Read Vaiphei KISIMNA LEKHABU 7 Bible Online

KISIMNA LEKHABU 7 - Vaiphei bible

KISIMNA LEKHABU 7

¹Mosi’n biakbûk sa zo ah a tundaw sathaunu’ ah a sukthian zaw phatin, mâichâm leh a matchâk zosia suthiang ding ah sathau a nu’ ni chun:

²A min uh kikhum dungzui ah Israelte lak ah luchangte, Inkuan tin ah luchangte leh phung tin ah upate chun kithoina thil a hun lân chiat un.

³LALPA kiang ah kithoina thilpiak dingin bawng kângtalai puak guk tawh, bawngchal sawm leh ni a hun keng ua: Bawng kângtalai puak khat chu hotu pani jel a kikop un; hotute chu bawngchal khat chiat a chang un; chuleh, biakbûk ma ah chun a hung kipedok chiat tau a.

⁴Ziaphatchun, LALPA chun Mosi kiang in:

⁵“Kikhopna biakbûk ah matchâk a hitheina dingin zia a thilpiakteu chu amau khut ah kipat in sâng inla, zia chu Levite kiang in a nasep dungzui chiat un pejel in,” a tia.

⁶Tichun, Mosi’n kângtalai leh bawngchalte chu a sâng ah, Levite kiang in a petai.

⁷Gershonte chu a nasep dungzui un kângtalai pani tawh bawngchal pali a pia’n;

⁸Merarite chu Aron chapa thiampu Ithamar thupiak gual ah a bawl ding un kângtalai pali tawh bawngchal pagiat a pia’n.

⁹Himaleh, Kohath chate chu bangma a pia puai; amau mawpuakna chu thilzek thiangthote a liangko ua puak ding bep ahi ziakin.

¹⁰Chun, phung tin ah luchang chiat in mâichâm sukthian ahi’na ding in, sathaunu’ ahi ni chun kithoina thilpiakte a hun choi un; hotute chun mâichâm âng ah chun kithoina thilpiakte chu a lân chiat tau a.

¹¹LALPA chun Mosi kiang in, “mâichâm thiansuana dingin phung tin ah luchangte chun, ni khat ah luchang khat jel in kithoina thilpiak a bawl chiat ding uh ahi,” a tia.

¹²Phung tin ah luchang zosia’n a kibang chiat ah kithoina thillat, a bân bân in zia gual hin a hun choi tau a. A thillatteu chu: Mun thiangtho ah kimang shekel dungzui ah te’ in, shekel za leh sawmthum ah gik dangka thîk kuang khat chiat, shekel sawmsagi ah gik dangka thîk kuangdal khat chiat, an thillat ding chângbuang nêl pha tak, sathau tawh helsa a dim chiat tawh; chuleh, shekel sawm ah gik sana kuangdal khat chiat, a dim ah gimtui um tawh; chuleh, hâlmang thillat ding bawngchal khat tawh kêlchal khat chiat; kum khat ah upa belamno khat chiat tawh; gitlo thoina ding kêlchal pakhat chiat tawh; kichamna thillat ding bawngchal pani chiat, belamchal panga chiat, kêlchal panga chiat; kum khat ah upa belamno panga chiat tawh, zia gual hin a bân bân in a hun chawi tau a: A ni, phung min, puitu min leh a pateu min chiat chu:

¹⁴Ni khatni: Judah phung ah Amminadab chapa Nahshon

¹⁸Ni ni ni’n: Issakhar phung ah Zuar chapa Nethanel

²⁴Ni thum ni’n: Zebulun phung ah Helon chapa Eliab

³⁰Ni li ni’n: Reuben phung ah Shedeur chapa Elizur

³⁶Ni nga ni’n: Simeon phung ah Zerushaddai chapa Shelumiel

⁴²Ni guk ni’n: Gad phung ah Deuel chapa Eliasaph

⁴⁸Ni sagi ni’n: Ephraim phung ah Ammihud chapa Alishama

⁵⁴Ni giat ni’n: Manasseh phung ah Pedahzur chapa Gamaliel

⁶⁰Ni kua ni’n: Benjamin Gideoni chapa Abidan

⁶⁶Ni sawm ni’n: Dan phung ah Amishaddai chapa Ahiezer

⁷²Ni sawm leh khat ni’n: Asher phung ah Okhran chapa Pagiel

⁷⁸Ni sawm leh ni ni’n: Naphtali phung ah Enan chapa Ahira

⁸⁴Zia gual hin Israel phung tin ah luchangte chun, mâichâm sathau a kinu’ ni chun, a lat thianthona dingin thilpiakte a lân chiat un: dangka thîk kuang sawm leh ni, dangka thîk kuangdal sawm leh ni, sana thîk kuangdal sawm leh pani,

⁸⁵mun thiangtho ah kimang shekel dungzui ah dangka thîk kuang chu shekel za leh sawmthum chiat ah gik ahi’n; dangka thîk kuangdal khat chu shekel sawmsagi chiat ah gik ahi; tichun, dangka thîk kuang zosia chu shekel sang ni leh za li gik ahi;

⁸⁶sana thîk kuangdal sawm leh nite, a sungdim chiat ah gimtui kikoinate chu, mun thiangtho ah kimang shekel dungzui in, shekel za leh sawmni ahi’n;

⁸⁷hâlmang kithoina thillat ding ah gancha a hun choikhawm cheng uh chu: bawngchal sawm leh pani, kêlchal sawm leh pani, kum khat ah upa belamchal sawm leh pani tawh, changbuang thillatte tawh ahi’n; chuleh, gitlo thoina ding ah kêlchal sawm leh pani le ahi;

⁸⁸chuleh, kichamna kithoina ding ah gancha zosia chu bawngchal sawmni leh li, belamchal sawmguk, kêlchal sawmguk, kum khat ah upa belamchal sawmguk ma ahi. Zia sia hi mâichâm sathaunu’ ahi zaw phat ah a lat thianthona ding ah a thilpiakteu chu ahi.

⁸⁹Chun, Mosi chu LALPA tawh kiho ding ah kikhopna puanbûk ah a chia phatin, thuthung thingkuang chung ah ja’ngaina chutpha, Cherub panite kikâl ah kipat in ama a hun hona aw gi chu a he ta’n; tichun, a kiho tau a.