Read Vaiphei KISIMNA LEKHABU 6 Bible Online

KISIMNA LEKHABU 6 - Vaiphei bible

KISIMNA LEKHABU 6

¹Chun, LALPA chun Mosi kiang in zia gual hin a gen a:

²Israelte kiang in zia gual hin gen in: Pawsal hi’n, numei hileh kitiamna chuam a nei ah, LALPA â ding ah kipiakna nazirit thutiam a nei phat leh,

³zu leh khamthei thil him him lak ah kipat in a kikoi kiang ding uh ahi; zuthûk leh grep tui a dawn lo ding, a ga min leh a ho natiang a nêk lo ding ahi.

⁴Nazirit hiding ah a kipiakdaw sungsia chu, grep ah kisiam nêk leh dawn leh a mu leh a hawng le a nêk lo ding uh ahi.

⁵Nazirit hiding ah a kitiam sungsia chu, a luchung ah samchem him him kimang pua’n tin; LALPA â ding ah a kitiamna hun a butin masia, amau chu a zek thiangtho hi’n tiu in, a sam le a hoisau ding uh ahi.

⁶LALPA â ding ah a kikoi thiantho sungsiau chu, mithiluang nai ah a umlo ding uh ahi.

⁷A pa a hem, a nu a hem leh a suapite him him a thi inle a kisubuak lo ding uh ahi; Pathian â ding ah a kisukthiannau chu a luchung un a um ta’ngâl a.

⁸Nazirit kitiamna hun sungsia chu, LALPA â ding ah thiangtho hiding a hiu.

⁹Chun, a kiang nai ah mi khat thi thut ziang hen la, a kikoi chuamna luchang chu hi’buak taleh, a kisukthian’; a ni sagi tin ni chun a sam uh a metkol ding uh ahi.

¹⁰Ni giat a ti’n ni leh kikhopna biakbûk kotbul ah thiampu kiang ah vakhu tuak khat a hem, vapâlno pani a hem a hun choi ding uh hi’ntin;

¹¹thiampu chun khatzawk chu gitlo thoina dingin mang intin, a khatzaw chu hâlmang thillat dingin mang in ah; amau chu mithi luang in a hi’buak ziak ah kithoina bawl piak ding ahi ngâl a. Zia ni ma ma chun, a luchang a sukthian piak ding uh ahi;

¹²chuleh, a gitlo thoina ding un belamno chal tuaidawng, kum khat ah upa pakhat hun la’n in, nazirit hinkhua mang dingin a kikoi thiantho ding uh ahi. Luchang kikoi thiangtho kha hi’buak a la hi’tâk ziakin, a la kikoithian nau hun kha simkhawm hita pua’n a.

¹³Chuleh, zia hi nazirit dân ah LALPA â ding ah, kikoi thiang ding ah kitiamte mat ding ah dân chu ahi: Amau chu kikhopna biakbûk kotkhak ah chun hun pui intiu in,

¹⁴LALPA kiang ah kithoina hâlmang thillat dingin belamno a chal khat, demna bei, kum khat ah upa leh gitlo thoina dingin belamnu, demna bei leh kum khat ah upa pakhat leh kichamna thillat dingin belamchal, demna bei pakhat tawh,

¹⁵hâlmang thillat ding leh kichamna thillat ding ah thawipanglo, chângbuang nêl pha tak ah kisiam, sathau kinu’ vaithum pei law dim khat tawh a hun piak ding uh ahi.

¹⁶Thiampu’n ziate chu LALPA ma ah paw lut intin, a gitlonau thupha choina ding leh hâlmang thillat dingin a valân ding ahi;

¹⁷kichamna thillat dingin belam chal tawh, thawipanglo vaithum law dim khat chu tawh lân intin; thiampu ma ma chun thâiga thillat tawh, dawn ding thillatte chule lân khawm ngâl ta’n a.

¹⁸Ziaphat chuleh, nazirit mi chun biakbûk kotbul in a kisukthianna luchang chu metkol intin, kichamna thillat nuai ah meikuang ah chun a sam chu a hâltum khawm ding ahi.

¹⁹A thillatna sa chu a huan min phat leh thiampu’n la’n tin, law sung ah thawipanglo vaithum tang khat tawh, thawipanglo vaithum pei khat chu lakhawm in, a luchang lân thiangtho ta sam kimetkolpa, nazirit mipa chu choisak in, a khutpêk in a koi ding ahi.

²⁰Ziaphat chuleh, thiampu’n zia chu LALPA ma ah pei thillat dingin dawm sâng in ah; pei ah um a awmsa tawh, a saliang kilânsa chu thiampu chantum ding ah sazek hi’n a. Zia zaw chuleh, nazirit mi chun uain dawn thei ta’n a.

²¹Zia hi nazirit hiding ah kitiamte zui ding ah dan um chu ahi: LALPA kiang ah kithoina thil a lat ding uh chu, a bawl theitawp uh a bawl zaw nung unle nazirit dan dungzui ah a kitiam nau dungzui in a piak ngei ngei ding uh ahi. A kitiam nau dungzui in a bawl ding uh a hin, a kisukthiannau dan chu a zui ding uh ahi.

²²Mosi kiang in LALPA‘n zia gual hin a gen a:

²³Aron tawh a chapate kiang in, Israelte maljawlna zia gual hin dot piak in: A kiang un zia gual hin gen in:

²⁴LALPA‘n hun maljawl in, hun vêng hen la;

²⁵LALPA‘n a mêlvâk hun latsak zing in, la chung ah ja’ngai hen:

²⁶LALPA‘n la lam hun nga zing hen la, thamuanna hun pia zing ta hen.

²⁷Tichun, ka min Israelte chung ah nga’n tin uh; chuleh, amau hun maljawl ding ka hi.