Read Vaiphei ZEKARIAH 2 Bible Online

ZEKARIAH 2 - Vaiphei bible

ZEKARIAH 2

¹Chun, ka dakdok ah, ka etto leh mi pakhat a khut ah te’na khau chawi lai ka mu’n.

²A kiang in, “Khoi ah chia ding la hem?” ka tileh, ama chun, “Jerusalem hi a vailam bangtia leh, a dung lam bang chan a hem ti te’ding ka hi,” ti’n ei dawnhu a.

³Chuleh, vansawlchâk ei hopi chun ei hun zuan ah, ama kituakpi dingin vansawlchâk dang khat inle a hun zuan a;

⁴a kiang in, “Tai inla, zia tangval kiang ah sawn, Jerusalem chu a sung ah mihing leh gancha a tam bêk ziakin, khawneu kulbâng bei gual mai ah lua dim ah hung um ding ahi, ti vagen in.

⁵Kei chu a kîmvêl ah mei kulbâng hi’ng ka tin, a lailung ah lopina chu hiding ka hi, LALPA chun a tii,” ti hi vagen in, ei tia.

⁶Hung tho un! Hung tho un! mallam gam ah kipat in jam mang un, LALPA‘n a tii. Van hui palite gual in gam tin ah ka hun thejak ta’ngal a, LALPA‘n a tii.

⁷Hung tho un, nang Babulon chanu tawh chêng, Zion ah chun hung taidok tau in.

⁸(A lopina’n ei sawldaw zaw phatin,) Nangma hun suamte chung châng, sepai honte LALPA chun zia gual hin a gen ta’ngal a: Nangma hun khawi kha taphot chun, ka mit naucha ei khawi piak a hiu.

⁹Tu’hin en in, amau kãl in ka khut lâm ding ka hi, amau suakte ma ma simmaw in um in au; ziaphat chuleh, sepai honte LALPA chun ei sawl ka hi ti hechian ta’n lau.

¹⁰Aw Zion chanu, lim in La sa’n! Ngai in, la kiang ah chêng ding ah hung ding ka hi’ngal a, LALPA‘n a tii.

¹¹Zia ni chuleh, nam tam tak in LALPA zawm ta’n tiu in, ka mite hita’n au; chun, la lak un chêng ta’ng ka. Chuleh, sepai honte LALPA chun ei sawl ka hi ti hun he ta’n lau.

¹²LALPA chun gam thiangtho ah chun, Judah chu a gochan dingin lua ta’n tin, chuleh, Jerusalem chu têlchuam kit ta’n a.

¹³Mizosiate haw, LALPA âng ah chun thip chil chel tau in, ama chu a mun thiangtho ah kipat in a hung thodok ta ahi.