Read Vaiphei NAHUM 1 Bible Online

NAHUM 1 - Vaiphei bible

NAHUM 1

¹Nineveh chung ah puakgik, Elkosh khua Nahum thil mu kilâkna lekhabu chu:

²Pathian doichilgil leh phuba la chu LALPA chu ahi’n; LALPA chu phuba la sek leh lungnat hat ahi; LALPA‘n a dodâlte chung ah phuba a la sek ah; ama do-te chung ah a lungnatna kuanjaksak sek chu ahi.

³LALPA chu lungdia thei tak himaleh, thilhi thei tak chu ahi’n; LALPA‘n migilote chu thiam chansak him him pua’n a. Chîmpei leh huipite chu ama lampi ahi’n, sûmpite hi a keng ah leivui chu a hiu.

⁴Tuipi a vau ah, a kangtan ngal in, lui zosia le a hi’kang sik sek hi; Bashan leh Karmel a vuai ta’n, Lebanon pâklûn chu a chuai tai.

⁵A ma-âng in tângte a kithing un, mualte a tuitha zo tau hi; a âng in leilung leh a sung ah um zosia a kithing setau hi.

⁶A lungnatna ma-âng ah chun kua a hem ding zo ding? A lungnatna chu kua a hem thuak zo ding? A lungnatna chu meikuang gual ah buak thâk ahi’n, ama ziakin suangpite chu khet nawn in a um ui.

⁷LALPA chu a pha’n, lungdon ni ah kul det ahi; ama bêlte chu a hukhing sek hi.

⁸Tuisuagiat in a hi’siat gual in, a mêlmate chu hi’sia dim dem in a; ama do taphot chu a thi’na ding uh, thim lam in sawl lut ta’n a.

⁹LALPA kãl ah bang a hem la ngaitua? Tawpna hun bawl ding ahi; kuama’n ama a vêl in do pua’n au;

¹⁰Linggui kiphanchak gual ah phanchak in a um tau in, zungolveite gual in a kham zo tau; bupawl keugawp mei in a kâttum gual in a um zo tau hi.

¹¹Nang ah kipat mi khat hung pawt in, ama’n LALPA kãl zawng ah thil phalo a guanggal leh, khawlo’na thil ah thuhil mi ahi.

¹²LALPA‘n zia gual hin a gen a: “Amau chu a thahât lai tak uh hihen la, bang jat ah tam hiziang maleu le, sât thâk in um tho tho intiu in, sukmangthai in um in au. Hun sugenthei ta ma lengle, hun sukgenthei be ta pua’ng ka.

¹³Tu’hin, nangma ah kipat in a ngawngkol uh hi’bong ing ka tin, nang a hun kânna khauhualte chu, sat tan sik sek ing ka,” a tia.

¹⁴LALPA‘n la chungchâng in thupiak a nei tai; La min manlo’na ding in suan leh pâk nei ta pua’n la tin; la Pathian tempul ah milim kisui leh kisungte chu, hi’mangthai ing ka. Hing tâk lo la hiziak un, la thân ding uh bawl piak ing ka.

¹⁵Mual leh tângte kân ah chanchinpha hun tun a, chamna thu tângkopi ah hung chu en tiam in! Aw Judah, la kûtte chu bawl inla, la thutepte chu mualsua ta’n; migilo chun la gam hun sim kit ta pua’n au, amau chu sukmanthai dim dem ahi ta’ngal un.