Read Vaiphei KISIMNA LEKHABU 22 Bible Online

KISIMNA LEKHABU 22 - Vaiphei bible

KISIMNA LEKHABU 22

¹Israelte a kipandok kit un, Jeriko zawn ah, Jordan luigâl Moab phâicham in a giak tau a.

²Israelte chun Amorte a bawldan zosiau chu Zippor chapa Balak in a la he tai.

³Israelte a tam ziak un Moabte’n a lau ma mau ah; Israelte a lau um ziak un, Moab gam chu a beidong tai.

⁴Chuleh, Moab chun Midian upate kiang in, “Bawngchal in loulai ah hampa a nêk zaw gual in, zia mipite hin I kîmvêl ua um zosia hun ne zo ding a hitau hi,” a tia. Zia lai ah chun Zippor chapa Balak chu Moabte leng ahi lai tak ahi.

⁵Amau gam, Euphrates lui pang ah um Pethor khua chêng, Beor chapa Balaam ko dingin mi a sawl ah, a kiang in, “Aigupta gam ah kipat in mipi tam tak, lei dâp suak hial ah tam a hung pawtdok un, ka kiangchin a hung tung tau hi.

⁶Tu’ ma ma hin hung inla, zia mipite hi hânsia ei hung law piak in, amau la kei uh sâng in a tam zaw ngâl un; amau ka zaw ah, gam ah kipat ka naw mang thei khâk leh, nang in la maljawl taphot maljawl ah a umdan leh, la sapsiat taphot sapsiat ah a umdan uh ka la he ta ngâl in,” ti’n a gen a.

⁷Tichun, Moab upate tawh Midian upate chu a khut ua âisân man ding chawi in a pawt tau a; chuleh, Balaam kiang a hung tun phat un, Balak thugente chu a hil tau a.

⁸Ama’n a kiang un, “Tu’jan zia hin giak unla, LALPA chun ka kiang ah thu a gen gual gual in nang uh hun hil ing ka,” a tia; tichun, Moab upate chu Balaam kiang in a châm tau a.

⁹Balaam kiang ah Pathian hung in, a kiang in, “La kiang ah umte hi kuate a hiu em?” ti’n a dong a.

¹⁰Balaam in Pathian kiang ah chun, “Moab lal Zippor chapa Balak in zia mite hi ka kiang ah a hun sawl a;

¹¹‘Aigupta gam ah kipat in mipi tam tak, lei pêk dâpsuak hial ah tam a hung pawt un; tu’hin hung inla, hânsia ei hung law piak tiam in; chutileh, amau chu ka do zaw ah, ka nawdaw zaw khâk leh,’ a hung tiu a,” a tia.

¹²Pathian in Balaam kiangah chun, “Amau chu la vazui lo ding ahi; zia mite chu hânsia valaw kin, amau chu maljawlsa a hiu,” ti’n a dawnhu a.

¹³Tichun, jingkal ah chun Balaam chu a hung tho ah, Balak upa hun sawlte kiang ah chun, “La gam lam un chia kit ta un, LALPA chun nang uh ka hun zui ding a phal puai,” a tia.

¹⁴Tichun, Moab upate chu a kipan un, Balak kiang lam in a chia kit tau a; chuleh, a kiang ah chun, “Balaam in ei hun zui nuam puai,” a tiu a.

¹⁵Balak in thilpiak tam zaw leh a masa sâng ah phazaw puaksak in upate chu a sawl kit a.

¹⁶Balaam kiang a hung tun un, a kiang in, “Zippor chapa Balak in zia gual hin a gen hi: ‘Ka kiang ah la hungna ding hi bangma kidâlsak kin la,

¹⁷kipak man tam tak hun pia ding ka hi; ka kiang ah la gen taphot chu bang hilehle hun bawl piak mai ding ka hi; a bang hileh hung inla, zia mite hi hânsia hung lawkhum phot mai in,’ a ti ahi,” ti’n a hung gen tau a.

¹⁸Himaleh, Balak suakte kiang ah chun Balaam in, “Balak chun a In dim dangka leh sana ei pia ding hiziang leh le, LALPA ka Pathian thupiak khêl lam in ka chia thei pua’n, a ting lo leh a vâl inle bangma ka hi thei diak puai.

¹⁹A masate gual khan, nang uh le châm tadi unla, LALPA‘n bang a hem khat ei hun gen piak khâk leh,” a tia.

²⁰Zia jan ah chun Balaam kiang ah Pathian hung in, a kiang in, “Ziate chu nangma ko ah hung a hiu chun, kipan inla zui in; ahi’n, la bawl ding ah ka hun hilte bep la vabawl ding ahi,” a tia.

²¹Tichun, jingkal phatin, Balaam chu a sabiltung chung ah chuang in, Moab upate chu zui in a kipandok tau a.

