Read Vaiphei KISIMNA LEKHABU 30 Bible Online

KISIMNA LEKHABU 30 - Vaiphei bible

KISIMNA LEKHABU 30

¹Ziaphatchun, Mosi chun Israelte lak ah phung tin ah upate kiang in: Zia hi LALPA thupiak chu ahi, ti’n a gen a:

²Pawsal khat in LALPA kiang ah thutiam a hem, ama leh ama kigâkna ding ah kihaksialna a hem a nei chun, a thutiam chu a bawsiat lo ding ahi; a kam ah a la gendaw gual gual in a bawl ngei ngei ding ahi.

³Chun, numei khat in a nungak sung, a pa In ah a um sung in LALPA kiang ah thutiam nei in, ama leh ama kigâk taleh,

⁴a thutiam leh a kigâkna chu a pa’n le a het ah, bangma a gen diak lo chun, a thutiam zosia chu umzing intin, chuleh, a kikamtiamna chule um zing intin;

⁵himaleh, a pa’n a chanu kitiamna leh kigâkna zosia chu a het hun hun in a phatsaklona thu a kiang ah gen taleh, a chanu kitiamna leh kigâkna zosia chu thap hi’ngâl ding ahi; a chanu kitiamna chu a pan lem a sak lo ziakin, LALPA‘n ama chu ngaidam ding ahi.

⁶Bangma ngaitua masa lo ah a mawk paudawna ziak ah kitiam a hem leh, kikhâmna nei zing ngâl ah pawsal a nei chun,

⁷a pawsal in zia gual ah kitiamna a nei chu a het masak pen na ah chun bangma gen lo in thipsan hiat hiat ta leh, a la thutiam chu um zing intin, a kikhâmna chule um zing ding ahi.

⁸Himaleh, a pawsal in a het phat phatin, a kipautiamna a pawm lo dan chu a gendaw ah, bangma ngaitua lo ah a kipau tiamna leh a kikhâmna chu a thap piak chun, LALPA‘n zia minu chu ngaidam in a.

⁹(Himaleh, meithâi leh nol ah umte kipautiamna leh kikhâmna zosia vang um zing in a.)

¹⁰Chun, a pawsal in ah kipautiam a hem, kitiamna a bawl chu,

¹¹a pawsal inle he ngâl ah, a lemsak lona bangma a gendaw lo chun, a kipautiamna leh a kikhâmna zosia chu a chung in um zing in a.

¹²Ahi’n la, a pawsal in a het phat phat in a kitiamna chu thap piak ta leh, a kitiamna leh a kikhâmna bang jat a la gendok ziang ta maleh, bangma um talo ding ahi. A pawsal in a thap piak zaw tâk ziakin LALPA‘n le ngaidam ding ahi.

¹³Numeite kipautiamna zosia leh ama kihaksialna zosia chu a pawsal in a namdet thei in, a hi’bei thei hi.

¹⁴Himaleh, a pawsal in a ji kiang ah bangma gen lo in um zing taleh, a ji kitiamna leh kikhâmna zosia chu a chung ah tung dingin a sukdet piak ahi; ama chung thu, a pawsal in a het ni kipat bangma a gen lo ziakin a suk-hin piak ahi ngâl a.

¹⁵Ahi’n la, a ji chung ah thilte chu a het nung in, hi’bei piak taleh vang, a pawsal in a ji mawna zosia a puak ding ahi.

¹⁶Ziate hi a pawsal tawh a ji kikâl leh, a chanu a pa In ah um nalaite kikâl ah dan thuguat, LALPA‘n Mosi kiang ah thu a piak chu ahi.