Read Vaiphei ZEKARIAH 12 Bible Online

ZEKARIAH 12 - Vaiphei bible

ZEKARIAH 12

¹Israel chung thu ah LALPA kamsuak chu: LALPA, vanthamjawl lian tak phaljakpa leh, leilung kingakna siampa leh mihing sunggil ah thagau siampiakpa ngei chun zia gual hin a gen hi:

²En un, Jerusalem chu a kîmvêl ah mipi zosia â ding ah khamna no in siam ding ka hi; Jerusalem khawpi bulu ah a um phat leh, Judai gam chule bulu in um ta’n a.

³Ziaphat chuleh, Jerusalem chu mizosia â dingin suangtum puakgik in siam ing ka tin; zia suang dom kâng taphot chu huaisia tak in kisuliam in au. Khawvel ah nam zosia a do dingin hung khawm ta’n au.

⁴Ziaphat chuleh, sakol zosia chu lauthawnsak ing ka tin; chuleh, a chung ah chuang mite chule hi’ngol ing ka, LALPA‘n a tii. Chuleh, nam tinte sakol mitthûmna ka hun gawt phat leh, Judah Inkuante chu vang vêng bit zing ding ka hi.

⁵Ziaphat chuleh, Judah Inkuante chun, “Jerusalem ah chêngte chun sepai honte LALPA, a Pathian zal un hatna a nei ui,” ti holimna’n mang ta’n au.

⁶Ziaphat chuleh, Judah Inkuante chu thing siakhawm lak ah beltaw’ meikuang gual in siam ing ka tin; buvui lak ah meisel gual hi’n au; tichun, a kîmvêl ua, a vei leh chang ua um namtinte chu kâng tum ta’n tin, Jerusalem chun ama mun, Jerusalem khawmun chu lua kit ta’n a.

⁷David Inkuante lopina leh Jerusalem luate lopina chu Judah chopkân ah hi’lêt a hi’lona ding in, LALPA‘n Judah puan Inte chu zaw’na pemasa’n a.

⁸Ziaphat chuleh, LALPA chun Jerusalem ah chêngte chu hûm intin, a lak ua a zawngkhâl pente chule David gual hi’n tiu in; chuleh, David Inkuante chu Pathian gual hi’n tiu in; a ma-âng ua LALPA vansawlchâk um gual chu hi’n au.

⁹Ziaphat chuleh, Jerusalem do ding ah hung kuan nam taphot hi’mangthai ding ka hi.

¹⁰Chun, David Inkuan ah mite leh Jerusalem ah chêngte chung in, lainatna leh thûm piakna thagau buntha’ng ka tin; tichun, a la sut uh a mu phât ua leh, min a chapa neisun a sûn gual leh, a chatil a kâ khum gual un sûn ta’n au.

¹¹Ziaphat chuleh, Jerusalem ah sûnna chu Megiddo phâizawl ah Hadad-rimmon mun ah lusûnna huaisia gual chu hita’n a.

¹²A gam pumpi, mitin in amau Inkuante chiat sûn ta’n au; David Inkuante’n amau Inkuan, a jiteu chiat inle amau Inkuan sûn in tiu in; Nathan Inkuante’n le amau Inkuan ma sûn in, a jiteu inle amau Inkuan chiat kisûn ta’n au;

¹³Levi Inkuante’n le amau Inkuan sûn in, a jiteu inle amau Inkuan ma sûn in au; Shimei Inkuante’n le amau Inkuan sûn in, a jiteu inle amau Inkuan chiat sûn ta’n au;

¹⁴Inkuan dang um nalai cheng inle amau Inkuan kisûn chiat in, a jiteu inle amau Inkuan chiat kisûn ta’n au.