Read Vaiphei KISIMNA LEKHABU 33 Bible Online

KISIMNA LEKHABU 33 - Vaiphei bible

KISIMNA LEKHABU 33

¹Mosi tawh Aron mapuina’n, Israelte chu Aigupta gam ah kipat in sepai hon gual in a hung pawtdok un, a chia dan uh chu zia gual hi ahi:

²LALPA thupiak in, Mosi’n a kipatdawu ah kipat a chia dan uh leh, a giamunteu chu a kizom in a la zikdok pek ah; a hung kipatdawu ah kipat a chia dan uh chu zia gual hi ahi:

³Tha masa pen, a ni sawm leh nga tin ni chun Rameses in a kipandok un; Chiakân Kût zaw jing in, Israelte chu Aiguptate zosia mit mu in hangsan tak in a kipandok tau hi.

⁴Aigupta mite zosia chu vang a chapa upa pen chiat uh, LALPA‘n amau lak ah a thalup zosia vui in a buai ma mau ah. A pathianteu chung natiang in LALPA‘n vai a hawm a.

⁵Chutichun, Israelte chu Rameses ah kipandok in, Sukkoth in a giak malam un.

⁶Sukkoth ah kipandok in, gamthip chin ah Etham mun in a giak tau a.

⁷Etham ah kipandok in, Baal-zephon lam nga, Pihahiroth lamkâi in a kihei kit un, Migdol majawn in a giak tau a.

⁸Pihahiroth ah kipandok in, Tuipi San gâlkai in, Shur gamthip lam zuan in, Etham gamthip ah ni thum lam a jawt nung un, Marah mun in a giak tau a.

⁹Marah ah kipandok in, Elim mun a tung un; Elim mun ah chun tuihing nâk, sawm leh ni tawh, tûm thing sawmsagi umna mun in a giak tau a.

¹⁰Elim mun ah kipandok in, Tuipi San pang in a giak malam tau a.

¹¹Tuipi San ah kipandok in, Sin gamthip in a giak tau a.

¹²Sin gamthip ah kipandok in, Dophkah mun in a giak tau a.

¹³Dophkah mun ah kipandok in, Alush mun in a giak tau a.

¹⁴Alush mun ah kipandok in, mipite dawn ding tui um lo’na mun Rephidim in a giak tau a.

¹⁵Rephidim ah kipandok in, Sinai gamthip in a giak tau a.

¹⁶Sinai gamthip ah kipandok in, Kibroth-hataavah in a giak tau a.

¹⁷Kibroth-hataavah ah kipandok in, Hazeroth in a giak tau a.

¹⁸Hazeroth ah kipandok in, Rithmah in a giak tau a.

¹⁹Rithmah ah kipandok in, Rimon-perez in a giak tau a.

²⁰Rimon-perez ah kipandok in, Libnah in a giak tau a.

²¹Libnah ah kipandok in, Rissah in a giak tau a.

²²Rissah ah kipandok in, Kehelathah in a giak tau a.

²³Kehelathah ah kipandok in, Shepher tâng in a giak tau a.

²⁴Shepher tâng ah kipandok in, Haradah mun in a giak tau a.

²⁵Haradah ah kipandok in, Makheloth in a giak tau a.

²⁶Makheloth ah kipandok in, Tahath in a giak tau a.

²⁷Tahath ah kipandok in, Terah in a giak tau a.

²⁸Terah ah kipandok in Mithkah in a giak tau a.

²⁹Mithkah ah kipandok in, Hashmonah in a giak tau a.

³⁰Hashmonah ah kipandok in, Moseroth in a giak tau a.

³¹Moseroth ah kipandok in, Benejaakan in a giak tau a.

³²Benejaakan ah kipandok in, Horhaggid-gad in a giak tau a.

³³Horhaggid-gad ah kipandok in, Jotbathah in a giak tau a.

³⁴Jotbathah ah kipandok in, Abronath in a giak tau a.

³⁵Abronath ah kipandok in, Ezion-geber in a giak tau a.

³⁶Ezion-geber ah kipandok in, Zin gamthip in a giak malam un (zia mun chu Kadesh ahi.)

³⁷Kadesh ah kipandok in, Edom gamgi jul ah Hor tâng in a giak tau hi.

³⁸Chun, LALPA thupiak in thiampu Aron chu Hor tâng in a kal to ah; Aigupta gam ah kipat Israelte a hung pawtnau, kum sawmli tin kum ah, tha ngana, a ni khat ni chun, zia mun ah chun a thi tai.

³⁹Hor tâng ah Aron a thi in, kum za leh sawmni leh thum mi ahi.

⁴⁰Kanaan gam ah Negeb mun ah chêng, Arad lengpa Kanaan mi chun, Israelte hung thu chu a he tai.

⁴¹Hor tâng ah kipandok in, Zalmonah in a giak tau a.

⁴²Zalmonah ah kipandok in, Punon in a giak tau a.

⁴³Punon ah kipandok in, Oboth in a giak tau a.

⁴⁴Oboth ah kipandok in, Moab gam sung ah Iye-abarim in a giak tau a.

⁴⁵Iyim ah kipandok in, Dibongad in a giak tau a.

⁴⁶Dibongad ah kipandok in, Almon-diblathaim in a giak tau a.

⁴⁷Almon-diblathaim ah kipandok in, Nebo zawn ah, Abarim tânggam in a giak tau a.

⁴⁸Abarim tânggam ah kipandok in, Jordan gâl ah Jeriko zawn tak ah Moab phâicham in a giak tau a.

⁴⁹Jordan lui pang ah Beth-Jeshimoth ah kipat Moab phâicham Abel-shittim tiang in a giak malam pek ui.

⁵⁰Jeriko gâl ah, Jordan lui pang Moab phâicham ah chun, Mosi kiang ah LALPA‘n zia gual hin a gen a:

⁵¹Israelte kiang ah zia gual hin gen in: Jordan lui gâl kâi ah, Kanaan gam la lût phat uh leh,

⁵²la mau ah kipat in a gam ah chêngte zosia nawdok unla, a suang milimteu la hi’siat ua, a milim siamteu le la hi’siat ua, a kithoinau munsangteu chule la khet chim ding uh ahi.

⁵³A gam uh la lâkpiak ua, la suandaw ding uh ahi; a gam uh chu nang uh â dingin ka hun peta ngâl a.

⁵⁴A gam chu a phung dungzui ah a chan ding uh, phunsân in hop piak inla; a tamte gam lian deu pia’n la, a tawmte gam neu deu pia’n; kua hileh, phunsânna a chukna mun chiat chu amau lua ding hi’ngâl hen; a Inkuante’n a pateu phung dungzui chiat un hop piak hiu hen.

⁵⁵Himaleh, a gam ah a la chêngsate chu la masang ua la nawdaw lo ua leh vang, la hinghoi zosiau chu la mit sung ua ki’dak um leh la taksau ah ling lût tawhbang hung hi’n au; la luanau gam ah hin hun subuai zing ding a hiu.

⁵⁶Chuleh, amau chung ah bawl ka guat gual in nang uh chung ah hun bawl ziang ding ka hi, ti in.