Read Vaiphei HABAKKUK 2 Bible Online

HABAKKUK 2 - Vaiphei bible

HABAKKUK 2

¹Ka gâlvenbûk ah ding ing ka tin, ka In sâng chung ah a la um ing ka; ka kiphinna thute kha bang ei hun gen piak in, bangti’n ei hun dawnhu em ti, he ding in a la hu’ngai ing ka.

²Ziaphatchun, LALPA‘n ei dawnhu ta’n: Kilâkna chu zikdok inla, suangpêk ah hun zikdok in; a tai kawm ua le sim ziang thei ding ah, kichian tak in zikdok in.

³Huntiam bîk â ding ah kilâkna bîk a um nalai in; tawpna ding thu a gen chu thawn pua’n a; vaigei ding ah a kilat chun ngâk ham ham inla, hung tung tho tho ding ahi’n, hung vaigei ta pua’n a.

⁴Chapote chu vak en tia! A thagau a sung un a dik ta puai; himaleh, midik chu a ginna ziakin a hing ui.

⁵Zialochunle, hausakna hi kithepna mai ahi’n, kisatheite chun daisawt pua’n a. Sheol gual in a gawlhawm uh a hi’lian un; thi’na gual in, “A hun tawk tai,” a ti ngai puau hi. Namtin amau â dingin a pui khawm un, mi zosia amau â gual in a lakhawm ui.

⁶Zia gual mite chu mitin in a demna ding un, engho’na thuchingchom phuak intiu in, “Ama â hilo ah kisupung ah, kimisak chu a chung a gik na e! Mite kitiamna thil bang chan lakhawm nalai ding la hem?” a tiu a.

⁷Nangma batlâknate hung thodok phut in, lau ah kithinsak dingin hun phawnghal in au. Ziaphat chuleh, amau gâl lâk gual mai hita’n lau.

⁸Nam tam tak la suam gam tâk ziakin, nam dang a la um nalaite chun, hun suam thuk ding a hiu; mite thisan leh gam chung ah te, khawpi leh a sung ah chêngte, la pawngbawlna ziak ah khan.

⁹“Thil phalo in a sukkhak lo ding ah bû sâng tak ah sia ah, a In sung â ding ah lawkna diklo, lakhawmte chung chu a gik hi!”

¹⁰Mi tamtakte hi’mangthai ah, la In sung â ding ah mualpho’na siam la hi’n, nangma siatna ding kibawl la hi.

¹¹La bâng ah suangte nasan chu hung kikodok in, Inthing lak ah kipat Inkamten hun dawnhu’n au.

¹²“Nang, thisan sua ah khawpi siam, phatlo’na ah khawpi phutdetpa, la chung a gik na e!”.

¹³Mihingte sepgimna chu meikuang â ding ah mangchom gual leh, namtin bangmalo mai ding ah sep gimsaktu chu, sepai honte LALPA hilo a hem?

¹⁴Tui in tuisuagiat a chup dim gual in, LALPA lopina hetna chun khawvel hi sukdim hi’n a.

¹⁵“A Invêngte ngawnchang hi’na, mutheina ding ah zu dawn sak ah, a dawn kham masangsia lungnatna hâi tulpa, la chung a gik hi!”

¹⁶Lopina sâng ah simmaw’na khuksak hi’n la. Nang inle dawn inla, kham ta’n! LALPA khut changlam ah no chu, la kiang in hung kile’kit intin, lopina sâng in mualphona hung tung in a!

¹⁷Lebanon ah thagum sua’na chun, nangma hun chup khum intin; lei chung leh a sung ah chêng zosiate thisan sua’na leh, thagum sua’na ziakin, gamsate sukchimitna’n nangma hun hi’thidup ding ahi.

¹⁸Milim kisung, zuau thu zilsakte bep lo ngâl, a siampa’n bang ding ah a siam a hem? Milim mai mai leh pautheilo, a siampa’n a khutsuak a taksan mai chu aw!

¹⁹Thingbong kiang ah, “Hung khanglo tiam in,” tite leh, suangtum kiang ah, “Hung tho in,” tite chung chu a gik hi! Mi a hil thei awm? En tia, sana leh dangka tui kiluan khum mai ahi’n, a sung ah hinna a um puai.

²⁰LALPA chu a ahileh tempul thiangtho in a um hi, lei chung ah mi zosia a âng ah thip chil chel tau hen!