Read Vaiphei KISIMNA LEKHABU 25 Bible Online

KISIMNA LEKHABU 25 - Vaiphei bible

KISIMNA LEKHABU 25

¹Israelte Shittim mun ah a châm sung un, Moab numeite tawh a hung thanghuai kha tau a.

²Zia kipat chun, a pathian kiang ua kithoina mun po in a chial un; mipite chun a pathian uh ho ah bok khup in, a kithoina sateu a vanêkpi tau a.

³Tichun, Israelte chun Peor ah Baal hona ngawngkol a bât tau a; chuleh, Israelte chung in LALPA lungnatna a hung kuangjak tai.

⁴Mosi kiang ah LALPA‘n, “Israelte chung ah LALPA lungnatna huaisia lâk mang a hi’theina dingin, mipi luchangte zosia puidok inla, LALPA ma-âng ah sunchang lai tak in a gawl uh vatan in,” a tia.

⁵Ziaphatchun, Israel vaihawmte kiang ah Mosi’n: “La mipiteu lak ah kua hitaleh, Peor ah Baal hona pang kha zosia chu that sik sek un,” a ti tai.

⁶Ziaphatchun, Israelte lak ah mi pakhat in, kikhopna biakbûk kotbul ah a la kâ veng vung lai tak un, Mosi leh mipite mit mu in Midiante numei khat a Inkuan lak un a hun pui lût a.

⁷Thiampu Eleazar chapa Phinehas in zia chu a mu phât in, mipi lak ah kipat in a kuandok ngâl ah, cheicha la vak in,

⁸a puanbûk ah tai lut Israel mipa chu a del zui ah, Israel mipa tawh Midian numei chu a gilpiu a sutthil piak ta mai ah. Tichun, Israelte lak ah kipat in thi’na hisia chu a kithial tai.

⁹Zia thi’na hisia ziak ah chun, mi sîng ni leh sang li hial a thi tau a.

¹⁰LALPA chun Mosi kiang in:

¹¹“Thiampu Aron chapa, Eleazar chapa, Phinehas in Israelte chung ah ka lungnatna a del mang tai; a lak ua keima sik ah thangtawmna a nei ziakin Israelte chu ka hi’mangthai lo ahi.

¹²Ziaziakchun, a kiang ah, ‘Kichamna thuthung ka pe ta ahi.

¹³Ama tawh a suante tiang ah, kumkhua’n ka thiampu ahi’na ding uh thuthung chu ahi; a Pathian â ding ah phatchuam ngaina a nei ziak leh, a chipi Israelte â ding ah tatna a bawl piak ziakin,’ ti’n gen in,” a tia.

¹⁴Israel mi, Midian numei tawh a thalup khawm pau chu, Simeon phung ah luchang Salu chapa Zimri ahi.

¹⁵Midian numei a thalup khawm chu, Midiante lak ah phung khat ah luchang pen, Zur chanu Kosbi ahi.

¹⁶LALPA chun Mosi kiang in:

¹⁷“Midiante chu do unla, hi’sia un;

¹⁸amau in Peor chungchâng in nanghaw a hun dawha bawl un, a suapinuu Kosbi, Midiante luchang khat chanu, Peor ziak ah thi’na hisia a len lai ah kithatnu chung thu ah le a hun dawha bawl ziak un,” a tia.