Read Vaiphei KISIMNA LEKHABU 3 Bible Online

KISIMNA LEKHABU 3 - Vaiphei bible

KISIMNA LEKHABU 3

¹Sinai tâng ah LALPA chun Mosi kiang ah thu a gen lai ah chun, ziate hi Aron tawh Mosi suante chu a hiu a.

²Aron chapate min chu: A upa pen chu Nadab, a bân ah Abihu, Eleazar tawh Ithamar a hiu a;

³ziate chu Aron chapate, thiampu hiding ah sathaunu’ ah um, thiampu nasêm ding ah guat ah umte chu a hiu.

⁴Nadab leh Abihu chu Sinai gamthip ah, dan lo gual tak ah mei thianglo LALPA kiang ah a lat lai un, LALPA mai in a la thi tau ah; amau in cha a nei puau ah. Eleazar leh Ithamar in vang a pau Aron dam sung sia thiampu na chu a sêm ui.

⁵Chun, LALPA chun Mosi kiang in zia gual hin a gen a:

⁶Levi phungte chu pui chuam inla, thiampu Aron kiang in hun pui in, ama chu a kithuapi theina ding un.

⁷Ama na chu a sep piak ua, mite â ding ah kikhopna puanbûk mai ah, biakbûk ah na a sep diu ahi;

⁸kikhopna biakbûk van zosia a chintup ua, biakbûk sung ah Israel mipite zosia â ding ah na a sep piak diu ahi.

⁹Levi phungte chu Aron tawh a suante la piak ding ahi; Israel mipite lak ah kipat in amau chu la piakdaw ding ahi.

¹⁰Ahi’n, Aron tawh a suante min khum inla, amau in thiampu na chu a etkol diu ahi; midang a hun nai a um chun la thalup ngâl diu ahi.

¹¹Chuleh, LALPA chun Mosi kiang in zia gual hin a gen a:

¹²Israelte lak ah nau lutîl, sûlhong masa pen kei â ahi dungzui in, Israelte lak ah nau lutîl zosia thasâng in Levite hi kei â hichuam dingin ka pom tai. Levite chu kei â chuam bîk hita’n au;

¹³cha lutîl zosia kei â ahi gual in; Aigupta gam ah cha lutîl zosia ka thagam lai ah khan, Israelte lak ah cha lutîl taphot, mihing hileh, gancha hileh, kei â ding ah ka hi’thian a hita ngâl ah; amau chu kei â hita’n au. Kei hi LALPA ka hi’ngâl a.

¹⁴Chun, LALPA chun Sinai gamthip ah Mosi kiang in zia gual hin a gen a:

¹⁵Levi phungte chu a Inkuan dungzui chiat un a min uh la khum ding ahi. Pawsal zosia, tha khat mi ah kipat a chung lam taphot a min uh la khum suak ding ahi.

¹⁶Tichun, LALPA gen gual leh thupiak dungzui in, Mosi chunle a min uh a khum suak tai.

¹⁷Ziate hi Levi chapate min chu a hiu: Gershon, Kohath leh Merari.

¹⁸Ziate hi Gershon chapate, a phung dungzui uh ahi: Libni leh Shimei.

¹⁹Kohath chapate, a phung dungzui un: Amram, Izhar, Hebron leh Uzziel a hiu.

²⁰Merari chapate, a phung dungzui un: Mahli leh Mushi a hiu. Ziate hi Levite phung ah mi, a Inkuan dungzui uh chu a hiu.

²¹Gershon ah kipat in Libnites Inkuan leh Shimeite Inkuan a piang ua; ziate chu Gershon phungte a hiu a.

²²A lak ua pawsal zosia, tha khat ah kipat a chung lam a sim un; a min uh kikhum zosia chu sang sagi leh za nga a hiu.

²³Gershon Inkuante chu biakbûk tomlam, tumlam kâi ah chun a giak ding uh ahi.

²⁴Gershon phung ah mite lamkai ding chu Lael chapa Eliasaph ahi.

²⁵Kikhopna biakbûk ah Gershon phungte mawpuakna ding chu: biakbûk chung khû’na puanjak leh kikhopna biakbûk lûtna puanjak leh,

²⁶a sung ah mâichâm leh a biakbûk ûmna huang ah kikhâi zosia, a huang kotkhak puanjakte leh a matchâk khauhual zosia ah sep leh bawl taphot chu amau chantum ahi.

