Read Vaiphei KISIMNA LEKHABU 4 Bible Online

KISIMNA LEKHABU 4 - Vaiphei bible

KISIMNA LEKHABU 4

¹LALPA chun Mosi tawh Aron kiang in zia gual hin a gen a:

²Levite lak ah kipat in Kohathte chu a chuam in, a Inkuan dungzui leh a pateu Inkuan dungzui in sim inla,

³kikhopna biakbûk ah nasem thei ding ah piting, kum sawmthum a’pat kum sawmnga kikâl sung ah mi zosia sim in.

⁴Kikhopna biakbûk ah sep leh bawl, na thiangtho pente chu Kohathte sep ding bîk ahi.

⁵Giamun a kichawn ding phat uh leh, Aron tawh a chapate chu lût in, a puanjakte zialdok in, zia puante ah chun thuthunna thing kuang chu a tuam ding uh ahi;

⁶chuleh, tuisai vun pha tak ah a khû sawn zaw phat uh leh puan a dum in khu’khum kit intiu in, a jawnna ding jawlte chule koi in au.

⁷Umpi zing vaithum koina dawkân chu puan a dum khu’khum in, a chung ah kuangte, gimtui hâlna kuangchate, bêlte leh dawnchî thillat haw sunthâkna ding ah bêlte chule koi intiu in; bangtik lai ah le um zing ding vaithum chule a chung in koi uh hen la;

⁸ziate chu puan san khûkhum intiu in, ziate zosia chu tuisai vun in khûkhum intiu in, a jawnna molte chule koi chiat uh hen.

⁹Chuleh, a In salvâk thaumei tawh, a tunna khuam khûna dingin puan a dum la’n tiu in, a thaumei tawh, a châiche tawh, a dawpna kuang tawh a sathau ûm leh bêl zosia chu tuam in, a khu’khum ding uh ahi;

¹⁰a matchâk zosia leh a jawnna ding molte chule a umna ding chiat ah koitup in, tuisai vun in a tuam ding uh ahi.

¹¹Sana mâichâm chung ah puan a dum khat phâ intiu in, zia chu tuisai vun a khu’khum ding uh ahi; a jawnna ding molte chule a tua ding uh ahi.

¹²Mun thiangtho ah kimang sek ûm leh bêl zosia chu la’n tiu in, puan a dum khat in tuam in, tuisai vun khu’khum in, a kijawnna ding ah kisiam lâng chung ah koi ta’n au.

¹³Mâichâm ah meivam luakdok in, zia chu puan san khat khûkhum in au;

¹⁴mâichâm ah matchâk ûm leh bêl zosia, meiâm luakna kuang, meiâm chêna, vutlua, kuangdal leh mâichâm ûm leh bêl zosia hun koikhawm in au; ziate chu tuisai vun khu’khum in, a jawnna ding molte chule hun tua ta’n au.

¹⁵Giamun a kichawn ding phat ua leh, Aron tawh a chapate chun mun thiangtho leh a sung ah matchâk zosia a tuam zaw phat ua leh, Kohath chapate chu a jawn dingin hung intiu in; ahi’n la, thilzek thiangthote chu a sukkhak lo ding uh ahi; achutiloleh, thi ziang kha’n au. Ziate chu kikhopna biakbûk, Kohath chate puak sek dingte chu a hiu.

¹⁶Thiampu Aron chapa Eleazar mawpuakna chu: Thaumei vak ding, sathau gimtui hâl ding, nisi’n an thillat ding, kinu’ ding sathau, mun thiangtho ah biakbûk leh a sung ah matchâk zosia etkol dingte hi ahi.

¹⁷Ziaphatchun, LALPA chun Mosi tawh Aron kiang in zia gual hin a gen ta’n:

¹⁸Levite phung lak ah kipat in Kohathte Inkuan chu la hi’mangthai lo ding uh ahi.

¹⁹Thilzek thiangtho pen a hun nai phat uh leh thi lo ah, a hin zing theina ding un zia gual hin bawl un: Aron tawh a chapate chu lût in, mi tin in a puak ding uh guat piak uh hen.

²⁰Himaleh, Kohathte chu a sung ah lût in, thilzek thiangthote chu a mitlêm unle en kiu hen; achutiloleh, thi kha’n au, ti in.

²¹Ziaphatchun, LALPA chun Mosi tawh Aron kiang in zia gual hin a gen a:

²²Gershon chate chu a pate Inkuan dungzui leh a phung dungzui un sim inla;

²³kikhopna biakbûk ah tawi leh chan ah pang thei ding dawl, kum sawmthum ah kipat kum sawmnga tiang sim inla, a min uh khum in.

