Read Vaiphei KISIMNA LEKHABU 29 Bible Online

KISIMNA LEKHABU 29 - Vaiphei bible

KISIMNA LEKHABU 29

¹Tha sagi’na’ a ni masa pen ah chun, la nisi’n nasep uh cholsan in, kikhopna thiangtho bawl un. Zia ni hi nang uh pengkul mût ni hi’ntin;

²LALPA kiang ah gimtui hiding ah hâlmang thilpiak la lat ding uh chu: bawngchal tuai khat, belam chal khat, belamno a chal pasagi, kum khat ah upa leh demna bei chiat hiu hen.

³Chuleh, changbuang thillat ding chu: chângbuang nêl pha tak, sathau tawh helsa ephah dim khat, se’sawm ah a se’thum chu bawngchal tawh lat khawm hi hen la; belamchal tawh lat khawm ding chu changbuang ephah te’na dim khat, se’sawm ah a se’ni hi hen la;

⁴belamno sagite tawh lat khawm ding chu: Chângbuang ephah te’na dim khat, se’sawm ah a se’khat chiat tawh hi hen la;

⁵la gitlonau thoidamna ding uh kêlchal khat le la lat khawm ding uh ahi.

⁶Zia thilte hi thathak si’n ah hâlmang thillat tawh changbuang thillat khawm, chuleh, nisi’n ah hâlmang thillat tawh changbuang leh dawnchi thillat, LALPA â ding ah gimtui ahi’theina ding ah dan dungzui ah, mei ah hâl thillat kibawl zingte bân ah chu la bawl sek ding uh ahi.

⁷Zia tha sagi’na, a ni sawm tin ni hileh, kikhopna thiangtho bawl in, la kihi’thiantho ding uh ahi; la nisi’n nasep uh bangma la bawl lo ding uh ahi.

⁸LALPA kiang ah gimtui hiding in hâlmang thillat, ziate hi la lat ding uh ahi: Bawngchal gual khat, belamchal khat leh kum khat ah upa belamno sagi, demna bei ngen la lat ding uh ahi.

⁹Ziate chu tawh changbuang latkhawm ding chu sathau tawh helsa, bawngchal khat tawh changbuang ephah dim khat, a se’sawm ah a se’thum; belamchal tawh lat khawm ding chu ephah dim khat, se’sawm ah a se’ni chiat tawh;

¹⁰belamno sagite tawh lat khawm ding chu ephah dim khat, se’sawm ah a se’khat chiat tawh hi’ntin;

¹¹la gitlona thoidamna ding ah kêlchal khat la lat ding ahi; zia cheng hi gitlo thoidamna ding ah la thillat tawh, chawlnga lo ah la hâlmang thillat tawh, changbuang leh uain la lat zingte bân ah la bawl ding chu ahi.

¹²Tha sagi’na, a ni sawm leh nga tin ni phat leh kikhopna thiangtho la bawl ding uh ahi; la nisi’n nasepteu chu bangma la bawl lo ding uh ahi. LALPA â dingin ni sagi sung kût la bawl ding uh ahi.

¹³LALPA â ding ah gimtui hiding in mei ah hâlmang thillat kithoina la bawl ding uh ahi; bawngchaltuai sawm leh thum, belamchal pani, kum khat ah upa belamno a chal sawm leh li la hun lat ding uh ahi. Ziate chu demna bei ngen la têldaw ding uh ahi.

¹⁴Ziate chu tawh lat khawm ding chângbuang nêl pha tak, sathau tawh kihel hi’ntin; bawngchal sawm leh thum te tawh lat khawm ding chu changbuang ephah te’na dim khat, se’sawm ah a se’thum chiat tawh hi’ntin; belamchal panite chu changbuang ephah dim khat, se’sawm ah a se’ni chiat tawh hi’ntin;

¹⁵belamno a chal sawm leh lite chu, changbuang ephah te’na dim khat, se’sawm ah a se’khat chiat tawh la lat khawm ding uh hi’ntin;

¹⁶chawlnga lo ah hâlmang thillat, changbuang leh uain thillat la lat khawmte ban ah zia cheng chu la bawl belap ding uh ahi.

¹⁷A ni ni’ ni leh: Bawngchal gual sawm leh ni, belamchal pani tawh, kum khat ah upa belamno a chal sawm leh li, demna bei ngen tawh,

¹⁸dan dungzui ah bawngchal tawh, belamchal tawh, belamno a chal haw tawh lat khawm ding ah kigen jat changbuang tawh, uain tawh la lat khawm ding uh hi’ntin;

¹⁹chawlnga lo ah hâlmang thillat, changbuang thillat tawh, uain thillat zosia bân ah gitlo thoidamna ding ah kêlchal khat le la lat khawm ding uh ahi.

