Read Vaiphei KISIMNA LEKHABU 34 Bible Online

KISIMNA LEKHABU 34 - Vaiphei bible

KISIMNA LEKHABU 34

¹Mosi kiang in LALPA‘n zia gual hin a gen a:

²Israelte chu thu pia’n la, chuleh, a kiang un: Kanaan gam chu la lût phat uh leh (la gamgi dungzui ah Kanaan gam la luana ding uh chu,)

³simlam ah la gamgi ding uh chu: Zin gamthip ah kipat Edom gamgi jul tiang hi’ntin. Simlam ah la gamgiu sualam mong ding chu Tuipi Thi hi’n a;

⁴la gamgiu chu simlam pang ah hung kithung pek in, Akrabbim kaltona lam tiang ah chia to in, Zin gam hawtheng in, a simlam gamgi chu Kadesh-barne ahi’n. Zia kipat chun Hazar-addar lam ah kithung pek in, Azmon hawtheng pek intin;

⁵Azmon ah kipat gamgi kihei kawi kit in, Aigupta gam ah dil tiang ah chia pek in, Tuipi chan hi’n a.

⁶La tumlam gamgi ding un Tuipi Lian luipangte chu mang in la tiu in; zia chu tumlam kâi ah la gamgi ding uh hi’n a.

⁷Chuleh, mallam kâi ah la gamgi dingteu chu: Tuipi Lian ah kipat in Hor tâng chan in thung pek unla;

⁸Hor tâng ah kipat in Lebo-hamath tiang in thung unla, la gamgi paw lam ding uh chu Zedad tiang in thung unla;

⁹chuleh, Ziphron lam in kithung kit intin, Hazar-enan sun ding ahi; zia hi mallam kâi ah la gamgi ding uh chu hi hen.

¹⁰Sualam kâi ah la gamgi ding un Hazar-enan ah kipat in Sepham tiang ah la tepte ding uh ahi;

¹¹zia gamgi chu Sepham ah kipat in Ain sualam kâi ah um Riblah tiang in kithung suk pek intin; chuleh, gamgi chu kithung pek in Chinnereth Dil sualam pang ah kenliang tiang in thun hi’ntin;

¹²zia gamgi chun Jordan lui zui suk pek in, Tuipi Thi tiang in kithung in a. Zia gamgi’n a kualkhumna gam zosia chu la gam ding uh chu hita’n a.

¹³Chun, Mosi chun Israel nam kua leh a kimkhatte kiang in, âisân dungzui in a gam luana ding chiat uh chu LALPA‘n thu a piak ahi tai.

¹⁴Reuben chate tawh Gad chate’n, Manasseh phung ah mi kimkhatte tawh a chênna ding uh gam chu a chan tâk ziak un;

¹⁵phung ni leh a kimkhatte chun, Jeriko gâl ah Jordan lui gâl langkhat lam, sualam kâi ah a gam chan ding uh a kilâk tâk ziak un, ti in.

¹⁶LALPA chun Mosi kiang in zia gual hin a gen a:

¹⁷La go ding uh gam hun khen piak dingte chu ziate hi a hiu: thiampu Eleazar tawh, Nun chapa Joshua teni hi.

¹⁸La goluana ding gam uh hawm tuak dingin phung tin ah kipat in luchang khat chiat la têldok ding uh ahi.

¹⁹Phung tin ah kipat luchang a teldokteu min chu: Judah phung ah kipat in, Jephuneh chapa Kaleb ahi.

²⁰Simeon phung ah kipat in, Ammihud chapa Shemuel ahi.

²¹Benjamin phung ah kipat in, Chislon chapa Elidad ahi.

²²Dan phung ah kipat in, Jogli chapa Bukki ahi.

²³Joseph Inkuante lak ah kipat in: Manasseh phung ah luchang dingin, Ephod chapa Hanniel ahi;

²⁴Ephraim phung ah kipat luchang dingin, Shiphtan chapa Kemuel ahi.

²⁵Zebulun phung ah luchang dingin, Parnakh chapa Eliazaphan ahi.

²⁶Issakhar phung ah luchang dingin, Azzan chapa Paltiel ahi.

²⁷Asher phung ah luchang dingin, Shelomi chapa Ahihud ahi.

²⁸Naphtali phung ah luchang dingin, Ammihub chapa Pedahel ahi.

²⁹Zia cheng hi Israelte luana ding ah Kanaan gam hawm piak ding ah LALPA‘n a guatdawte chu a hiu.