Read Vaiphei KISIMNA LEKHABU 32 Bible Online

KISIMNA LEKHABU 32 - Vaiphei bible

KISIMNA LEKHABU 32

¹Chun, Reuben chate leh Gad chate chun gancha a hau ta ma mau ah. Jazer gam leh Gilead gamte chu a mu phât un, ganchate â ding ah gampha ma ma ahi ti a he tau a;

²tichun, Gad chate leh Reuben chate chu Mosi tawh thiampu Eleazar tawh, mipi luchangte kiang ah hung in, zia gual hin a hung gen tau a:

³“Ataroth, Dibon, Jazer, Mimrah, Heshbon, Elealeh, Sebam, Nebo leh Be-on;

⁴LALPA chun Israel mipite mit mu ah a himangna gamte hi, gan vulna ding chi ahi’n; chuleh, la suakte, kei uh hin gancha ka hau un,” ti in.

⁵Zia gual hin a genzawm nalai ua: “La mitmuu ah doisakna ka chan uh chun, zia gamte hi ka chênna ding un, la suakte hi ei pia mai tau in; Jordan lui gâl langkhat lam vang ei pui kai dâ mai un,” ti in.

⁶Himaleh, Mosi chun Gad chate leh Reuben chate kiang ah chun: La unauteu gâldo ah kua’n in, nang uh zia’ hin chu hiat hiat ziang ding la hiu em?

⁷LALPA chun Israelte a piakna ding gam a lûtna ding un, bang ding ah a lungthim uh hi’dawilok ding la hiu em?

⁸La pateu inle, Kadesh barnea mun ah kipat gam entha ding ah ka sawl lai ah khan, zia gual hin a la bawl tau a.

⁹Wadi Eshcol mun tiang a chia to lai un, a gam chu a vamu tau a; LALPA‘n a piakna ding gam ah a lûtna ding un, Israelte lungthim a la sudawilok tau a.

¹⁰Zia ni chun a chung un LALPA lungnatna a kuangjak ta’n, a kiang un zia gual hin a kihâksial tai:

¹¹“A lungthim zosiau ah ei zui lo ziak un, Aigupta gam ah kipat hung pawtdok, kum sawmni ah kipat a chung lam zosia’n Abraham, Isak leh Jakob kiang ah piak ding ah ka la kitiamna gam chu lût lo ding a hiu —

¹²Keniz mi, Jephuneh chapa Kaleb tawh, Nun chapa Joshua tilo ngâl; amaute ni bep hin a lungthim zosiau ah LALPA a zui ziak un! ti’n

¹³Chun, LALPA lungnatna Israelte chung in a kuangjak ta’n; LALPA mittung lo ah thil phalo bawlte, a khang uh a beigam masia, gamthip ah kum sawmli sung a vâk vaisak tai.

¹⁴Chuleh, tu’hin Israelte chung ah LALPA lungnatna belap dingin, la pateu dungsûn ah nanghaw migilo haw ma ma hi la hung piang un!

¹⁵Ama la kiheimangsan uh leh, zia mipite hi gamthip ah nusia in tin; zia mipite zosia hi sumangthai ding la hiu,” ti in.

¹⁶Ziaphatchun, a hun nai un, a kiang un: “Ka ganchateu â dingin gan Inte sa’ng ka tiu in, ka chasenteu â dingin khawpite sa’ng ka tiu in,

¹⁷ahi’n, kei uh le gâlvan ah kithuam in, Israelte amau chênna ding mun chiat a tun masiau gâl matawng in pang ing kau. Zia kâl ah chun, ka chasenteu hi a gam ah chêngte ah kipat a bittheina ding un khawpi kul sung in a la chêngleu ka tiu ahi.

¹⁸Israelte zosia’n a chan ding chiat uh a chan suak masiau, ka In lam un kile’kit pua’ng kau.

¹⁹Kei un Jordan luigâl sualam pang ka lua tâk ziak un, amau tawh Jordan luigâl lam leh a langkhat lam chule lua khawm diak lo ding ka hiu,” a tiu a.