²⁰A ni thum ni leh: bawngchal sawm leh khat, belamchal pani tawh, kum khat ah upa, demna bei ngen belamno a chal sawm leh li tawh;

²¹a dan kigensa dungzui ah bawngchal tawh, belamchal tawh, belamno a chal haw tawh lat khawm ding ah kigen jat changbuang tawh uain tawh la lat khawm ding uh hi’ntin;

²²chawlnga lo ah hâlmang thillat, changbuang thillat tawh, uain thillat zosia ban ah gitlo thoidamna ding ah kêlchal khat le la lat khawm ding uh ahi.

²³A ni li’ ni leh: bawngchal sawm, belamchal pani, kum khat ah upa demna bei ngen belamno a chal sawm leh li tawh,

²⁴a dan kigensa dungzui ah bawngchal tawh, belamchal tawh, belamno a chal haw tawh lat khawm ding ah kigen jat changbuang tawh, uain tawh la lat khawm ding uh hi’ntin;

²⁵tan lo ah hâlmang thillat, changbuang thillat tawh, uain thillat zosia ban ah gitlo thoidamna ding ah kêlchal khat le la lat khawm ding uh ahi.

²⁶A ni nga ni leh: Bawngchal pakua, belamchal pani tawh, kum khat ah upa demna bei ngen belamno a chal sawm leh li tawh,

²⁷a dan kigensa dungzui ah bawngchal tawh, belamchal tawh, belamno a chal haw tawh lat khawm ding ah kigen jat changbuang tawh, uain tawh la lat khawm ding uh hi’ntin;

²⁸tan lo ah hâlmang thillat, changbuang thillat tawh, uain thillat zosia ban ah gitlo thoidamna ding ah kêlchal khat le la lat khawm ding uh ahi.

²⁹A ni guk ni leh: Bawngchal pagiat, belamchal pani tawh, kum khat ah upa demna bei ngen belamno a chal sawm leh li tawh,

³⁰a dan kigensa dungzui ah bawngchal tawh, belamchal tawh, belamno a chal haw tawh lat khawm ding ah kigen jat changbuang tawh, uain tawh la lat khawm ding uh hi’ntin;

³¹tan lo ah hâlmang thillat, changbuang thillat tawh, uain thillat zosia ban ah gitlo thoidamna ding ah kêlchal khat le la lat khawm ding uh ahi.

³²A ni sagi ni leh: Bawngchal sagi, belamchal pani tawh, kum khat ah upa demna bei ngen belamno a chal sawm leh li tawh,

³³a dan kigensa dungzui ah bawngchal tawh, belamchal tawh, belamno a chal haw tawh lat khawm ding ah kigen jat changbuang tawh, uain tawh la lat khawm ding uh hi’ntin;

³⁴tan lo ah hâlmang thillat, changbuang thillat tawh, uain thillat zosia ban ah gitlo thoidamna ding ah kêlchal khat le la lat khawm ding uh ahi.

³⁵A ni giat ni leh khawmpi thiangtho bawl unla; la nisi’n nasep uh bangma la bawl lo ding uh ahi.

³⁶LALPA kiang ah gimtui hiding in hâlmang thillat ziate hi la lat ding uh ahi: Bawngchal gual khat, belamchal khat leh kum khat ah upa belamno a chal sagi demna bei ngen la piak ding uh ahi;

³⁷a dan kigensa dungzui ah bawngchal tawh, belamchal tawh, belamno a chal haw tawh lat khawm ding ah kigen jat changbuang tawh, uain tawh la lat ding uh ahi.

³⁸Tan lo ah hâlmang thillat, changbuang thillat tawh, uain thillat zosia ban ah gitlo thoidamna ding ah kêlchal khat le la lat khawm ding uh ahi.

³⁹Zia kithoina thillat ding zosia hi, la hâlmang thillatteu, la changbuang thillatteu leh la uain thillatteu chu nangma kiphalna dungzui leh la kitiamnau dungzui ah LALPA kiang ah a hunbî kiguat dungzui chiat ah la lat dingteu chu ahi.

⁴⁰Tichun, LALPA chun Mosi kiang ah thu a piak gual chun, Mosi chunle Israelte a hil tai.