Read Vaiphei ZEKARIAH 1 Bible Online

ZEKARIAH 1 - Vaiphei bible

ZEKARIAH 1

¹Darius lal kum ni’na, a tha giatna’n LALPA‘n Iddo chapa, Berakhiah chapa Zekariah kiang in zia gual hin thu a hun gen a:

²La pu leh pateu chung ah khan LALPA a lungna ma ma hi.

³Ziaziakchun, a kiang un: Sepai honte LALPA chun zia gual hin a gen hi: Sepai honte LALPA‘n ka kiang lam ah hung kihei kit un, keile nang uh lam in hung kihei kit ing ka, sepai honte LALPA‘n a tii.

⁴Jawlnei masate’n, “Sepai honte LALPA chun, ‘La umdan phalo leh, la thil phalo bawlteu chu hun kiheisan un, a tiu a; la pu la pateu in a limsak lo uh leh bangma a la ngaisak lo gual uh khan um kiu in, LALPA‘n a tii.

⁵La pu la pateu khoi ah a um zo tau em? Jawlneite le kumtuang in a dam ua a hem?

⁶Ka dante leh ka thute khan ka suak jawlneite kiang ah ka la piak haw kha, la pu la pateu a la makhel man ta hilo a hem? Tichun, a kisik ua: Sepai honte LALPA chun I chung ua bawl ding a guanggal gual tak in, I umdan leh I thilbawl dungzui tak un ei soisa ta ahi,’ a tiu kha,” a tiu a.

⁷Darius a lal kum ni’na, a tha sawm leh khatna, Shebat tha, ni sawmni leh li ni chun, Iddo chapa Berekiah chapa jawlnei Zekariah kiang in, LALPA‘n thu a hun gen a:

⁸Jan ah chun sakol san chung ah mi pakhat chuang ka mu’n! Ama chu phâiguam ah huisûm lak in a ding ah; a nung in sakol sandâng leh a kângte le a um ui.

⁹Ziaphatchun, keima’n, “He pu, ziate hi bang a hem?” ka ti’n. Vansawlchâk ei hopa chun, “Ziate hi bang a hiu hun hil ing ka,” a ti’n.

¹⁰Tichun, huisûm lak ah dingpa chun ei hun dawnhu a: “Ziate hi LALPA‘n lei chung chuan suak ding ah a sawldawte chu a hiu,” a hun ti’n.

¹¹Ziaphatchun, amau in LALPA vansawlchâk, huisûm lak ah dingpa chu a hun ho ua: “Lei chung pumpi ka chuan suak tau in; chun, ngaitia, lei chung pumpi chu gâl muang in a um ui,” a hun tiu a.

¹²LALPA vansawlchâk in, “Aw sepai honte LALPA, zia kum sawmsagi la lungnat khum, Jerusalem leh Judah khawpite ah kipat ja’ngaina bang chan tutâng nalai ding la hi em?” ti’n a hun dong a.

¹³LALPA vansawlchâk ei kihopi’pa chu, aw nem tak leh thamuan um tak in a hun dawnhu ta’n.

¹⁴Tichun, ei kihopi vansawlchâk chun ka kiang in, “Zia gual hin tâng vasam in: Sepai honte LALPA chun zia gual hin a gen hi: Jerusalem leh Zion chu ka khawtua ma ma hi;

¹⁵chuleh, kinoptel tak ah um namte chung in ka lung a na ma ma hi; ka lungnatna neucha ahi lai in siatna huaisia zaw diak a hun bawl un.

¹⁶Ziaziakchun, LALPA‘n zia gual hin a gen hi: Ja’ngaina tawh Jerusalem lam ka hun nga kit tai; zia sung ah chun ka In sak hi’ntin, Jerusalem chung ah chun te’na kithungdok kit ta’n a,” sepai honte LALPA chun a tii.

¹⁷Zia thu hile genjak un: Sepai honte LALPA chun, “Ka khawpite chu hausakna’n luanglet kit intin; LALPA‘n Zion chu thamuan kit ta’n tin, Jerusalem le têlchuam kit ta’n ah, ti’n,” ei hun tia.

¹⁸Chun, ka vak et to leh kî pali ka vak mu’n.

¹⁹Vansawlchak ei kihopi kiang ah chun, “Ziate hi bang a hem?” ti’n ka dong a. Ama chun, “Ziate hi Judah, Israel leh Jerusalem thejaktu kîte kha a hiu,” ti’n ei dawnhu a.

²⁰Ziaphatchun, LALPA chun thîksêk mi pali ei hun etsak kit a.

²¹Keima’n, “Ziate hi bang bawl ding ah hung a hiu em?” ti’n ka dong a. Ama chun, “Ziate saw kuama a lutung kit um talo ding ah, Judai gam thejak ding kîte chu a hiu; zia kîte hin Judai gam do ding leh, a mite gamtin ah thejak gua hung kipan; nam tinte kî sulauthawng ding leh khenbong ding ah hung kuan a hiu,” ti’n ei dawnhu tai.