Read Vaiphei KISIMNA LEKHABU 27 Bible Online

KISIMNA LEKHABU 27 - Vaiphei bible

KISIMNA LEKHABU 27

¹Ziaphatchun, Zelophehad chanute a hung pawtdok un. Zelophehad chu Hepher chapa ahi’n, Hepher chu Gilead chapa ahi’n, Gilead chu Makir chapa ahi’n, Makir chu Manasseh chapa ahi; tichun, Zelophehad chu Joseph chapa, Manasseh phung ah mi ahi. A chanute min chu: Mahlah, Noah, Hoglah, Milkah leh Tirzah a hiu a.

²A unaucha haw un kikhopna biakbûk kotbul ah mipite kiang ah um Mosi tawh, thiampu Eleazar tawh, phung tin ah luchang zosia ma-âng ah hung in, a kiang un:

³“Ka pau kha gamthip ah a la thi ta’n; LALPA do ah pung khawm Korah lawite lak ah kha pang hilo in, ama mimal gitlona ziak ah, chapa nei man lo ah thi a la hi’n;

⁴chapa a nei lo ziak ah bang ding ah, ka pau min chu a phung lak ah kipat hi’bei ziang ding la hiu em? Ka pau suapite lak ah kei uh le gochan lei piak diu ahi,” a hung ti tau a.

⁵A thil dot uh chu Mosi chun LALPA kiang in a tut ta’n.

⁶Tichun, Mosi kiang ah LALPA‘n:

⁷“Zelophehad chanute thil dot chu a dik hi; ziaziakchun, a pau suapite lak ah kipat a gochan ding uh la piak tei tei ding uh ahi; tichun, a pau gochan ding chu amau hin a lua ding uh ahi,” a hun ti ta’n.

⁸Chuleh, Israelte kiang in zia gual hinle la gen ding ahi: “Mi pakhat, chapa bei in thi ta leh, ama go chu a chanu la luasak ding ahi.

⁹Ama chu chanu le nei lo ahi chun, a gochan ding chu a suapite la luasak mai ding ahi.

¹⁰Ama chu suapi pawsal le nei lo ahi chun, a pa suapipate la luasak ding ahi.

¹¹Ama pa chule suapi pawsal bei ahi chun, amau phung sung ah a chanau kinaipi penpa chu la piak ding uh ahi; tichun, amau chun a luaden ta ding ahi; LALPA chun Mosi kiang ah thu a piak hi, Israelte â ding ah dan thuthung leh a zui zing ding uh chu hi hen,” a ti nalai a.

¹²LALPA chun Mosi kiang in, “Zia Abarim mual ah hin kal to inla, Israelte kiang ah ka piakna ding gam chu vak en in,

¹³la vak et zaw phat leh, la suapipa Aron gual in nang le a la chia masa la suapite kiang lam in pui mang hiding la hi tai.

¹⁴Nang in Zin gamthip ah, mipite a kiphin lai ua khan, ka thu la nial ah, Tui mun ah khan ka thiantho dan a mitmuu ah la etsak nop lo ziak ah khan ahi,” a ti’n. (Zia tui mun chu Zin gamthip ah, Meribath-Kadesh mun kha ahi.)

¹⁵Mosi chun LALPA kiang ah zia gual hin a gen a:

¹⁶“LALPA, hinna nei zosiate thagau pepa Pathian chun, mipite chung ah puitu ding mi pakhat guat hen la;

¹⁷a ma âng ua chia ding leh lût dingin; amau puidok ah, pui lût dingin; tichun, LALPA mipite chu chingtu nei lo belam hon gual ah a um ziang lona ding un,” a ti’n.

¹⁸Ziaphatchun, LALPA chun Mosi kiang in: “Nun chapa Joshua, a chung ah thagau umna pa chu puidok inla, a chung ah la khut ngat in;

¹⁹ama chu thiampu Eleazar tawh mipi zosia ma-âng ah chun dinsak in; a leng ua mit mu in thu pia’n.

²⁰La thuneina bang a hem jat le pia’n, Israelte zosia’nle a thu a nun theina ding un.

²¹Ama chu thiampu Eleazar ma-âng in ding intin, LALPA ma-âng ah Urim ah thutanna chu dot piak sek intin; ama thu’ pawtdok in, ama thu ma ah lut intiu in, ama tawh a kiang ah Israel mipi um khawm zosia kiton in au,” a ti’n.

²²Tichun, LALPA‘n thu a piak gual in Mosi’n le a bawl ta’n. Joshua a puidok ah, thiampu Eleazar tawh mipi zosia ma-âng ah chun a dinsak ta’n;

²³a khutte ni a luchung ah ngat in a namdet tai; Mosi kiang ah LALPA‘n thu a piak gual in a bawl tai.