Read Vaiphei NAHUM 3 Bible Online

NAHUM 3 - Vaiphei bible

NAHUM 3

¹Katei, thisan sua hat khawpi, kithepna dim leh gâl lâk ah dim, a gâl lâk chom khawm zaw ding gual ahi puai!

²Jepna vei gitte, kângtalai keng kigawtgite, sakol kichop gite leh, kângtalai tai gitte tawh!

³Sakol naw’na husa, chemjam te zawt zawt tawh, cheicha val lik lek kivai tawl te, mithiluang kizam lem lum leh kisia vûm te, mithiluang kil tin ah um, simsên lo mithiluang ah kipalpâi theina hial chu!

⁴Zia chu nawchizuaknu mêlpha tak, dawithiamnu thanhuaina ziak ah namtin zuak mang, a dawithiamna ziak ah namtin zuak chavainu ziak ah, hung um chu ahi.

⁵Sepai honte LALPA chun, Ngai in, ka hun do la hi, la maichang tiang hial in la puanchên hawk ding ka hi; nam tin la ngawnchang hi’na etsak ing ka tin, lenggam tin in la jachâkna mu ta’n au.

⁶Ki’dak buaksia hun the’khum ing ka tin, jachâk um tak in hun siam ing ka tin; mite etnop in hun siam ding ka hi.

⁷Nang hun mu kha taphot chu kizok in nungkit intiu in; “Nineveh chu a segam ta’n, kua a hem siatbat ta ding,” hun ti’n au. Khawi lam ah kipat in a hun thamuan ding, vahawl piak ta ding ka hem?

⁸Nail luipi gei ah kichu, tui in a upkîmvêl, tuisuagiat kulpi ah mang ah, bâng ding ah tui mang, Thebes sâng ah chun la phazaw a hem?

⁹Ethiopia chu a hatna ahi’n, Aigupta chule a hatna tawp nei lo chu ahi; Put tawh Libia chule amau panpitu a hiu.

¹⁰Chutisapi’nle mat in a um un, suak leh sal in a tâng ui; kotzing kisuktua’na tin ah chun, a nausenteu natiang, se’gawp dim dem a hiu in; a mi thupiteu chan dingin âi a sân un, a lak ua mi thupi zosia chu, thikkol ah bultuk a hitau hi.

¹¹Nangma (Nineveh) le kham in la tin, kisêlmangna ding hawl inla; mêlmate ah kipat kisêlna ding hawl inla.

¹²La kulpite chu theichang kung ah, ga min masa minjûn tak, a law phat ua leh a ne dingte, kam sung ah ke’lut ziang tawh bang chu ahi.

¹³La sepaite chu vak en tiam in; numei tawhbang bep a hitau. La mêlmate â dingin la gam lutna kotpite chu, lian tak in a kihong hi; la kotpi jawlte chu mei in, a kâng tum zo tai.

¹⁴Hualkhumna ah la um sung dingin, tui khai inla, la kulte sudet in; buanthuak chil unla, chêk châlna siam un; chêkleite chu bawl zo kin un!

¹⁵Zia tak ah chun mei in kâng tum intin, chemjam in hun sâttan in a. Khaubepi nêk zaw gual in hun ne zo in a. Khaubepi leh khauphâk gual ah, tam in kisupung un.

¹⁶La sumkawlveite chu van ah aksite, sâng ah tam zaw hial in la supung ta’ngâl un. Khaubepite’n a thau a jak un, a leng mang zo tau hi.

¹⁷La gâlvêngte chule khaubepi gual leh, la lekhazikte chule khaubepi hon, phalbi dap jingkal ah pal ah nisa lum awi; nisa a hung lum phat ah leng mang, khawi lam ah um a hitau em ti hiat zaw, hitalote tawhbang bep a hitau hi.

¹⁸Aw Assuriate lengpa, la belamte a ipmu zo tau in, la mi thupite chule a ipmu vuang zo hi. La mipite tâng tin chung in, a tai chek zo tau in, amau pui khawm kit ding kuama a um ta puai.

¹⁹La natna damna ding a um pua’n, la liamna hi thi’pi kham ahi. La thuthang he zosia’n, a khut uh a hun betkhum tau hi. A hun tawk nei lo ah la hiamngamna lak ah, kipat kua a suakcha kha ngai em?