Read Vaiphei ZEKARIAH 14 Bible Online

ZEKARIAH 14 - Vaiphei bible

ZEKARIAH 14

¹Ngai un, LALPA vaihawmna ni hung tung ding ahi tai; zia phat chuleh, la van uh a hun lâkpiakteu chu la mit mu ngei un kihawm ta’n au.

²Jerusalem do dingin khawvel ah nam zosia ko khawm ding ka hi’ngâl a; tichun, khawpi chu lâk hi’ntin, mite chule luaknâm hi’n tiu in, numeite chu pawng sual in um ta’n au; khawpi sung ah mihing a kimkhat chu sal ah pui mang hi’ntin, a dang cheng chu khawpi ah kipat in sukmangthai hipua’n au.

³Ziaphat chuleh, LALPA hung kipan intin, kido’na gâl sat gual in, zia nam tinte chu hun do ta’n a.

⁴Ziaphat chuleh, Jerusalem sualam kai ah Oliv tâng chu a keng in hun chuan intin; chuleh, Oliv tâng chu sualam leh tumlam ah kikhen jak in, a kâl ah phâijawl lian tak hung um ta’n ah; chun, tâng kimkhatte gêl chu phel ni kisua in, khat in mallam zuan in, khat in simlam zuan in a.

⁵Chun, LALPA tâng kikâl ah phâizawl ah chun tai mang inla, zia tâng kikâl ah phâizawl chun Azal tiang tung in a; tichun, Judai gam ah Lengpa Uzziah dam lai ah linlîng ziak ah la jamsiat gual uh khan jam ta’n lau. Tichun, LALPA ka Pathian chu a mithiangtho zosia tawh hung ta’n a.

⁶Zia ni chu a hung tun phat leh, votna ahiloleh vûk ah khalna him him um ta pua’n a.

⁷Chuleh, sûn in choltik nei talo in (LALPA het dan in) sûn leh jan kiti um chuam ta pua’n ah; nitâk janthim hun inle khua vâk zing ta’n a.

⁸Ziaphat chuleh, Jerusalem ah kipat in tuihing hung luangdok ta’n tin: A kimkhat chu sualam tuisuagiat ah, a kimkhat tumlam tuisuagiat ah luang lut ta’n a; nipi leh phalbi inle danglam pua’n a.

⁹Chun, leilung pumpi’n LALPA chu leng hung hita’n a; zia hun chuleh LALPA leh a min bep chu biak hita’n a.

¹⁰Gam zosia chu Geba ah kipat Jerusalem simlam ah Rimmon tiang in, phâizawl hung hita’n a. Ahi’n, Jerusalem vang chawisa’n ah um in, Benjamin Kotpi a tiu ah kipat Kotpi umna masa a Kil ah Kotpi tiang; chuleh, Hananel In sâng ah kipat lengpa uain sûkna phual mun tiang chu bit tak in um ta’n a.

¹¹Chuleh, suksiat ni um talo ding ah lua dim in um ta’n tin, Jerusalem chu bit tak in um ta’n a.

¹²Jerusalem do’tu mipi zosia chung ah gawtna LALPA‘n a tunsak dingte chu zia gual hi hi’n a: A keng ua a din zing lai un a taksau chu muat tha’n tin, a mitkhuk sung un a mitchang uh muat ngâl intin, a kam sung ua a lei uh chule muat tha ngâl ta’n a.

¹³Ziaphat chuleh, LALPA kiang ah kipat in buaina huaisia tak a lak un hung um intin, mitin in ama nai pen pen chu man intin, kimuda tua chiat intiu in,

¹⁴Judah inle Jerusalem ah chun gâldo ta’n a. Tichun, a kîmvêl ah nam zosiate sum leh pâi, sanate, dangka thikte, sil leh chênte chu tam tak la khawm ta’n au.

¹⁵Zia gual natpi chu sakolte, sabiltungte, sangawngsaute leh a lak ua gancha um zosia chung ah chun chu ta’n a.

¹⁶Ziaphat chuleh, Jerusalem hun do namtin lak ah hing leh dam nalai sunte chu kumsin ah Bawkcha Kût mang ding leh Lalpen, sepai honte LALPA chibai bûk dingin chia to zing ta’n au.

¹⁷Lei chung ah Inkuan zosia, Lalpen sepai honte LALPA, Lengpa chu chibai bûk ding ah chia lo taphot chung ah gua zu ta pua’n a.

¹⁸Aigupta gam mite lak ah kua Inkuan le a chia to lo a um chun, Bawkcha Kût mang ding ah chia lo namte, LALPA gawtna hipi chu a chung un tung ding ahi.

¹⁹Zia gual ah chun Aigupta gam ah mite leh Bawkcha Kût mang ding ah chia to lo zosia chung ah gawtna chu hi’n a.

²⁰Ziaphat chuleh, sakol telnengte ah chunle, “LALPA â ding ah Thiangtho,” kiti sut in um ta’n a. Chuleh, LALPA In ah anhuanna bêlte chu mâichâm âng ah kuang thiangthote gual chu hita’n tin;

²¹Jerusalem khua leh Judai gam ah thil huanna bêl zosia chu, sepai honte LALPA â ding ah sukthiantho hita’n tin; tichun, kithoina thil lân ding ah hung zosia’n a kithoinau thil latte huanna’n mang ngâl ta’n au. Ziaphat chuleh, sepai honte LALPA In ah chun sumkawlveite him him um ta pua’n au.