Read Vaiphei KISIMNA LEKHABU 23 Bible Online

KISIMNA LEKHABU 23 - Vaiphei bible

KISIMNA LEKHABU 23

¹Ziaphatchun, Balak kiang in Balaam in, “Zia hin mâichâm sagi ei siam piak inla; chuleh, bawngchal sagi tawh, belamchal sagi le ei ngaitua piak in,” a tia.

²Balaam in a dot gual chun Balak in a bawl piak ta’n. Tichun, Balak tawh Balaam chun zia mâichâm khat ah chun bawngchal khat tawh, belamchal khat chiat a lân tau a.

³Balaam in Balak kiang in, “Ka vachia mang sung in nang in la hâlmang thillatte hi a la umpi zing in. Ei hung kimupi ding ah LALPA a hung khâk leh. Ei musak zosia chu la kiang ah hun hil na’ng ka,” a ti’n. Tichun, tângvûm khat in a vachiasan tai.

⁴Tichun, Pathian in Balaam a hung kimupi ta’n; Balaam in a kiang in, “Mâichâm sagi ka bawl zo ta’n; chuleh, zia mâichâm ah chun bawngchal khat leh belamchal khat chiat ka lân tai,” a tia.

⁵LALPA chun Balaam kiang in thu a hun gen ta’n: “Balak kiang ah chia kit inla, a kiang ah zia hi la gen ding ahi,” a hun ti’n.

⁶Tichun, Balak kiang in a chia kit ah, ama chu a hâlmang thillat kiang ah Moab upate tawh a la ding zing un.

⁷Ziaphatchun, Balaam in zia gual hin a hun gen ta’n: “Sualam tânggam ah Moab lengpa Balak in, Aram gam ah kipat in ei hung ko a: ‘Hung inla, Jakob hi hânsia ei hung law piak in; Hung inla, Israel hi hânsia ei hung law piak in,’ a ti’n.

⁸Pathian in hânsia a law lo chu bangti’n hânsia law thei ding ka hem? LALPA‘n sia a sap khum lo chu, bangti’n sia sap khum thei ding ka hem?

⁹Tângvûm ah kipat in ama chu ka mu ta’n; tânggam ah kipat in ka he tai; kuama khoithei lo ding mipi a hiu ah, amau ngen ah chêng, nam dang gual a hilo dân uh kihechiante a hiu!

¹⁰Leivui gual ah tam Jakob Inkuan leh, leivui kitung gual ah tam Israelte chu, kua a hem sim thei ding? Midik gual in thi zaw mai ka tin, ka tawpna le amau tawpna gual hi zaw mai hen,” a hun ti tai.

¹¹Ziaphatchun, Balak in Balaam kiang in, “Bang ei law la hi ta! Ka gâlte hânsia law ding ah ka hun ko la hi’n, tu’hin la amau la maljawl ta mai ah,” a tia.

¹²Ama’n, “LALPA‘n ka gen ding ah ka kam ah a koi bep chu ka gen ding hilo a hem?” ti’n a dawnhu tai.

¹³Chun, Balak in a kiang in, “Hung inla, mun chuam khat ah va chia hi ti, zia kipat chun amau la mu thei kha diam; ahi’n, a leng un mu suak thei pua’n la tin, khenkhat bep mu’n la. Zia’ kipat chun hânsia ei law piak in,” a tia.

¹⁴Tichun, Balak in Pisgah tângvûm ah, Zoprim lou mun ah chun a pui to a. Mâichâm sagi a siam ah, bawngchal khat leh belamchal khat chiat zia mâichâm ah chun a lân kît a.

¹⁵Balak kiang in Balaam in, “Zia lam ah son LALPA tawh ka vakimutua sung un, la hâlmang thillatte kiang hin a la ding tiam in,” a tia.

¹⁶LALPA chun Balaam a hung kimupi ah, a kam ah thu a hun koi a, “Balak kiang ah chia kit inla, a kiang ah zia thu hi la gen ding ahi,” a ti’n.

¹⁷A kiang a hung tun phatin, Balak chu Moab upate zosia tawh a hâlmang thillat kiang in a la ding khawm un; Balak in, “LALPA‘n bang a gen em?” ti’n a dong a.

¹⁸Ziaphatchun, Balaam in a thu mu chu a gen a: “Balak tho inla, he ta’n; Aw Zippor chapa, ka thu hi ngai in:

¹⁹Pathian chu mihing gual ah lepchia a hipua’n; eihaw thitheite gual ah a ngaidan theng ngai lo ahi. A mualsua lo dingin a kitiam ngai em?

²⁰Entia, maljawl dingin thupiak ka mu’n; ama’n a maljawl tâk chu ka hei lamdang thei puai.

²¹Jakob chung ah siatna tung ding bangma a bawl pua’n, Israel buaina ding a bawl puai. LALPA a Pathian un a umpi ah, a lak un a lalna a tâklang zing hi.

²²Aigupta gam ah kipat amau haw puidokpa Pathian chu, amau â dingin jangsial tha hat tawhbang ahi.

²³Jakob siatna ding ah bumna a um pua’n, Israel chung inle dawi thu sapna a um him him puai; tu’hin, Israel tawh Jakob chung thu, ‘En tiam in, Pathian in bang bawl piak ahi tam!’

²⁴En in, sakeibakneipi gual in, mipi a hung thodok un; sakeibaknei gual in a dingdok tau hi! A samat a nêk zaw ah, a thisan a dawn zaw masia, a kualkit ngai puai,” a hun ti tai.

²⁵Ziaphatchun, Balak in Balaam kiang in, “Amau hi hânsia law dan la, maljawlna le pia diak kin,” a tia.

²⁶Ahi’n, Balaam in Balak a dawnhu ah, “LALPA‘n a gen ta phot chu ka bawl ding ahi, ti la kiang ah ka gen ta hilo a hem,” a ti’n.

²⁷Tichun, Balak in Balaam kiang in, “Tu’hin ei hun zui inla, mun chuam khat ah chia hi ti. Zia kipat chun amau hânsia lei law piak LALPA‘n a hun phal piak khâk leh,” a ti’n.

²⁸Tichun, Balak in Balaam chu Pethor tângvûm ah chun a pui to a; zia kipat chun Jeshimoni a kigâl mu a.

²⁹Balaam in Balak kiang in, “Zia hin mâichâm sagi ei bawl piak inla, bawngchal sagi tawh, belamchal sagi le ei hun ngaitua piak in,” a tia.

³⁰Tichun, Balaam in a gen gual in Balak inle a bawl piak ta’n; tichun, bawngchal khat tawh, belamchal khat chiat mâichâm tin ah chun a lat piak tai.