Read Vaiphei KISIMNA LEKHABU 8 Bible Online

KISIMNA LEKHABU 8 - Vaiphei bible

KISIMNA LEKHABU 8

¹LALPA chun Mosi kiang in zia gual hin a gen a:

²Aron kiang ah zia gual hin gen in: Thaumei la det tak leh, thaumei pasagite chun thaumei tunna mâichâm chu a salvâk ding uh ahi.

³Aron in zia gual chun a bawl ta’n; LALPA chun Mosi thu a piak gual in thaumei tunna ma lam salvâk dingin thaumeite chu a de tai.

⁴Thaumei tunna kisiam dan chu sanati ngen kisêk ahi. A kitunna tawpal ah kipat a pâkbom tiang chu a kisêk thaw ngen ahi’n; Mosi kiang ah LALPA‘n a etsak gual in thaumei tunna ngul chu siam ahi.

⁵LALPA chun Mosi kiang in zia gual hin a gen a:

⁶Israelte lak ah kipat in Levite chu puidok inla, hi’thiangtho in;

⁷hi’thian ahi’na ding un zia gual hin bawl in: A chung un hi’thianna ding tui chu thinkhum inla, a pua’n uh sawpsak inla, chuleh, amau chu kisuk thiansak in.

⁸Chuleh, bawngchal tuaidawng khat tawh, thâi thillat dingin changbuang nêl tak, sathau tawh helsa hun laksak inla; chuleh, gitlo thoina dingin bawngchal tuaidawng khatle la mat ding ahi.

⁹Kikhopna biakbûk In mai tual ah chun Levite chu pui inla, Israel mipi zosia ko khawm in.

¹⁰LALPA âng ah Levite la hun pui khawm phat leh, Israelte zosia’n a khut uh Levite chung ah ngaksak inla;

¹¹chuleh, LALPA na a septheina ding un, Aron in Levite chu Israelte min in, kithoina thillat in LALPA kiang in a lân ding ahi.

¹²Levite chun a khut uh bawngchalte luchung ah nga’n tin; Levite gitlo thoina dingin bawngchal khat LALPA kiang ah lân in, bawngchal khat zawk chu hâlmang kithoina dingin la lat ding ahi.

¹³Ziaphat chuleh, Aron tawh a chapate âng ah Levite chu, LALPA kiang ah kithoina thillat gual in la lân ding ahi.

¹⁴Zia gual chun, Levite chu Israelte lak ah kipat in sep chuam in la tin, tichun, Israelte chu kei â hi ta’n au.

¹⁵Khatvei la hi’thiantho ah, kithoina thillat ah la lat zaw ah kipat chun, Levite chu kikhopna biakbûk sung ah lut in, sep leh bawl chu a pan ngâl ding uh ahi.

¹⁶Amau hi Israelte zosia lak ah kipat khen chuam bei ah, kei â ding ah piak daw a hiziak un; Israelte cha masa, sûlhong zosia thasâng ah Levite chu ka kilâk ahi ziakin.

¹⁷Israelte lak ah cha lutîl zosia, mihing hileh, gancha hileh, kei â ahi ngâl ah. Aigupta gam ah cha lutîl zosia ka thagam ni kipat khan, kei â ding ah ka hi’thian a hitau a;

¹⁸ahi’n la, Israelte cha lutîl zosia thasâng in Levite hi ka kilâk tai.

¹⁹Zia bân ah chun, keima’n Israelte lak ah kipat Levite hi thilpiak gual ah Aron tawh a chapate kiang ah, Israelte sik ah kikhopna biakbûk ah sêm ding leh, Israelte thoidamna thilpiak dingin ka piak ahi; tichun, Israelte’n mun thiangtho a nai tâkluat ziak un, a lak ua hipi a tunlona dingin.

²⁰Mosi tawh, Aron tawh, mipi zosia chun Levite chung in zia gual chun a bawl tau a; Mosi kiang ah LALPA‘n thu a piak gual in, Levite chung in Israelte’n a bawl tau a.

²¹Levite chun a puan uh sawp thiang in, gitlona lak ah kipat in a kisuthiangtho tau ah; ziazaw phat ah chun, Aron in amau chu LALPA ma ah kithoina thillat in a lân ah; chuleh, Aron in a kithian sua’na ding un kithoina a bawl piak tai.

²²Ziazaw ah kipat chun, Levite chu kikhopna biakbûk sung ah Aron tawh a chapate nuai ah sêm dingin a lût tau ah; Levite chungchâng ah a bawl ding dan uh Mosi kiang ah LALPA‘n thu a piak gual in a bawl tau a.

²³LALPA chun Mosi kiang in zia gual hin a gen a:

²⁴Zia hi Levite bawl ding chu ahi: Kum sawmni leh nga’ kipat a chung lam sia chun, kikhopna biakbûk sung ah na a sep pan ding uh ahi’n;

²⁵kum sawmnga a ti’n phat uh leh, a nasepnau cholsan intiu in, a sep kît tâk lo ding uh ahi tai.

²⁶Kikhopna biakbûk ah mawpua, a suapite panpi thei intiu in; amau in vang a sep lo ding uh ahi tai. Zia gual ah hin nangma’n Levite chu a sep ding uh la gual tuak piak ding ahi, a tia.