Read Vaiphei KISIMNA LEKHABU 9 Bible Online

KISIMNA LEKHABU 9 - Vaiphei bible

KISIMNA LEKHABU 9

¹Aigupta gam ah kipat a pawt daw nung uh kum ni a tinna, tha khatna chun Sinai gamthip ah LALPA chun Mosi kiang in zia gual hin a hun gen ah:

²A hunbî kiguat dungzui in Israelte’n chiakân kût a mat ding uh ahi.

³A hunbî kitiamsa dungzui in tu tha, ni sawm leh li tin ni hin, nitâk lam thimbut ah kipat in la mat pat ding uh ahi’n; zia nikhua kibawlte gual hin la bawl ding uh ahi.

⁴Tichun, Mosi chun Israelte zosia Chiakân Kût mang dingin a hil tai.

⁵Tha khatna, ni sawm leh li tin ni, nitâk lam thimbut ah kipat in, Sinai gamthip ah chun Chiakân Kût a mang pan tau ah. LALPA‘n Mosi kiang ah thu a piak gual in Israelte chun a bawl tau hi.

⁶Mithiluang sukkhak ziak ah buak bang jat a hem a um ua; ziate chun zia ni chun Chiakân Kût a mang thei ta puau ah. Zia ni chun Mosi tawh Aron ma âng in a hung ua,

⁷a kiang un, “Mithiluang sukkhak ziak ah buak kâi a la hita leng unle, bang ziak ah kei un Israelte lak ah a hunbî kiguat dungzui ah thilpiak lân theilo ding ah lei koidok ziang uh a hem?” a hung tiu ah.

⁸Mosi’n a kiang un, “A la khawngai phot un; la chungchâng uh LALPA‘n bang gual thu ei hun pia ding a hem ti hun hu’ngai phot ing ka,” a tia.

⁹LALPA chun Mosi kiang in zia gual hin a hun gen ah:

¹⁰Israelte kiang ah zia gual hin gen in: La lak ua kua a hem khat, ahiloleh la suanteu lak ah mi kua a hem khat in, mithiluang sukkhak ziak ah buak a hem, khualzin mang a hem inle, LALPA â dingin Chiakân Kût a mat tho ding uh ahi.

¹¹Tha ni’na, a ni sawm leh li tin ni, nitâk lam thimbut ah kipat in a mat ding uh ahi; zia chu thawipanglo vaithum tawh anche kha tawh a nêk ding uh ahi.

¹²A jing â ding bangma a khêk lo ding uh ahi’n, a sagu le a hi’bot lo ding uh ahi; Chiakân Kût bawl ding dan zosia a zui ding uh ahi.

¹³Ahi’n la, kuale a thiang hi’ngâl ah, khualzin mang le hidiak lo ah chiakân kût mang lo a um chun, zia mihing chu a hunbî kiguat dungzui ah LALPA kiang ah thilpiak a lat lo ziakin, a chipite lak ah kipat pai thâk ding ahi. Zia gual mihing chun a maw kipuak in ah.

¹⁴Gam chuam mi la lak ua chêngte lak ah kua a hem khat, LALPA kiang ah Chiakân Kût mang nuamte chun, a mat ding dan leh a zui dingte dungzui ah a bawl nop chun, Chiakân Kût chu a mang ding uh ahi; gam dang mi la lak ua chêngte tawh nanghaw’n bawl dan kibang khat la zui ding uh ahi.

¹⁵Biakbûk tundin ni chun sûmpi’n thuthung koina biakbûk chu a hun tuam ta’n; nitâk ah kipat jingkal tiang in biakbûk tuam ah sûmpi chu meikuang gual in a um zing a.

¹⁶Zia gual hin a um zing ta’n: sûn leh sûmpi’n a tuam ah, jan si’n leh meikuang in a kilang sek a.

¹⁷Biakbûk chung ah sûmpi a kichawn daw phat leh, Israelte le a kipandok ngâl sek un; chuleh, sûmpi cholna mun taphot ah chun Israelte le a kichawl ngâl sek ui.

¹⁸LALPA thupiak dungzui in Israelte a kipandok un, LALPA thupiak dungzui ma’n a giak jel ui. Biakbûk chung ah sûmpi a um laisia, a giamun un a um zing ui.

¹⁹Biakbûk chung ah sûmpi sawt tak a um inle, Israelte chun LALPA thupiak mang in, a giamun uh a chawndok ngai puau a.

²⁰A châng leh biakbûk chung in sûmpi chomcha a um sek ah; zia gual hun ah chunle LALPA thupiak gual in a giamun un a um sek ua; ziazaw chuleh, LALPA thupiak dungzui in a giamun ua kipat in a kipandok kit sek ui.

²¹A châng leh, sûmpi chu nitâk ah kipat jingkal tiang bep a um sek a; jingkal ah sûmpi a kichawn daw tawh kigual in amau le a kipandok kit ngâl un; ahiloleh, sûn hileh, jan hileh sûmpi kipatdaw hun hun in amau le a kipandok ngâl sek ui.

²²Ni ni hi hen la, tha khat hilehle, bang chan ah sawt hiziang maleh, biakbûk chung ah sûmpi a um lai sia chu a kipandok ngai puau ah; ahi’n, sûmpi lakdaw ahi’phat leh a kipandok ngâl sek ui.

²³LALPA thupiak dungzui in a giak un, LALPA thupiak dungzui ma’n a kipandok kit sek ui. LALPA chun Mosi thu a piak gual in, LALPA thupiak dungzui in a um sek ui.