²⁴Gershon phungte sep ding chu, tawi leh chan ah pan leh van-gik puak ahi.

²⁵Biakbûk puanjak, kikhopna puan In leh, a chung khû’na tuisai vun leh kikhopna puan In kotkhak ah puanjakte leh,

²⁶a ûmna huang ah khauhual zosia leh, mâichâm leh biakbûk kotpi ah puanjakte leh matchâk zosia a puak ding uh ahi, zia sep leh bawl zosia chu a mawpuaknau ahi.

²⁷Gershonte puak ding, sep leh a bawl bangkim chu Aron tawh a chapate thupiak dungzui in hi’ntin; tichun, a puak ding zosiau chu a hop tuak ding dan uh la hil ding ahi.

²⁸Zia chu Gershon phung ah mite’n kikhopna biakbûk chung chang ah a mawpuaknau, thiampu Aron chapa Ithamar khut nuai ah a sep ding uh chu ahi.

²⁹Chun, Merari phung ah mite chule a pateu Inkuan dungzui chiat un a min uh khum in la tin;

³⁰kikhopna biakbûk ah sêm leh bawl thei ding dawl, kum sawmthum ah kipat kum sawmnga tiang mi zosia a min uh la khum ding ahi.

³¹Kikhopna biakbûk ah a mawpuakna ding uh chu ziate hi ahi: Biakbûk khuam kilem khawmte leh a jawlte, a khuamte, a khuam tunnate leh,

³²a kîmvêl ah a huang ûmna khuam, a hênna khauhualte leh a matchâk zosia ah sep leh bawl ding zosia tawh; chuleh, a puak ding chiat uh a min uh tawh la bul tuak ding ahi.

³³Zia chu Merari phung ah mite zosia’n thiampu Aron chapa Ithamar khut nuai ah, kikhopna biakbûk ah a mawpuaknau chu ahi.

³⁴Tichun, Mosi tawh, Aron tawh, mipi lamkaite chun Kohathte chu, a phung dungzui leh a pateu Inkuan dungzui chiat in a sim tau a;

³⁵kikhopna biakbûk ah sêm leh bawl thei ding chiat, kum sawmthum ah kipat kum sawmnga tiang chu a sim ua;

³⁶a nam dungzui ua a min kikhum zosia chu sang ni za sagi leh sawmnga a hiu a.

³⁷LALPA chun Mosi kiang ah thu a piak dungzui ah, Mosi tawh Aron in kikhopna biakbûk ah sêm leh bawl ah pang thei ding, Kohath phung ah mi a min a khum uh chu zia jat chu a hiu a.

³⁸Gershon phung ah mi, a pateu Inkuan dungzui ah a min kikhumte,

³⁹kikhopna biakbûk ah sêm leh bawl ah pang thei ding dawl, kum sawmthum ah kipat kum sawmnga tiang,

⁴⁰a phung dungzui leh a pateu Inkuan dungzui ah min kikhum zosia chu sang ni za guk leh sawmthum a hiu a.

⁴¹Zia chu Gershon phung ah mite, kikhopna biakbûk ah tawi leh chan a pang thei, LALPA thupiak gual ah Mosi tawh Aron in a min uh a khumte chu a hiu.

⁴²Merari phung ah mite, a pateu Inkuan dungzui ah min a khumteu,

⁴³kikhopna biakbûk ah tawi leh chan ah pang thei, kum sawmthum ah kipat kum sawmnga tiang mite,

⁴⁴a phung dungzui ua min kikhum zosia chu sang thum leh za ni a hiu a.

⁴⁵Zia chu LALPA chun Mosi thu a piak gual ah, Mosi tawh Aron in Merari phung ah mite, a min uh a khum zosiau chu a hiu a.

⁴⁶Mosi tawh, Aron tawh, Israel lamkaite chun Levite Inkuan, a phung dungzui leh a pateu Inkuan dungzui ah a min uh a khumteu,

⁴⁷kikhopna biakbûk ah sêm leh bawl ah pang thei ding dawl leh, van-gik paw thei ding dawl, kum sawmthum ah kipat kum sawmnga tiang mi chu a sim tau a;

⁴⁸a min kikhum zosia chu a leng un sang giat za nga leh sawmgiat a hiu a.

⁴⁹Mosi kiang ah LALPA‘n thu a piak gual in, amau chu a sep ding leh a puak ding uh a guat piak chiat tau a; tichun, LALPA chun Mosi thu a piak dungzui in, a min uh a khum suak tai.