh mipite haw, tawden in la um tau hi! A chate a liangvaisak ta’n, a chanute sal in a pui mang tau in, Amor Lengpa Sihon kiang lam in.

³⁰Heshbon ah kipat Dibon tiang in a gochan uh a mangthai ta’n, Medeb chan mei in a kâk tiang in, ka hi’sia gam tau hi,” ti in.

³¹Tichun, Amorte gam ah chun Israelte a chêng tau a.

³²Jazer entha dingin Mosi chun mi a sawl a; a khawneuteu chu a hang lâkpiak un, zia mun ah a la chêng Amorte chu a suandok tau a.

³³Chun, a kile’kit un, Bashan lamlian a zui to tau a; chuleh, a mau do dingin lengpa Og tawh, a mi hangsante sia Edrei mun ah kido dingin a hung kuan tau a.

³⁴Himaleh, LALPA chun Mosi kiang in, “Amau chu lau him him kiu in; ama tawh a mihing zosiau tawh, a gam uh la khut ah ka hun piaksa a hita ngâl a. Heshbon khua vaihawmpa, Amorte lengpa Sihon la bawl gual khan, ama chung inle bawl ding la hi,” a tia.

³⁵Tichun, ama tawh, a chapate tawh, a mipi zosia chu pakhatle hawi lo in a that gam tau a; chutichun, a gam chu a lua tau hi.