Read Vaiphei KISIMNA LEKHABU 35 Bible Online

KISIMNA LEKHABU 35 - Vaiphei bible

KISIMNA LEKHABU 35

¹Jordan gâl ah Moab phâicham, Jeriko zawn ah chun LALPA chun Mosi kiang in zia gual hin a gen a:

²“Israelte chun a chênnau gam chiat ah Levite chênna ding khua a piak chiat ding uh ahi ti thu pia’n la; chuleh, a khawpi kîmvêl ah gamte chule Levite gancha tatna ding ah la piak ding uh ahi.

³Khawpite chu a chênna ding uh hi’ntin, khawpi kîmvêlte chu a bawng honteu, a ganvul zosiau leh a ganchateu zosia tatna ding hi hen.

⁴Khawpite kîmvêl ah Levite kiang ah la gam piak ding uh chu: khawpi kulbâng ah kipat in tong sang khat chiat ah sau hi hen.

⁵Khawpi kul pawlam ah kipat in sualam kâi tong sang ni te’ unla, simlam kâi le tong sang ni, tumlam kâi le tong sang ni, mallam kâi le tong sang ni ma te’ unla; a lailung in a khawpiu chu um in a; zia gual hin a khawpiteu kîmvêl un a ganchateu tatna ding gam la piak ding uh ahi,” a tia.

⁶Chuleh, Levite â ding ah khawpi la piakteu lak ah chun, bitna khua pagukte chule a huap khawm ding ahi; zia khuate ah chun chanpal ah mi thatkhate tailutna ding ah la phalnau mun hi hen la; ziate bân ah hin khawpi sawmli leh pani le la piakbe ding uh ahi.

⁷Levite â ding ah la piak uh chu khawpi sawmli leh giat tawh, a gantatna ding chiat uh chu tawh hita’n a.

⁸Chuleh, Israelte gam luana lak ah kipat khawpi la piakdaw ding dan uh chu: nam liante ah kipat in tam deu, nam neute ah kipat in tawmdeu hi’ntin; a chan uh a let leh a neu kigûn chiat in Levite chan ding khawpi chu la hopsak ding uh ahi, ti in.

⁹LALPA‘n zia gual hin Mosi kiang in a gen a:

¹⁰Israelte kiang ah zia gual hin gen in: Jordan lui gâl kâi ah, Kanaan gam la hung lût phat uh leh,

¹¹khawpi khenkhat chu bitna khua dingin guat unla; kua’nle chanpal ah mi that a um chun, zia khua chun a tai lut sek ding uh ahi.

¹²Zia khuate chu phuba lâk gawte ah kipat suachâtna ding ah khawpi hiding ah la guat ding uh ahi; kua hitaleh, chanpal ah mi that kha a um chun, a chungchâng thu mipite’n a ngaitua masang ua humbit ahi’na ding mun uh hiding ahi.

¹³Khawpi pagukte chu nanghaw â ding ah bitna khawpi hiding ah la guat ding uh ahi;

¹⁴Jordan lui gâl lam ah khawpi pathum, Kanaan gam lam ah khawpi pathum bitna khua hiding in la guat ding uh ahi.

¹⁵Zia khawpi pagukte hi Israelte â ding leh gam dang mi a chêngdente leh a châm mai mai nalaite â ding ah taichâkna khawpi hi’ntin; kuale chanpal ah mi that zosia tailûtna ding hi’n a.

¹⁶Ahi’n, kua a hem khat in thîk matchâk ah mi dang khat a vok in thi ziang taleh, a vawpa chu tualthat ahi; mi thatpa chu thalup mai ding ahi.

¹⁷Ahiloleh, kua a hem khat in suangtum mang in mi dang khat sep hen la thi taleh, mi sep pa chu tualthat ahi; zia gual ah mi thatpa chu thalup mai ding ahi.

¹⁸Ahiloleh, kua a hem khat in thingbong khat in mi dang khat vua hen la thi taleh, mi vaw’pa chu tualthat ahi; mithatpa chu thalup mai ding ahi.

¹⁹Thisan phuba la ding chu mithatpa that ah pang pen pen chu ahi; mithatpa chu a mu phât phat leh, ama’nle a thalup ngâl ding ahi.

²⁰Zia gual ma chun, a muda ziak a hem, ahiloleh, a chân-gûk ah, suang a hem leh bang a hem khat ah a se’khak ah thi ahi em leh,

²¹a huat ziak ah a khuttum ah a suk a hem ah thi ahi chun, a khuttum ah mi supa chu thalup ngei ngei ding ahi; zia mihing chu tualthat ahi ngâl ah; phuba la dingpa chun tualthatpa chu a mu phat leh a thalup mai ding ahi.

²²Himaleh, huatna ziak le hilo ah, a chup khak a hem, a chânggu le hilo ah, thil a mawkse leh a se’khâk a hem,

²³ahiloleh, mi thitheina ding khop ah suang khat ah mulopi a se’khâk ah thi hitaleh, amapa chu a mêlma le hilo ah, suksiat ding a guat mawng le hi diak lo ah, a hi’lup khâk pal chun,

²⁴a khut thapa tawh a thuaktu kikâl chu, dan umsa dungzui ah mipite’n thutanna a bawl mai ding uh ahi.

²⁵Chuleh, mipite chun thisan phuba la dingpa khut ah kipat chun mithatpa chu hukdok in au. Ziaphat chuleh, mipite chun mithatpa chu bitna khawpi ma ma ah chun thak tung kit uh hen. Sathau thiangtho nu’ ah um thiampu lianpen a thi masia, mithatpa chu zia tak ah chun a um den ding ahi tai.

²⁶Himaleh, mi thatpa chu bitna khawpi pawlam ah a pawt daw khâk him him ah,

²⁷thisan phuba la dingpa’n ama chu bitna khawpi huang pawlam ah mu tahen la, a la that ziang taleh, zia thisan ziak ah chun a thatpa chu maw chang lo ding ahi.

²⁸Thiampu lianpen thi masia bitna khawpi ah chun tualthatpa chu a um tei tei ding ahi ngâl a; ahi’n, thiampu lianpen thi’nung leh vang mithatpa chu a In lam ah chia kit thei ta’n a.

²⁹Zia dante hi nang uh â ding a, a khang a khang ah, la chênnau gam tin ah, la thutanna ding dan uh thuthung chu ahi.

³⁰Kua’nle mi a thalup chun, a hiatpite kamsuak dungzui in tualthatpa chu thalup ding ahi; hiatpitu mi pakhat bep ziakin kuama thalup hipua’n a.

³¹Zia ban ah chun, tualthana ziak ah thalup ah um dingpa hukdawna dingin bangma la bawl lo ding ahi; tualthat chu thalup ngei ngei ding ahi ngâl a.

³²Chuleh, thiampu lianpen thi masangsia tualthatpa chu bitna khawpi nusia ah, a In lam ah a kile’kit theina ding ah bangma la bawl lo ding ahi.

³³La chênnau gam hi subuak kiu in; thisan ziakin gam hi sukbuak ah um sek ahi ngâl ah; a gam ah thisan kisua tasa chu, thisan sua’pa thisan sua’na bep lo ngâl chun bangma’n a suthiang thei paw’ngâl a.

³⁴La chênna gam uh, keima le ka chênna gam hi subuak kiu in; keima LALPA hi Israelte lak in ka chêng ngâl ah, ti’n a gen a.