Read Vaiphei KISIMNA LEKHABU 5 Bible Online

KISIMNA LEKHABU 5 - Vaiphei bible

KISIMNA LEKHABU 5

¹LALPA chun Mosi kiang in zia gual hin a gen a:

²La lak ua vun natna nei leh, a taksa ah kipat thil pawt nei a hem leh, mithiluang sukkhak ziak ah kisubuak kha taphot chu, Israelte’n la giamun ua kipat nawdok ngâl dingin thu pia’n la;

³a lak ua ka chênna, a giamun uh a hi’buaklona ding un numei hileh, pawsal hileh giamun pawlam ah la nawdaw ngâl ding uh ahi.

⁴Israelte chun zia gual ah buak kâi zosia chu giamun pawlam in a koidok ngâl ua; LALPA chun Mosi kiang ah a gen gual tak ah chun Israelte’n le a bawl ngâl tau a.

⁵LALPA chun Mosi kiang in zia gual hin a gen a:

⁶Israelte kiang in zia gual hin gen in: Numei hi’n pawsal hileh, kua chung ah le thil a bawlkhial ua, LALPA ah a ginnau hisiat ahi khâk pal chun, zia gual mihing chu thiamlo chang ahi ngâl in,

⁷a thil bawlkhial pen chu a kipuan lat ding ahi. Chuleh, a thil bawlkhial chu a man mun nga khen a mun khat piak belap in a dit ding ahi.

⁸Hiliam ah um pen chun, a luangman ne ding, chanau nai a nei lo chun, a thilbawlkhial kithoina ding ah belamchal khat a kithoi bân in, LALPA kiang ah a luangman ditna chu thiampu chang ta’n a.

⁹Israelte thawlawm thiangtho tuak khawm zosia lak ah, thiampu â ding ah thilpiak zosia chu thiampu a chan ding ahi.

¹⁰Mi zosia thawlawm thiangtho zosia chu ama chantum hi’ntin; thiampu â ding ah kipe taphot chu a chan hi’ngâl in a.

¹¹LALPA chun Mosi kiang in zia gual hin a gen a:

¹²Israelte kiang in zia gual hin gen in: Kua a hem khat chu a ji chun nusia in, thanghuai tak in a pawsal â ding ah ginum lo takin vaum ta leh,

¹³pawsal dang khat in zia nu chu a la luppi hen la, a pawsal in zia chu helo in, a thanhuaina kuama’n a mu lo ziak ah matdaw lo in um ta leh,

¹⁴a pawsal lungthim in ginlelna gûk um hen la, a ji thanhuai ziakin a chung in a thangtawm taleh; ahiloleh, a ji chu a la thanghuai lo maleh, a lungthim ah ginmawna gûk nei in, a la thangtawm taleh;

¹⁵a ji chu thiampu kiang in hun pui hen. A ji min ah thillat ding barli bu changbuang ephah te’na dim khat mun sawm ah khen a mun khat a hun choi ding ahi. A thillat ding chu sathau a sunkhum lo ding a hia, begaw leh gimtui le a hel lo ding ahi; a gûk ah gitlona hetdaw theina ding ah ginlelna thillat leh gitlona hetdawna ding ah kibawl ahi ziakin.

¹⁶Chuleh, thiampu’n numei chu pui in, LALPA ma’n dinsak intin;

¹⁷thiampu chun tui thiangtho chu leibêl khat in suakdok in, biakbûk tuanglai ah leivui la’n, tui lak ah chun khelut in a.

¹⁸Chuleh, thiampu’n numei chu LALPA ma ah dinsak intin, a sam thâi putsak in, hetzingna ding ah changbuang thillat, gitlo hetdawna ding ah thillat chu numei khut ah choisak in a. Chuleh, thiampu’n a khut ah sapsiatna tunsak thei tuikhâ chu chawi in a.

¹⁹Thiampu chun numei chu zia gual hin kipautiam sak in a: Pawsal dang kuama tawh la lupkhawm lo ah, la pawsal kilepsan lo ah, ama tilo midang kuama tawh la thanghuai lo ahi chun, zia sapsiatna tuikhâ ah kipat hin a awngthawl ta’n.

²⁰Ahi’n la, la pawsal tilo pawsal dang chung ah lungthim nei ah la kisubuak ah, la pawsal tilo mi dang tawh la lupkhawm ahi chun:

²¹LALPA‘n nangma chu la mite lak ah kipautiamna leh hânsia dong in hun siam hen la, LALPA‘n la sûl a kiak sak phat leh, la naubu tui in luandaw sak hen la;

²²zia hânsia law tuikhâ hi la gil sung a lut phat leh, la sûl tuitha hen la, la naubu ketha ta hen, ti’n thiampu’n numei chu a kihaksialsak ding ahi. Zia phat chuleh, numei chun, “Amen, Amen,” a ti ding ahi, a tia.

²³Chuleh, zia hânsialawna thute chu thiampu’n zikdok intin, tuikhâ lak ah chun dia in, a sawptha ding ahi.

²⁴Hânsia lawkhum tuikhâ chu numei dawnsak intin, zia hânsia lawkhum tuikhâ chu numei gilpi sung a lut tak leh, na ma ma in a.

²⁵Ziazaw chun, ginlelna thillat chu numei khut ah kipat chun thiampu’n la’n tin, zia chu LALPA ma ah chun jap intin, mâichâm ah lân intin;

²⁶chuleh, thiampu’n changbuang thillat chu a khutdim khat la’n tin, zia chu hetzingna thillat chu ahi; mâichâm chung ah hâlvâm intin, zia zaw chuleh, numei chu zia tui chu a dawnsak ding ahi.

²⁷Thiampu’n numei chu tui a dawnsak phat leh, a la thanghuai ah, a pawsal chung ah thil a la hi’khial ta ahi ngei ngei chun, zia hânsia lawkhum tuikhâ chu a gilpi sung a lut suk phat leh a gilpi na vul vul intin, a sûl hung muat in, a naubu hung luangtha ta’n tin; tichun, mipite lak ah hânsia lawkhum in hung um ta ding ahi.

²⁸Himaleh, numei chu buakkâi lo ahi ah, a thiangtho ahi chun, a chung ah bangma tung pua’n tin, suan leh pâk le nei thei in a.

²⁹Zia gual dan hi jite, a pawsal âng sung ah um zing hi’ngâl ah lung dang pu, kisuthanghuaite chung ah mat ding dan chu ahi;

³⁰chuleh, mi khat in a ji chung ah ginmawna a nei ah, ginlelna ziak ah thangtawmna a nei ah, Pathian âng ah a ji chu a dinsak phat leh, thiampu chun zia dan hi mang in a bawl piak sek ding ahi.

³¹Ziaphat chuleh, a pawsal chu thiamlo chang pua’n tin, a ji chun vang a maw kipuak ta’n a.