²²A chia ziak ah chun Pathian lungnatna a puangjak ta’n; ama a la dodâl dingin LALPA vansawlchâk lamlian ah chun a la ding ta’n. Ama chu a sabiltung chung ah chuang in, a suakte mi pani tawh kiton a hiu a.

²³LALPA vansawlchâk chemjam lâmsa lamlian ah a la pang chu sabiltung in a mu ta’n; tichun, a sabiltung in lamlian chu pêl in, loulai in a chiata’n; ahi’n, Balaam in lamlian zui sak gua’n a sabiltung chu a jep ta’n.

²⁴Ziaphatchun, LALPA vansawlchâk chu lamsîk tuak gêl ah grep huan kikâl ah, lampi kawchip mun in a la ding kit a.

²⁵Sabiltung in LALPA vansawlchâk a mu phât in pal a baw ah, Balaam keng chu pal in a tatdên ta’n; tichun, a dithei in a jep tai.

²⁶Ziazaw chun, LALPA vansawlchâk in a la makhel in, lampi vei leh chang pêtdawna ding um lona, lampi chîpna mun khat in a la ding kit a.

²⁷Sabiltung in LALPA vansawlchâk a mu phât in, Balaam nuai in a bok ta’n; Balaam lungna ma ma in, a tiangkhut in a sabiltung chu a jep tai.

²⁸Ziaphatchun, LALPA‘n sabiltung kam chu a hun pau theisak a; Balaam kiang in, “La bang ka bawl khial ah, zia gual ah chu thumvei hial lei jep a hem?” a hun ti tai.

²⁹Balaam in sabiltung kiang ah chun, “Lei ngolbawl na e! Chemjam ka khut in um leh ka nuam na e! Zia mun ah hin hun that ngâl ding hi ve’ng!” a tia.

³⁰Himaleh, sabiltung chun Balaam kiang in, “Tu’ni tiang ah hun paw vêl vêl la sabiltung hilo ka hem? Zia gual ah hin ka hun bawl kha ngai em?” a tia. Ama’nle, “Bawl kha lo e,” a tia.

³¹Ziaphatchun, LALPA chun Balaam mitte chu a hun hi’vâk piak ah, a âng ah LALPA vansawlchâk, a khut ah chemjam lâm ah lamlian ah ding lai chu a hun mu ta’n; ziaphatchun, a mâi ah leisi’n a bokkhup tai.

³²LALPA vansawlchâk in Balaam kiang ah chun, “Bang ding ah la sabiltung vel thum hial la jep a hem? Ka âng ah kipat la pêtmang tâk ziakin nangma kãl ding ah hung kipan ka hi tai.

³³La sabiltung in ei mu ziakin, thumvei hial ei pêl mang gua ahi tai. Ei pêl mang gua hilo vang leh, ama hinghoi in nang hun that zaw ding ka hi,” a tia.

³⁴Ziaphatchun, Balaam in LALPA vansawlchâk kiang in, “Keima ei lamtin ding ah lamlian ah a la ding la hi’lam ka hepua, ka la hi’khial ta ahi. Ziaziakchun, tu’hin la lung a damlo chun, ka In lam ah kile’kit ziang ing ka,” a tia.

³⁵LALPA vansawlchâk chun Balaam kiang in, “Zia mite chu zui inla; himaleh, la gen ding ah ka hun hilte bep vagen in,” a ti’n. Tichun, Balaam chun Balak hun sawl upate chu a zui theng tai.

³⁶Chuleh, Balaam a hung hi ti Balak in a het phat in, ama dawn dingin a gam sung ah mun gamlatna pen, Arnon lui a, gamgi bul, Ir-moab mun tiang in a la chia a.

³⁷Balak in Balaam kiang in, “Nang hung ko ding ah mi ka hun sawl hilo a hem? Bang ding ah hung ziang lo la hem? Kipak man hun petam zo ding ah lei gingcha pua a hem?” a tia.

³⁸Balaam in Balak kiang ah chun, “Tu’hin la kiang ah ka hung ah; himaleh, la doigual gual ah thu gentheina ka nei ah a hem? Pathian in ka gen ding ah ka kam ah a koite bep chu ka gen ding ahi,” a tia.

³⁹Balaam in Balak chu kitonpi in, Kiriath-huzoth a hung tung tau a.

⁴⁰Balak chu bawngchal leh belam in a kithawi ah; chuleh, Balaam tawh a kiang ah upate chule a kithoina sa chu a pia’n.

⁴¹A jing ah chun Balak in Balaam chu pui in, Bamoth-baal ah chun a chiatopi ta’n; zia’ kipat chun Israel mipi a hun nai lam deute chu vak gâl mu phâk ahi.