Read Vaiphei HABAKKUK 1 Bible Online

HABAKKUK 1 - Vaiphei bible

HABAKKUK 1

¹Jawlnei Habakkuk in Pathian ah kipat thu a mu chu:

²Aw LALPA, lei ngaithâk lo ding ah, la panpi’na don ah bang chan a hem ka hun ko ding? “Kipawngbawlna,” ti’n hun ko ma leng nang in lei hukdaw diak lo ding?

³Bang ziak ah nang in diklo tak ah kibawlna leh, lungkhamna hi lei musak a hem? Siatna leh kipawngbawlnate hi, ka ma’n a um zing in; kinakna leh kituaklonate a hung pawt tai.

⁴Tichun, dan chu a tânjau in, vaihawmna dik a um puai. Migilo in mi diktatte a ûm vêl un, ziaziakchun, thudik chu bangmalo a suak tai.

⁵Namte chu en unla, mu tau in! Maksau inla, lamdang sa tau in! Min la kiang ah hun gen maleule, la taksan lo ding khop uh, thil pakhat bawl ding ahi ngal a.

⁶Kaldaite, nam huham tak leh mi lungpâwngte, lei vailam dâp hial ah kizawt, a gam uh hilo lâkpiak dingin, ka hun choktho hi.

⁷A lau um in, a tizat um ma mau a, a vaihawmnau leh a lopinau chu, amau ah kipat in a pawt hi.

⁸A sakolteu chu gialbem sâng in a chan-gang zaw’n, thimbut ah ngei sâng in a lau um zawu hi; a sakol chungchuangteu chu, a hung kithejak ui. A sakol chungchuang miteu chu, gamla tak ah kipat hung a hiu in; mupi sa nêk ding baw gual in, kin-gang tak in a hung leng ui.

⁹A leng un thagum sua dingin, a maichang uh malam naw pek in, piaunêl gual ah tam, sal in a man khawm ui.

¹⁰Lengte chu a simmawu in, vaihawm mite chu kihelna’n a mang ui. Kulpite bangma’n a ngai puau in, ziate chu lua dingin lei a sungvûm ui.

¹¹Chuleh, huipi gual in a hun nuai chibak un; thil phalo a bawl un, migilo a hung suak tau hi; a hâtnau chu a pathian uh ahi tai!

¹²Aw LALPA ka Pathian uh, ka Mithiangtho, malai pek ah, kipat kha um hilo la hem? Thi him him pua’n lau. Aw LALPA, amau chu vaihawm ding ah, la teptêsa a hita’n; aw ka Suangpi, nangma’n amau chu, gawt dingin la namdet tai.

¹³Thil phalo en dingin la mitte, a thiangtho talua hen, thil phalo bawlte chu la entha pei puai; bang ziak ah mi dawhathûkte la ngaithei ah, amau sâng ah diktat zaw te a valzaw tak uh leh, thipsan hiat hiat la hem?

¹⁴Mite chu tuisuagiat sanga gual in, vaihawm piak ding neilo ganhing bokvâkte, gual mai in la siam tai.

¹⁵Mêlma chun a leng un, ngakuai in a khaidok in, a lên in a huidok un, a lên lian un a huidok khawm ui; tichun, a lim in, a kipak ma ma hi.

¹⁶Ziaziakchun, a lên ah chun kithoina a lân in, a lênkhang ah chun gimtui a hâl hi; amau ziak ah a chanvo hung lian ah, nêk ding tui tak leh tam tak lakhawm a hiziak un.

¹⁷A lên ah awkte luak khawm zing in, lainatna bei ah namtin susia zing ahi em?