Read Vaiphei KISIMNA LEKHABU 31 Bible Online

KISIMNA LEKHABU 31 - Vaiphei bible

KISIMNA LEKHABU 31

²“Israelte chu Midiante chung ah phuba laksak inla, ziazaw chuleh, la hinna tawp ding ahi tai,” ti’n a hil a.

³Tichun, Mosi’n mipite kiang in, “La lak ua mi bang a hem jat gâldo ding ah kithuam in Midiante vado un, Midiante chung ah LALPA lungnatna phuba valau in;

⁴Israelte lak ah phung tin ah kipat in mi sang khat chiat la sawl ding uh ahi,” a ti’n.

⁵Tichun, Israel a sâng têl ah simte lak ah, phung tin ah kipat mi sangkhat chiat a têldok un, mi sîng khat leh sang nite chu gâldo dingin a kisiam tau a.

⁶Mosi’n phung tin ah mi sang khat chiat kitêldokte chu, thiampu Eleazar chapa Phinehas tawh, mun thiangtho ah ûm leh bêlte chu tawh, a khut ah pengkul mût ding choisak in, gâlmun lam in a sawl tai.

⁷LALPA chun Mosi kiang ah thu a piak gual in, Midiante chu a vado tau ah; pawsal zosia a vathat gam tau hi.

⁸Midiante tam tak a thalup bân un, Midiante lal panga a thalupteu chu: Evi, Rekem, Zur, Hur tawh Reba a hiu ah; chuleh, Beor chapa Balaam le chemjam in a satlum tau a.

⁹Israelte chun Midian numeite leh a chasenteu chu sal in a pui tau a; chuleh, a bawngchalteu leh a belam hon zosiau leh, a nei thil zosiau chu gâllâk in a chomgam tau a.

¹⁰A chênnau khawpi zosia tawh, a giamun zosiau mei in a hâltum un,

¹¹ahi’n la, a nei zosiau tawh, a mihing leh gancha zosia gâllâk in a kipuak mang tau hi.

¹²Chuleh, a salmat zosiau tawh, a gâllâk zosiau chu Mosi tawh, thiampu Eleazar tawh, Israel mipite kiang lam in, Jordan lui pang ah Moab phâicham ah, Jeriko khawpi kiang ah chun a hun paw tung tau hi.

¹³Mosi tawh, thiampu Eleazar tawh, mipite hotu zosia chu giamun pawlam ah amau haw lamtua dingin a la chiau a.

¹⁴Mosi chu sepai lamkaite, a sangtêl chung ah thuneite, a zatêl chung ah thuneite leh gâldona kipat hung kile’kitte zosia chung in a lungna ma ma ta’n.

¹⁵Mosi’n a kiang un: “Numei zosia la hinghoi ui maw?

¹⁶Balaam thuhilna dungzui in, zia numeite haw ziak ah hin Israelte chun Peor chungchâng ah khan LALPA jakda lam tak ah sual a la bawl uh khan, LALPA mipite chung ah thi’na hisia a la tung ahi.

¹⁷Ziaziakchun, naupangte lak ah pawsal zosia that unla, numei lak ah pawsal tawh a la lum khawm kha taphot chule that ngâl un.

¹⁸Himaleh, nungak lak ah pawsal tawh lum khawm kha nai lo taphot chu nang uh â dingin hawi tau in.

¹⁹Giamun pawlam ah ni sagi giakdok un; la lak ua mi that kha leh mithiluang sukha taphot chu, a nithum ni leh a ni sagi ni’ chun, la salmatteu tawh la kihi’thian ding uh ahi.

²⁰La nîk leh puan zosiau, savun ah kisiam zosia, kêl mul ah kisiam zosia tawh thing ah kisiam zosia chu la hithian ding uh ahi,” a ti tai.

²¹Chun, thiampu Eleazar in gâl ah kuandok sepaite kiang ah chun: “Zia hi Mosi kiang ah LALPA dan thuthung chu ahi:

²²Sana, dangka, sum-eng, thîk, langva leh hâkngêk;

²³mei in a kâtmang ziang thei lo taphot chu, mei ah hâl un la a thiang hi’ngâl in ah. Ahi’n la, mei in a kât tum thei zosia chu a hi’thianthona dingin tui ah la sawp ding uh ahi.

²⁴A ni sagi tin ni’ chun la puan uh sawp in la tiu in; tichun, thiang ta’n lau; ziazaw chuleh giamun sung in lût thei ta’n lau,” a tia.

²⁵Chun, LALPA chun Mosi kiang in:

²⁶“Nang tawh, thiampu Eleazar tawh, mipite lak ah phung tin ah luchangte chun gâllâk zosia, mihing hileh, gancha hileh, a leng un vasim tiam un.

