Read Vaiphei ZEPHANIAH 3 Bible Online

ZEPHANIAH 3 - Vaiphei bible

ZEPHANIAH 3

¹Nuaisia hat, khawpi buak leh polche!

²Kuama thu a mang pua’n, kuama hilna thu a ngai puai. LALPA ah ginna a nga pua’n, a Pathian a nai puai.

³A sung ah miliante chu, sakeibaknei kitum gual a hiu in; a vaihawmteu le nitâk lam ngei gilkial, jingkal tiang ah bangma khêkchâk nei lo gual a hiu.

⁴A jawlneiteu chu khawni ngailo leh ginumlote a hiu a; a thiamputeu in thilzek a subuak un, dan a botsiau a.

⁵A sung ua um LALPA chu a dik a; diklo a bawl ngai puai. Jingkal si’n ah a vaihawmna chu, phalvak si’n ah thawn lo in a sulang a; himaleh, midiklote’n vang zachâtna châng a hepuau hi.

⁶Namte ka paitha hen, a gâlvênbûkteu a segam tai; a kotzingteu ka susia gam ta’n kuama a chiatua ta puau hi; a khawpiteu chu a hawm ah nutsia a hita’n, a sung ah chêng mihingte a um ta puau hi.

⁷“Matheilo in ei lau ta’n tiu in, hilna thu le ngai ta’n au; a chung ah thil ka tunsak zosia hi, mu khial ta sam pua’n au,” ka ti hen. Himaleh, a thil phalo bawl uh, a phalo zaw diak a bawl kâl uh a ngaklel ma mau hi.

⁸Ziaziakchun, hiatpitu ah, ka hung din hun chu ei la ngâk un, a tii. Namte pui khawm ding leh lenggamte suktua ah, a chung ua ka lungnatna leh, lei chung zosia kât tum ding hi, ka thupukna ahi ta’ngal a.

⁹Ziaphat chuleh, mipite pau thiangtho in then piak ing ka tin, lungthim kithu gual ah LALPA min chu, a hun ko ua, a na a sep khawm theina ding un.

¹⁰Ethiopia gam ah lui gâl lam te tiang ah, ka mipi kithejakte’n a thil piakteu hun chawi khawm ta’n au.

¹¹Zia ni chuleh, ka chung ah la tatlêkna leh, la thilbawl zosia ziakin zakcha pua’n la tin; ziaphat chuleh, la lakah mi kisatheite chu, ladok ding ka hi’tâk ziakin, ka tâng thiangtho ah chun kisuang tak in umzing ta pua’n la.

¹²Nanghaw lakah mi kingaitawm leh, mi niamte chu nutsia ah um ding a hiziak un. Amau chun LALPA min bêl intiu in,

¹³Israelte lakah a um sun hita’n au; amau chun thil phalo bawl pua’n tiu in, zuau gen pua’n tiu in, a kam un thepna thu le pawt him him pua’n a. Ziaphat chuleh, ne vâ in, lum intiu in, kuama’n sulau ta pua’n au.

¹⁴Ngai tak in La sa’n, aw Zion chanu; aw Israel, kiko in! La lunggil zosia lim in kipak in; aw Jerusalem chanu!

¹⁵LALPA‘n la chung ah demna zosia a lamang ta’n, la mêlmate a del mang zo tai. Israelte lal, LALPA chu la lak un a um hi; thil phalo hung tung ding lau nei ta pua’n la.

¹⁶Ziaphat chuleh, Jerusalem kiang in: Aw Zion, lau kin la; la khutte hizoi kin.

¹⁷La lak ua um LALPA, la Pathian chu, gâlhat leh zaw’na petu ahi; nangma suang in kipak in lim intin; a hepina’n hun hihat intin; la chung ah kipakna La ngai tak in sa’n a;

¹⁸kûtni ah La sa gual in. La chung ah siatna tung ding chu lamang ing ka tin; jachâkna chu tuak pua’n la.

¹⁹Ziaphat chuleh, nangma hun tawdente zosia chu sawisa’ng ka. Kengbai chu hukdok ing ka tin, pâmpai ah umte chu pui khawm ing ka tin, a jachâknau chu pakchatna’n then piak ing ka tin; chuleh, lei chung zosia ah minthanna pia’ng ka.

²⁰Ka hun lak khawm phat leh In lam ah hun pui tung ta’ng ka; lei chung ah mi zosia lakah chawihoi leh, minthang ah ka hun bawl ding ziakin la mit mu ngei un, la saltânnau ah kipat ka hun tundin kit tak leh, LALPA‘n a tii.