Read Vaiphei KISIMNA LEKHABU 28 Bible Online

KISIMNA LEKHABU 28 - Vaiphei bible

KISIMNA LEKHABU 28

¹LALPA chun Mosi kiang in:

²“Israelte chu thu pia’n la, a kiang un: Ka kiang ah kithoina changbuang ah hâlmang thillatte chu gimtui a hi’theina dingin, a hunbî kiguat dungzui chiat in chingthei tak ah la hun lat sek ding uh ahi, ti’n hil inla.

³Chuleh, a kiang un: LALPA kiang ah hâlmang thillat ah la piak dingteu chu ziate hi ahi: belamno pani demna bei leh kum khat ah upa gêl, hâlmang thillat ding ah chawlnga lo ah nisi’n ah la lat zing ding uh ahi.

⁴Belamno khat chu jingkal si’n ah lân in; belamno khat zawk chu nitâk thimbut si’n ah la hun lat zing ding uh ahi’n;

⁵chuleh, changbuang thillat dingin, chângbuang nêl pha tak, Ephah te’na dim khat, se’sawm ah a se’khat; sathau kihêk thiangtho, a te’na Hin dim khat, se’li’ ah a se’khat tawh helsa la hun lak ding uh ahi.

⁶Zia chu chawl lo ah LALPA kiang ah hâlmang kithoina ding leh, gimtui hiding ah la lat zing ding ua; Sinai tâng ah kinamdetsa kha ahi tai.

⁷Belamno khat tawh uain te’na Hin dim khat, se’li khen ah a se’khat tawh, belam khat chiat la lat khawm ding ahi’n; uain chîk tak chu LALPA â dingin mun thiangtho ah chun la sunthâk ding uh ahi.

⁸Chun, belamno khat zaw chu nitâk lam thimbut ah, jingkal ah changbuang thillat tawh, uain la lat gual un, LALPA â ding ah gimtui a hitheina dingin, mei ah hâlmang thillat in la piak ding uh ahi”.

⁹Chuleh, Sabbath ni si’n ah la thillat ding uh chu: belamno a chal, kum khat ah upa pani tawh; changbuang thillat dingin changbuang nêl pha tak, Ephah te’na dim khat, se’sawm ah sua ah a se’ni, sathau tawh helsa; uain thillat ding tawh le helsa,

¹⁰ziate hi nisi’n ah la thillatteu bân ah, sabbath nisi’n ah la hâlmang thillat dingteu chu ahi.

¹¹Chuleh, thasin ah a ni masa pen leh, LALPA kiang ah hâlmang thillat dingin: bawngchal gual pani, belamchal khat, belamno sagi, kum khat ah upa, demna bei chiat la lat zing ding uh ahi’n;

¹²bawngchal khat tawh changbuang thillat la lat khawm ding uh chu: chângbuang nêl pha tak, Ephah te’na dim khat, a se’sawm ah sua a se’thum, sathau tawh helsa hi’ntin; belamchal khat tawh changbuang thillat lat khawm ding chu: chângbuang nêl pha tak, Ephah te’na dim khat, se’sawm ah sua a se’ni, sathau tawh helsa hi’ntin;

¹³chuleh, belamno khat chiat tawh changbuang lat khawm ding chu: chângbuang nêl pha tak, Ephah te’na dim khat, se’sawm ah sua a se’khat, sathau tawh helsa ahi ding ahi. Ziate chu LALPA kiang ah gimtui a hitheina ding a, mei ah hâlmang thillat dingte chu a hiu.

¹⁴Bawngchal khat tawh uain lat khawm ding chu: Uain te’na Hin dim kim khat hi’ntin; belamchal khat tawh lat khawm ding chu Hin dim khat, a se’thum sua ah a se’khat hi’ntin, belamno khat tawh lat khawm ding chu te’na Hin dim khat, a se’li ah sua ah se’khat hi hen. Zia hi kum tung ah thasin leh bawl zing ding hâlmang thillat chu ahi.

¹⁵Chun, LALPA kiang ah sual thoina dingin belamchal khat le la hun lat ding uh ahi; zia hi chawl lo ah hâlmang thillat tawh, uain thillat la bawlte tawh la lat khawm zing ding uh chu ahi.

¹⁶Chun, kumsin ah a tha khatna, ni sawm leh li tin ni si’n leh, LALPA â ding ah chiakân thillat la bawl zing ding uh ahi.

¹⁷Zia tha’ a nisawm leh nga tin ni chu chiakân kût bawl ni ahi; ni sagi sung thawipanglo vaithum la nêk ding uh ahi.

¹⁸A ni masa pen hin kikhopna bawl unla, na him him la sep lo ding uh ahi.

¹⁹LALPA kiang ah hâlmang kithoina dingin mei ah thillat la bawl diu ahi: Bawngchal tuai pani, belamchal khat, belamno a chal kum khat ah upa sagi tawh; ziate hi demna ding a um kha diam ti la et phat ding ahi.

²⁰Changbuang tawh lat khawm ding chule; chângbuang nêl pha tak, sathau tawh helsa hi’ntin; bawngchal khat tawh lat khawm ding chu Ephah te’na dim khat, se’sawm ah sua a se’thum tawh; belamchal khat tawh lat khawm ding chu ephah te’na dim khat, a se’sawm ah se’ni hi hen la;

²¹belamno sagite chu, Ephah te’na dim khat, se’sawm ah a se’khat chiat tawh lat khawm ding ahi;

²²kêlchal khatle la gitlonau thoidamna ding ah la lat khawm ding uh ahi;

²³jingkal si’n ah hâlmang thillat, chawlnga lo ah la bawl dingte bân ah la bawl zing dingte chu ahi.

²⁴Zia gual chun, ni sagi sung nisi’n in, mei ah an thillat, LALPA kiang ah gimtui hiding in la lat ding uh ahi; ziate hile nisi’n ah chawlnga lo ah hâlmang thillat tawh, uain la lat zingte haw tawh la lat khawm ding uh ahi.

²⁵A ni sagi tin ni leh kikhopna thiangtho bawl in la tiu in; la nisi’n nasep uh bangma la sep lo ding uh ahi.

²⁶Chun, buthak lop ni, Hapta Kût matna ni masa pen ah, LALPA kiang ah buthak la lat niu ah chun, kikhopna thiangtho bawl unla, la nasep vantâng uh bangma la bawl lo diu ahi.

²⁷LALPA kiang ah gimtui hiding in ziate hi la hâlmang thillat dingteu chu a hiu: Bawngchal tuai pani, belamchal khat tawh, belamno a chal kum khat ah upa sagi tawh la lat ding uh ahi.

²⁸Bawngchal khat tawh la latkhawm ding uh chângbuang nêl pha tak, ephah te’na dim khat, se’sawm ah sua a se’thum tawh; belam tawh lat khawm ding chu changbuang Ephah te’na dim khat, se’sawm ah sua a se’ni chiat tawh;

²⁹belamno sagite tawh lat khawm ding changbuang chu a Ephah te’na dim khat, se’sawm ah sua a se’khat chiat tawh lat khawm ding hi’ntin;

³⁰la gitlonau thoidamna dingin kêlchal khatle la lat khawm ding uh ahi.

³¹Ziate hi nitâk si’n leh chawlnga lo ah hâlmang thillat ah changbuang thillat tawh, uain thillat tawh la lat khawm dingteu chu ahi.