²⁷Gâllâk zosia chu pawl ni in khen unla; gâldo ah kuandokte chan ding tawh, mipite chan kihopsak un.

²⁸Gâldo ah kua’n sepaite chan lak ah kipat in LALPA chanvo ding se’khen sak unla; mihing hileh, bawngchal, sabiltung, belam leh kêlcha, lak ah kipat za nga jel lak ah kipat in pakhat chiat a chi dungzui un la piak daw ding uh ahi.

²⁹A chan lak ua a kim khat chu la’n la, LALPA kiang ah thillat ding in thiampu Eleazar la piak ding uh ahi.

³⁰Himaleh, Israelte chan lak ah kipat in mihing hileh, bawngte, sabiltungte, belamte leh kêlte lak ah kipat in sawmnga lak ah pakhat chiat la lakdawu ah, LALPA biakbûk ah nasêm Levi phung ah mite la piak ding uh ahi,” a tia.

³¹Chun, Mosi tawh thiampu Eleazar chun, LALPA chun Mosi kiang ah thu a piak gual chun a bawl tau a.

³²Sepaite gâllâk chom khawm zosia chu: belam nuai guk sîng sagi leh sang nga;

³³bawngchal sîng sagi leh sang ni;

³⁴sabiltung sîng guk leh sang khat;

³⁵pawsal tawh lum khawm kha nai lo numei sîng thum leh sang ni a hiu a.

³⁶Gâllâk lak ah a kimkhat, gâldo ah kuandok sepaite chan chu, belam tawh kêlcha a kigawm in, nuai thum sîng thum sâng sagi leh za nga ahi;

³⁷chuleh, LALPA chantum ding ah belam leh kêlcha a piak cheng uh chu za guk sawmsagi leh nga ahi.

³⁸Bawngchal sîng thum leh sang guk lak ah LALPA chantum chu sawmsagi leh ni ahi.

³⁹Sabiltung sîng thum leh za nga lak ah LALPA chantum chu sawmguk leh khat ahi.

⁴⁰Galhing kiman chu sîng khat leh sang nga ahi’n; ziate lak ah kipat LALPA chantum chu sawmthum leh ni ahi.

⁴¹LALPA‘n thu a piak gual in, Mosi’n le LALPA â ding zosia chu, LALPA kiang ah lat dingin thiampu Eleazar kiang in a pedok tai.

⁴²A kim khat dang, Israelte chan ding ah sepaite tawh Mosi’n a kihop sak cheng,

⁴³mipite chan ding ah kipia a kimkhat chu, belam tawh kêlcha kigawm in nuai thum sîng thum leh sâng sagi leh za nga ahi’n;

⁴⁴bawngchal sîng thum leh sâng sagi tawh;

⁴⁵sabiltung sîng thum leh za nga tawh,

⁴⁶gâlhing kiman sîng khat leh sang guk a hiu a.

⁴⁷Israel mipite chan ding ah a kimkhat kipedok cheng lak ah kipat hin, Mosi’n mihing hileh, gancha hileh, sawmnga jel ah pakhat chiat ladok in, LALPA chun Mosi thu a piak gual in, LALPA biakbûk ah nasêm Levi phung ah mite a pe tai.

⁴⁸Chuleh, sepai, a sang têl chung ah thuneite leh a za têl chung ah thuneite chu Mosi kiang in a hung khawm un;

⁴⁹a kiang in: “La suak kêi uh hin, ka thunuai ua sepai umte chiat ka sim uh leh, a lak ua khat chale a mangthai a um puau hi.

⁵⁰Chuleh, LALPA kiang ah ka thillat ding un, ka thil hun lakkhawmteu chiat uh: sana kicheinate, khi’te, chaute, khutsebite, bilbate, khivuite zosia, LALPA kiang ah ka hinnau thoidamna dingin ka hun chawi uh ahi,” a hung tiu a.

⁵¹Mosi tawh thiampu Eleazar in sana ah thil kibawl zosia chu a lakhawm tau a.

⁵²Sepai, a sâng têl chung ah thuneite leh a za têl chung ah thuneite zosia’n, LALPA kiang ah piak ding ah a lat uh sana zosia chu shekel sîng khat sang guk za sagi leh sawmnga a ting a.

⁵³(Galdo ah kuante chun a gâllâk zosiau chu amau â ding chiat ah a la kichomkhawm uh a la hita ngâl a.)

⁵⁴Tichun, Mosi leh thiampu Eleazar chun, sepai a sâng têl chung ah thuneite leh, a za têl chung ah thuneite sana hun choikhawm zosia chu a lakhawm un, LALPA kiang ah Israelte hetzingna dingin kikhopna biakbûk ah a paw lut tau a.