Read Vaiphei NAHUM 2 Bible Online

NAHUM 2 - Vaiphei bible

NAHUM 2

¹Hi’gawppa chu nangma do in a hung tai; gâlvênbûkte chu vêng bit unla; lamliante chu vêng tup un; la kawng uh gâk phau inla, la tha hatnau zosia lathak kit tau in.

²(A mêlmateu in vasim uh hen la, a bâkteu chu vasusia zo ta maleule, Israelte lopina gual tho in, Jakob lopina chule LALPA‘n, tungding kit ding ahi tai.)

³Mêlmate phaw chu a san phem phum in; a sepai hangsanteu chu a sandâng in a kithuam ui. Kido ding ah a hung kisak lai un, a kângtalai ah thikte chu val in a te zawl zawl in; sakolte chule thalawp talua’n a keng uh a tat ziang ui!

⁴Sakol kângtalaite chu kotzingte ah chun, a ngawl gual in a tai vêl un, In kil tin ah chun a tai vêl ui; a mêl uh meisel a bang hen, kawlphe gual in a chan-gang ui.

⁵A miliante a ko khawm in, a hung khawm kin-ganna lam un a kipal pâi malam hial ui; kulbâng lam a hun zuan un, kivênbitna dingte chule a siam ngâl ui.

⁶Lui kotkhakte chu hawn in a um in, lal In chu launa’n a dim tai.

⁷Khawpi chu sal ah mat dingin a pûk ta’n, sal ah mat numeite chun a awm uh chûm in, vakhu gual ah thûm leh mau dingin pui mang in a um zo tau.

⁸Nineveh khawpi chu dil a sung ah, tui zosia luang mang ta gual ahi. “Chawl phot in! Chawl phot in!” ti maleu a hung kinung hei khatle a um puau.

⁹“Dangka thîkte chu lak piak unla, sana chule lak piak un! Go thilpha chitin in a dim in, go thillul simsên gual ahi puai”.

¹⁰Chomnâm ah um, nutsia ah um leh, suksiat dim dem ahi tai! Lungthim a basam in, khûp zosia a kithing tai; kawng zosia a kithing na zo ta’n, maisua zosia a ngûi zo tai!

¹¹Sakeibakneite kul ah, sakeibaknei vânglaite chênna kua leh, sakeibaknei vâklumletna chu khoi tak a hia, sakeibaknei note le a chên ua, kuama’n a suklau lo’nau mun chu bangti a hem?

¹²Sakeibaknei in a note nêk ding, hun tok in a pet tel ah; sakeibakneipite nêk dingin sate a hun mat piak ah; a kulsung chu sathem in a hi’dim tai.

¹³Sepai honte LALPA chun, “Ngaitia, nangma kãl in ka pang in, la sakol kângtalaite chu hâlkhu veng vung ing ka tin, la chemjam hiamte chun, sakeibaknei note chu that gam ding a hiu; lei chung pumpi ah kipat in la sa mat zosia hun lâkpiak sik sek ding ka hi’n; chuleh, la thangkote aw git chu het hita pua’n a,” a tia.