²⁷Chun, Kohath ah kipat in Amram, Izhar, Hebron leh Uzziel Inkuante a piang un; ziate hi Kohath suante chu a hiu a.

²⁸A lak ua pawsal zosia, tha khat mi ah kipat a chung lam a sim un, a leng un sang giat leh za guk a hiu a; amau chu mun thiangtho ah sêm leh bawlte chu a hiu hi.

²⁹Kohath phung ah mite chu biakbûk simlam kâi ah giak dingte chu a hiu a;

³⁰Kohath phung ah mite lamkai ding chu Uzziel chapa Eliazaphan ahi.

³¹Amau mawpuakna chu, thuthung thingkuang, dawkân, thaumei tunna, mâichâmte, mun thiangtho ah thiampute matchâk, ûm leh bêl zosia, a puanjakte leh zia thil ah matchâk zosia ah sep leh bawl taphot chu ahi.

³²Thiampu Aron chapa Eleazar chu Levite puitu lianpen hi’ntin, mun thiangtho ah tawi leh chan zosia enkol ah a pan ding ahi.

³³Merari Inkuan ah kipat in Mahli leh Mushi phungte hi a hung piang un; ziate hi Merari phungte chu a hiu a.

³⁴A lak ua pawsal zosia, tha khat mi ah kipat a chung lam a sim un, sang guk leh za ni min chu a khum ui.

³⁵Merari phung ah mite lamkai chu Abihail chapa Zuriel ahi; amau chu biakbûk mallam kâi ah giak dingte chu a hiu.

³⁶Merari chapate chu biakbûk khuam kilem khawm, a thingjawlte, a khuamte, a kitunnate leh a matchâk zosia ah sep leh bawl bangkim ah mawpua a hiu a;

³⁷chuleh, a huang ûmna khuamte, a tunnate leh a khauhual kihênna leh a khauhualte chule ahi.

³⁸Chun, biakbûk sualam kâi, kikhopna puanbûk mai lam ah chun Mosi tawh Aron chapate, Israel mipite thasâng ah sep leh bawl bangkim ah tawi leh chan dingte giamun hi’ntin; midang kuale a tuam ah hun nai taphot chu thalup ngâl ding ahi.

³⁹LALPA thupiak dungzui ah, Levite a Inkuan dungzui ua, pawsal taphot, tha khat mi ah kipat a chunglamte sia Mosi leh Aron in a min uh a khum zosiau chu a leng un sîng ni leh sang ni a hiu hi.

⁴⁰Chun, LALPA chun Mosi kiang in: Israelte lak ah nau lutîl pawsal, tha khat ah kipat chung lam cheng sim inla, a min uh khum in.

⁴¹Ahi’n, Israelte cha lutîl zosia thasâng in Levite chu kei LALPA hi lei piak daw ding ahi; chuleh, Israelte gancha lak ah piang masa pen chiat thasâng in Levite gancha zosia chu lei piakdaw ding ahi, a ti’n.

⁴²Tichun, LALPA‘n thu a piak dungzui chun, Mosi chun Israel chate nau lutîl zosia min chu a khum tai.

⁴³Pawsal cha lutîl a min uh a khum zosia chu a sim in, a leng un sîng ni sang ni za ni sawmsagi leh thum a hiu a.

⁴⁴Chun, LALPA chun Mosi kiang in zia gual hin a gen a:

⁴⁵Israelte cha lutîl zosia thasâng dingin Levite chu la’n la; chuleh, a gancha nei zosiau chule Israelte ganvul zosia thatheng dingin la’n; tichun, Levite chu kei â hita’n au. Keima hi LALPA chu ka hi.

⁴⁶Levite sâng ah Israelte cha lutîl a tamzawknau, za ni sawmsagi leh thum te tatna man dingin,

⁴⁷nang in mun thiangtho ah a kimat dungzui in, mi khat chung ah shekel nga chiat la’n la, zia shekel khat chu gerah sawmni tawh kituk ahi.

⁴⁸Mihing a tamzawknau jat ah a kitatnau sum chu Aron tawh a chapate kiang ah pia’n.

⁴⁹Tichun, Mosi chun Levite sâng ah a tamzawknau jatte kitatna sum chu a la’n;

⁵⁰Israelte cha lutîl zosia ah kipat sum chu, mun thiangtho ah kimang dungzui in shekel sang khat za thum sawmguk leh nga a la tai;

⁵¹Mosi chunle zia tatna sum chu, LALPA thupiak gual in Aron tawh a chapate kiang in a pedok tai.