Read Vaiphei KISIMNA LEKHABU 24 Bible Online

KISIMNA LEKHABU 24 - Vaiphei bible

KISIMNA LEKHABU 24

¹Tu’hin, Balaam in Israelte maljawl ding chu LALPA lungdamna ahi ti a het phat in, ni dang ah a bawl gual ah âisân talo in, gamthip lam nga’n a kihei ta’n.

²Balaam a dâk daw leh, Israelte a phung a phung ah giak chu a mu ta’n. Ziaphatchun, LALPA thagau a chung in a hung chu ta’n;

³tichun, zia gual hin thu a hun gen tai: “Beor chapa Balaam thugen, mihing mitvâkpa thugen chu,

⁴Pathian thute he’ thugenpa; Elshaddai kilâkna mupa thugen, bokkhup ah, mit kituam lo chun:

⁵Aw Jakob, la puanbûkte chu: Aw Israel, la giamun chu a mêlpha na lawm lawm e!

⁶Jubi kung sâng tak ah kitiang gual, lui luang kiang ah huante gual, thing gimtui LALPA phusa, lui pang ah sidar thing gual chu ahi.

⁷A tuibêl ah kipat tui sungtha’n tin, a thâichite’n tui niang in a; a lal chu Agag sâng in thupi zaw’n tin, a lenggam le choisân hung hi’n a.

⁸Aigupta gam ah kipat amau puidokpa Pathian chu, amau â ding ah jangsial gual ah thahat ahi’n; amau do nam tin chu nuai gawp intin, a gu leh châng zosiau khen buang ding ahi. A thalpi’n amau chu kâp in a.

⁹Ama chu sakeibaknei gual in a kual ah, sakeibakneipi ipmu gual ahi; kua’n phawng tho ngam ding a hem? Nang hun maljawl taphot maljawl in um hen la, nang hânsia hun law taphot hânsia dong in um tau hen,” a ti tai.

¹⁰Ziaphatchun, Balak chu Balaam chung in a lungna ta ma ma ah, a khuttum te ni a tâttua ah; Balaam kiang in, “Ka mêlmate hânsia ei law piak dingin ka hun ko ah, ahi’n la, thumvei hial hi amau la maljawl ta’n.

¹¹Tu’hin, kichia mang ta’n! La In lam ah chia ta’n! ‘Kipakman tam tak hun pia’ng ka,’ ka ti hen; himaleh, LALPA‘n kipakman ka hun piak ding a zanuam puai,” a tia.

¹²Ziaphatchun, Balaam in, “Ka kiang ah mi la hun sawlte kiang ah khan,

¹³‘Balak in a In dim sana leh dangka ei pia ding hiziang leh le, a pha bawl ding hileng, a sia bawl ding hileng, keima dawi thu bep zui in, LALPA thupiak khêl in keima’n bangma ka bawl thei puai; LALPA‘n a gente bep chu ka gen ding ahi,’ ti ka gensa hilo a hem?

¹⁴Ziaziakchun, tu’hin, ka mite kiang lam ah chia kit ta’ng ka; zia mite hin tu’nung leh la mite bang hun law ding a hiu em ti hun hil ing ka,” a ti’n.

¹⁵Tichun, Balaam in a thu mu lawk chu a hun gendok ta’n: “Beor chapa Balaam in a thu mu, mihing mitvakna neipa thugen;

¹⁶Pathian thute he’ thugenpa, Elyon hetna nei ah, Elshaddai kilâkna mupa thugen, bokkhup ah, mit kituam lo chun:

¹⁷Ama chu ka mu’n, tu’hin chu hi nai lo; ka en ah, naicha hilo, Jakob ah kipat in Aksi khat hung pawt intin, Israel ah kipat in lal tiang hung dingdok in a; Moab chalki khen phel intin, Sheth chate zosia khên pâi in a.

¹⁸Edom chu suandok intin, Seir chu a mêlmate’n suandok ta’n au; Israelte’n vang a gâlteu zo zing ta’n au.

¹⁹Jakob ah kipat in lenggam luana bawl hi’ntin, khawpi ah suakcha sunte chu thagam hi’n au,” ti in.

²⁰Chuleh, Amalekte lam a vak nga’n, a chungthuu zia gual hin a hun gendok a: “Amalekte hi nam zosia lak ah hatpen a hiu; himaleh, a tawp lam leh hisiat dim dem hi’n a,” ti in.

²¹Chuleh, Kent te lam a vak nga’n, a chungthuu zia gual hin a hun gen a: “La chênna mun chu mun det ahi, la bû le suangpi chung ah kisia ahi;

²²ahi’n la, Kain chu hisiat ah um ding ahi. Asshurte’n bang chan ah sawt sal in a hun pui mang diam?” ti in.

²³Chuleh, a thu mu zia gual hin a hun gen nalai a: “Tamaijen, Pathian in zia gual ah thil a hun bawl phat chuleh, kua a hem hing nalai ding?

²⁴Himaleh, Kittim gam ah kipat in long liante hung intin; Asshur tawh Eber hi’genthei ta’n a; chuleh, ama le kumkhua’n mangthai den ta’n a,” ti in.

²⁵Ziazaw chun, Balaam a kipandok ah, a gam lam un a chia kit tai; chuleh, Balak chule a lampi’n a chia mang tai.