Read Vaiphei KISIMNA LEKHABU 36 Bible Online

KISIMNA LEKHABU 36 - Vaiphei bible

KISIMNA LEKHABU 36

¹Joseph suante lak ah Manasseh chapa, Makir chapa, Gilead chapate Inkuan lak ah pa pen chiat in, Mosi tawh, mipi puitute tawh, Israel phung tin ah pa pente kiang ah hung in, zia gual hin a hung gen tau a:

²Ka puu, nangma hi LALPA chun Israelte’n a luana ding un gam chu âisân ah hawm tuak dingin thu a hun pia ta’n; chuleh, ka suapipau Zelophehad gochan chu a chanute pia ding in LALPA‘n ka puu nang chu thu a la pia ta ahi, a tiu a.

³Himaleh, amau hin Israelte lak ah phung chuam mi pawsal kua a hem khat kichenpi taleu, amau goluana gamte chu ka pateu gochan lak ah kipat in kiladok ta’n tin; a pawsal neinau phungte gochan gam chu tawh gopkhawm hung hita ding ahi’n; chutileh, zia chu kei haw gochan lak ah kipat kiladok hiding a hita’n;

⁴chuleh, Israel chate Jubili kum a ti’n tak leh, zia chanute goluana chu a pawsal neinateu gochan tawh gawpkhawm hung hita’n tin; tichun, amau goluate chu ka pateu phung ah gochan lak ah kipat in lakdaw hita ding ahi, ti in.

⁵LALPA‘n a gen dungzui in Mosi chun Israelte chu thu a pia’n: “Joseph suante thugen chu a dik ma ma hi.

⁶LALPA chun Zelophehad chanute chungchâng ah chun zia gual hin thu ei pia ahi: ‘Amau in pha a sak chiat uh pawsal nei uh hen; ahi’n, a pawsal dingteu chu a pau phung leh châng mi khel khel hiu hen la;

⁷chutileh, Israelte gochan chiat chu phung khat ah kipat phung chuam in lasawn thei pua’n au; Israel mi tin in a pu leh a pateu go chiat uh a lua zing ding uh ahi ngâl a.

⁸Israelte zosia’n a pu leh a pateu gam chiat a ngâk thei ding uh ahi ziakin, Israelte lak ah kua phung hileh, a pate golua ah pang chanu taphot in, a pateu phung sung ah mi pawsal in a nei tei tei ding uh ahi.

⁹Phung khat â chu phung dang in ngâk thei pua’n a; Israelte lakah phung tin in amau gam a ki-ngâk chiat ding uh ahi ngâl a,’ ti’n hil in,” a ti’n.

¹⁰LALPA chun Mosi kiang ah thu a piak gual chun Zelophehad chanute chunle a bawl tau a.

¹¹Zelophehad chanu Mahlah, Tirzah, Hoglah, Milkah leh Noah te hin a pau suapite chapa chiat a kichenpi tau a.

¹²Amau chun Joseph chapa Manasseh phung sung ah mi ngen pawsal in a nei tâk ziak un, a pau gochan zosia le amau phung sung ngen in a um zing tai.

¹³Ziate hi LALPA chun Israelte â ding ah a thupiak leh a dan thu guatte, Moab phâicham, Jordan lui pang ah, Jeriko khaw zawn ah Mosi khut ah a piakte chu ahi.