Read Vaiphei MIKAH 7 Bible Online

MIKAH 7 - Vaiphei bible

MIKAH 7

¹Ka chung a gik na e! Nipi thei a lâk khawm nung ua, grep ga a law zaw nung ua nêk ding, bawk khat ziang le mulo tawh bang chu ka hi; ka duchâk ma ma theichang min khat chale a um puai.

²Lei chung ah hin mi ginum a um ta pua’n, mi diktat him him le a um ta puai; thisan sua ding châng in a um zo tau in, mitin in mi dang khat chiat lên in a ngîm tau hi.

³A khutteu chu thil phalo bawl a thiam ma mau in; a milianteu leh thutanteu chun golgûkna a don un; mi thuneite chun a duthusam dungzui tak un a zikdaw sak un; tichun, dikna chu a heikawi tau hi.

⁴A lak ua mi pha pen chu hampa lingnei gual ahi’n, a lak ua mi lungthim zang pen chule dâi lingnei a bang bep ui. Amau gawtna ding ni, la gâlvengteu gawtna ding chu, hung tung ding ahi tai; tu’hin a lungdon niu chu a nai tai.

⁵La gual leh pâi gingcha kin la, la hepiteu ah muan ngamna nei kin; la ânglai sia’nu ah kipat chun, la kam kotkhakte vêng in;

⁶chapa’n a pa chung ah phunna ding a hawl in, chanu chu a nu do dingin a kipan in, mo chu a talpinu do dingin; la mêlmate chu nang Inkuante ma ma a hung hitau hi.

⁷Ke’n vang, LALPA lam en zing ing ka tin, ka hukdamna Pathian chu ngâk zing ing ka; ka Pathian in ei ngaitha ding ahi.

⁸Aw ka mêlma, ei eulau talua kin; ka kipûk phat leh tho kit ngal ding ka hi; khawthim nuai ah ka um phat leh LALPA chu ka vâk hiding ahi.

⁹Kei lam ah a pan ah, kei a ding ah vai ei hawm piak masang sia chu, LALPA chung ah thil ka la hi’khial tâk ziakin, a lungnatna paw zing ta’ng ka. Ama’n vâk ah ei puidok intin, tichun, a dikna chu mu ta’ng ka.

¹⁰Ziaphat chuleh, ka mêlma: “LALPA la Pathian chu khoi ah um a hem?” ei tite chun mu ta’n tin, mualpho ta’n a. A pukna chu ka mit in mu’n tin; tu’hin chu lam dung ah buanthuak gual ah, chotden in um ta’n a.

¹¹La kulbâng siamphatna ding ni chu! Zia ni chuleh, la gamgi chu, gamla tak ah kêk lian hung hita’n a.

¹²Zia ni chuleh, Assuria gam leh, Aigupta gam ah kipat Luipi lian tiang in, tuisuagiat gâl langkhat ah kipat, gâl langkhat lam tiang in, tâng khat ah kipat tâng dang tiang chan in, la kiang in hung ta’n au.

¹³Ahi’n, gam chu a sung ah chêngte ziak leh, a thilbawl gateu ziak ah chun nutsia in um ta’n au.

¹⁴Muan umna huan gam lailung ah, gammâng lak ah chang tat la gochan belam hon la mite chu, la khetbûk mang in ching tup inla; masang lai gual ah khan Bashan leh, Gilead ah vâk in um chiat tau hen.

¹⁵Aigupta gam ah kipat la hung pawtdok lai gual ah khan, thilmak leh kidangte chu ei mu sak ta’n.

¹⁶Namtin in zia chu mun tiu in, a tatna zosiau ah zakcha ta’n au; a mûk uh hum intiu in, a beng uh ngong zo ta’n au;

¹⁷lei ah bokvâk ah khawsa gul gual in leivui liak ta’n au; a kul ua kipat lau ah kithing kawm in hung pawtdok ta’n au; LALPA I Pathian uh lau in, hung kihei intin uh, nangma lau in um ta’n au.

¹⁸Nangma gual ah gitlo’na ngaidam leh, la gochan umsun te gitlo’na melkhu pei Pathian dang, kua a hem um ngai? A lungnatna kumkhua’n a vop zing pua’n, a hepina danglam ngai lo a suklat ziakin a kipak sek ngal a.

¹⁹Ama chun ei hun hepi kit intin; I thulim lonau zosia a keng in tawden ta’n a. Ka gitlo’nau zosia chu tuisuagiat li thûk tak ah pai lut ta’n la.

²⁰Nidang lai ah kipat ka pu leh pateu kiang ah, la kitiam tâk gual in, Jakob kiang ah la ginumna latsak ah, Abraham kiangah la thutakna, danglam lo dungzui ah chun guitunsak ta’n.