²⁰Tichun, Mosi’n a kiang un: “Gâldo ding ah LALPA ma ah gâlvan ah la kithuam ua,

²¹a ma-âng ah kipat a gâlte zosia a nawmang masia, nang uh gâlvan ah kithuam zosia’n LALPA ma ah Jordan luigâl la kâi chiat nâk uh chun,

²²a gam chu LALPA‘n a zaw dim dem phat leh, maw chang lo in kile’kit ta’n lau; ziaphat chuleh, zia gam hi LALPA ma ah nang uh lua ding hita’n a.

²³Himaleh, zia gual ah chu la bawl lo uh leh, LALPA chung ah thil bawl khial hi’n lau; tichun, la gitlonau chun hun hawldok ngei ngei ding ahi ti he tau in.

²⁴La chasenteu â dingin khawpi siam unla, la gancha honteu huang ding siam piak un; chuleh, la thutiam dungzui un bawl ta un,” a ti’n.

²⁵Ziaphatchun, Gad chate leh Reuben chate chun, Mosi kiang in: “Ka puu in thu lei piak gual gual in la suakte hin bawl ing kau.

²⁶Ka naupangteu, ka jiteu, ka gan-gualteu leh ka bawng honteu chu Gilead gam ah khawpite ah hin a la um uh hen la;

²⁷ahi’n, ka puu in lei hil gual in, la suakte gâlvan ah kithuam zosia gâlkâi in, gâldo ah hung pang ding ka hiu,” a tiu a.

²⁸Tichun, thiampu Eleazar tawh, Nun chapa Joshua tawh, Israel phung tin ah hotute kiang ah chun Mosi’n thu a pia’n.

²⁹A kiang un Mosi’n thu a gen a: “Gad chate leh Reuben chate, gâlvan ah kithuam zosia hin, LALPA ma ah gâldo ah a hung kuan ua, nang uh tawh Jordan lui gâl lam a hung kâi ua, la mau ah gamte chu zawsak ah la hung um phat uh leh, Gilead gam hi a chênna ding ua la piak ding uh ahi;

³⁰ahi’n la, gâlvan ah kithuam lo ah, Jordan lui gâl a hung kaipi lo uh leh vang, Kanaan gam ah la lak ua gam a chan ding uh ahi,” a tia.

³¹Gad chate leh Reuben chate chun a dawnhuu ah: “LALPA‘n a suakte kiang ah a gen gual gual in bawl ding ka hiu.

³²LALPA ma ah gâldo dingin, Kanaan gam ah gâlvan ah kithuam in, Jordan lui gâl lam ah hung lût ing kau; ahi’n, ka chênna ding uh chu Jordan lui gâl langkhat lam hizing hen,” a tiu a.

³³Chuleh, Mosi chun Gad chate leh Reuben chate leh Joseph chate Manasseh phung ah mi a kimkhatte kiang in, Amor lal Sihon lenggam tawh, Bashan Leng Og lenggamte chu a gam sung pumpi tawh, a sung ah khawpi um zosia tawh, a gam kîmvêl zosia pum in a petai.

³⁴Gad chate’n zia khawpi cheng hi a tung ding kit tau a: Dibon, Ataroth, Aroer;

³⁵Ataroth-shophan, Jazer, Jogbehah,

³⁶Beth-nimrah tawh Beth-haran kul in a ûm un, belam huangte le a bawl ui.

³⁷Chuleh, Reuben chate’n, Heshbon, Elealah, Kiriathaim,

³⁸Nebo tawh Baal-meon tawh, (khawmin khenkhatte theng in) Sibmahte hi a tungding kit tau ah; a khawpi tundin kitteu chu a min a phuak chiat un.

³⁹Manasseh chapa Makir suante chu a kuan un, Gilead a vala tau a; zia tak ah chêng Amorte chu a suandok tau a;

⁴⁰tichun, Manasseh chapa Makir kiang in Mosi’n zia gam chu a pia ta’n, a chêngden tau hi.

⁴¹Manasseh chapa Jair le a kuan ah, zia vêl ah khawpineu deu deu te chu a vala’n; ziate chu Havvath-Jair (zia chu, “Jair Khua,” ti’na ahi) a sak tai.

⁴²Chun, Nobah le a kuan ah, Kenath khua leh a kiang ah khawpineu cha chate chu a vala ta’n; tichun, a khawmin dingin ama min ma ma Nobah a sak tai.